ខេត្តត្បូងឃ្មុំ ៖ ភ្លៀងធ្លាក់១មេលាយឡំនឹងខ្យល់កន្ត្រាក់បោកបក់យ៉ាងខ្លាំង បណ្តាលឲ្យរបើកដំបូលនៅបញ្ជាការដ្ឋានសឹករងស្រុកអូររាំងឪ និងរលំរោងម៉ាស៊ីនកិនស្រូវ កាលពីវេលាម៉ោងប្រមាណ៦និង៣០ល្ងាចថ្ងៃទី១ ខែមិថុនា ឆ្នាំ២០២០ នៅក្នុងស្រុកអូររាំងឪ ។ ទោះជាយ៉ាងណា បាតុភូតធម្មជាតិនេះមិនបណ្តាលឲ្យមានគ្រោះថ្នាក់ដល់អាយុជីវិតមនុស្ស ឬសត្វនោះទេ ប៉ុន្តែទំហំនៃការខូចខាតគិតជាទឹកប្រាក់គឺប្រមាណ៦០ម៉ឺនដុល្លារ ។
វរសេនីយ៍ឯក លឿង រដ្ឋា អធិការនគរបាលស្រុកអូររាំងឪ ឲ្យដឹងថា ដំបូងគេឃើញមេឃខ្មៅមីរដេរដាស លុះបន្តិចក្រោយមកស្រាប់តែមានភ្លៀងធ្លាក់ចុះមកលាយឡំដោយខ្យល់កន្ត្រាក់ បោកបក់យ៉ាងខ្លាំងក្នុងរយៈពេលជិត១ម៉ោង ។បន្ទាប់ពីរាំងភ្លៀង នគរបាលប៉ុស្តិ៍បានរាយការណ៍ពីការខូចខាតផ្សេងៗដោយសារគ្រោះធម្មជាតិនេះ ។
លោកអធិការបន្តថា ដោយសារខ្យល់កន្ត្រាក់ ដំបូលផ្ទះលោក តាំង ម៉េងរ៉ាត់អភិបាលរងស្រុកអូររាំងឪ នៅភូមិអំពិលជុំ ឃុំអំពិលតាពក បានរងការខូចខាត ។ ចំណែករោងម៉ាស៊ីនកិនស្រូវ នៅភូមិអំពិលត្បូង ឃុំអំពិលតាពក ជារបស់ឈ្មោះ បេ គឹមស៊ាង អាយុ៤១ឆ្នាំ ប្រពន្ធឈ្មោះ ប៉ូ ឆេងគា អាយុ៣៦ឆ្នាំបានដួលរលំ ។ រោងម៉ាស៊ីនកិនស្រូវនេះមានទំហំ៣០ម៉ែត្រX៤៥ម៉ែត្រ បានការខូចខាតទាំងស្រុង ដែលគិតជាទឹកប្រាក់ប្រហែល៦០ម៉ឺនដុល្លារ ។
នៅព្រឹកថ្ងៃទី២ ខែមិថុនា សមត្ថកិច្ចបានចុះស្រង់ទិន្នន័យនៃការខូចខាតដោយគ្រោះធម្មជាតិ ខ្យល់កន្ត្រាក់នេះ ក្រៅពីការខូចខាតទ្រព្យសម្បត្តិគឺមិនមានរដ្ឋណាម្នាក់រងគ្រោះថ្នាក់ដល់អាយុជីវិតនោះទេ ។
តាមការកត់សម្គាល់ ជារៀងរាល់ឆ្នាំឲ្យតែរដូវវស្សាចូលមកដល់ធ្លាក់ភ្លៀង តែងតែមានខ្យល់កន្ត្រាក់បណ្ដាលឱ្យរបើកដំបូលផ្ទះនៅតាមឃុំមួយចំនួន ក្នុងស្រុកអូររាំងឪ តែនៅឆ្នាំ២០២០ នេះ គ្រោះធម្មជាតិហាក់ដូចជាមានសភាពធ្ងន់ធ្ងរជាងឆ្នាំកន្លងទៅ ។
លោក ងួន ប៊ុណ្ណាន អភិបាលស្រុកអូររាំងឪ បានឱ្យដឹងដែរថា ចំពោះភ្លៀង និងខ្យល់កន្ត្រាក់ ដែលបានកើតឡើងនោះ នៅឃុំផ្សេងទៀតមិនមានរងផលប៉ះពាល់ទេ ។ ចំណែករោងម៉ាស៊ីនកិនស្រូវដែលដួលរលំដោយខ្យល់កន្ត្រាក់នោះ ត្រូវបានម្ចាស់រុះរើ និងរៀបចំដំឡើងជាថ្មីឡើងវិញ ៕
ចែករំលែកព័តមាននេះ