រាជធានីភ្នំពេញ ៖ លោកអធិការរងខណ្ឌដង្កោ ២រូបបានសំដែងនូវកំហឹង ចំពោះជនមិនស្គាល់មុខ ដែលអុកឡុកប្រព័ន្ធវិទ្យុទាក់ទង (ICOM) បណ្តាលឱ្យការទំនាក់ទំនង ការងាររបស់សមត្ថកិច្ច ទូទាំងខណ្ឌ ត្រូវរំខាន និងមិនអាចទាក់ទងគ្នាបាន ។ ដោយសារមានការរំខាន ពីអ្នកប្រើប្រាស់វិទ្យុទាក់ទងអនាធិបតេយ្យ លោកអធិការរងទាំងពីររូបបានប្រកាសឱ្យមន្ត្រីប៉ូលិសក្រោមឱវាទ ដាក់កំលាំងស្ទាក់ចាប់ជនណាក៏ដោយ ឱ្យតែមានកាន់វិទ្យុទាក់ទង ត្រូវតែឃាត់ត្រួតពិនិត្យជាបន្ទាន់ ។ ហើយបើមិនមែនជាសមត្ថកិច្ច តែមានប្រើកាណាល់របស់ប៉ូលិសត្រូវតែឃាត់ខ្លួន និងដកហូតយកវិទ្យុទាក់ទង មិនតែប៉ុណ្ណោះបើឃាត់បានម្នាក់លោក នឹងជូនរង្វាន់២០ដុល្លារអាមេរិក ។ ការប្រកាសចេញបញ្ជាខាងលើនេះ គឺបន្ទាប់ពីមានការអុកឡុកប្រព័ន្ធវិទ្យុទាក់ទង កាលពីវេលាព្រឹកថ្ងៃទី២៦ កញ្ញា ឆ្នាំ២០១០ ពីជនមិនស្គាល់មុខខាងលើដោយការចាក់បទចំរៀងរួចគុបប៉េដាក់តាមប្រព័ន្ធវិទ្យុទាក់ទងជាច្រើនលើកច្រើនសា ។
មន្ត្រីប៉ូលិសខណ្ឌដង្កោ មួយរូបបានបង្ហើបឱ្យដឹងថា ពិតជាមានការអុកឡុកប្រព័ន្ធវិទ្យុទាក់ទងពីសំណាក់ជនមិនស្គាល់មុខមែន ដែលពួកនោះគឺជាមនុស្សបាតសង្គមគ្មានសតិសម្បជញ្ញៈ ក្នុងខ្លួនតែងតែអុកឡុកបែបនេះជារៀងរាល់ថ្ងៃ ជាពិសេសនៅពេលកំពុងមានសភាពការណ៍បទល្មើសផ្សេងៗកើតឡើងម្តងៗ ។ មន្ត្រីប៉ូលិសរូបនោះបានបន្តទៀតថា ក្រុមជនមិនស្គាល់មុខតែងតែចាក់បទចំរៀង និងឱ្យក្មេងតូចៗនិយាយលេង ឬស្រែកជេរគេឯងតាមប្រព័ន្ធវិទ្យុទាក់ទងអត់សណ្តាប់ធ្នាប់បំផុត ។ កន្លងមកទោះបីជាមានការផ្លាស់ប្តូរកាណាល់ និងបញ្ចូលលេខថ្មីជាញឹកញាប់ក៏នៅតែពួកនោះតាមអុកឡុកអត់ឈប់ឈរដដែល ។ ទង្វើបែបអគតិបែបនេះ បានធ្វើឱ្យលោកអធិការរងទាំងពីរនាក់ខាងលើមានការខឹងសម្បាយ៉ាងខ្លាំង ហើយបានបញ្ជាឱ្យកំលាំងគ្រប់គោលដៅធ្វើការស្ទាក់ឃាត់ជនណាក៏ដោយ ដែលពុំមែនជាសមត្ថកិច្ច ហើយមានវិទ្យុទាក់ទងប្រើកាណាល់ខណ្ឌដង្កោ ត្រូវតែឃាត់ទុក និងដកហូតយកវិទ្យុទាក់ទង ប្រសិនបើឃាត់បានម្នាក់ លោកអធិការរងនឹងជូនរង្វាន់២០ដុល្លារអាមេរិក ។ ទោះបីជាបែបណាបន្ទាប់ពីមានការប្រកាសបែបនេះភ្លាម ក្រុមអ្នកអុកឡុកបានឈប់ក្រឡុក ហើយស្ងាត់ស្ងៀមដូចចោរលួចសេះ ។ ប្រភពព័ត៌មានមួយបានឱ្យដឹងថា អ្នកដែលអុកឡុកនោះមិនមែនមានតែអ្នកក្រៅនោះទេ អាចមានទាំងសមត្ថកិច្ចខ្លះផងដែរ ហើយសព្វថ្ងៃនេះអ្នកប្រើប្រាស់វិទ្យុទាក់ទងមានច្រើនណាស់ ដូច្នេះប៉ូលិលមិនងាយនឹងរកមុខឃើញនោះឡើយ ៕
ចែករំលែកព័តមាននេះ