ពេញមួយចុងសប្ដាហ៍កន្លងទៅ បណ្ដាភ្នាក់ងារសម្ងាត់អាមេរិក បានប្រឈមមុខជាមួយបណ្ដាបាតុករ ដែលពោរពេញដោយកំហឹងនៅក្បែរនិវេសនដ្ឋានរបស់ប្រធានាធិបតីលោកដូណាល់ត្រាំក្នុងសេតវិមាន ខណៈបម្រាមគោចរណ៍ត្រូវបានដាក់ក្នុងទីក្រុងអាមេរិកយ៉ាងតិច១៤០ ។
បាតុកម្មទាំងឡាយបានក្លាយទៅជារលកនៃការបះបោរក្នុងកម្រិតជាតិ ។ ១សប្ដាហ៍ក្រោយការស្លាប់របស់បុរសស្បែកខ្មៅម្នាក់ លោកGEORGE FLOYD ពេលប៉ូលិសចាប់ខ្លួនគេ នៅក្រុងមីននីប៉ូលីស បាតុកម្មនានាបានផ្ទុះយ៉ាងខ្លាំងទាមទារបញ្ឈប់អំពើសាហាវព្រៃផ្សៃរបស់ប៉ូលិស ហើយបានប្រែក្លាយទៅជាចលនាហិង្សា និងការប្លន់យកអីវ៉ាន់តាមហាងទំនិញនានា នៅពាសពេញសហរដ្ឋអាមេរិក ។
ចាប់តាំងពីថ្ងៃទី២៧ ឧសភា មកបាតុកម្ម ផ្ទុះឡើងក្នុងទីក្រុងអាមេរិកជិត១៤០ ចាប់តាំងពីក្រុងសីុថល់ដល់ក្រុងម៉ៃអាមី និងចាប់ពីក្រុងបូស្តុនដល់ក្រុងឡូសអេចឺឡេស ។ បាតុកម្មទាំងនេះជារឿយៗប្រែក្លាយជាការបះបោរហិង្សា និងការបំផ្លិចបំផ្លាញព្រមទាំងការប្លន់នាចុងសប្ដាហ៍កន្លងទៅ។
កងឆ្មាំជាតិនិងកងទាហានបំរុងសម្រាប់ការពារដែនដីត្រូវបានកេណ្ឌប្រមូលក្នុងរដ្ឋចំនួន១៥ ដើម្បីជួយដល់កងកម្លាំងប៉ូលិស និងការពារបណ្ដាអ្នកពន្លត់អគ្គិភ័យ តែនៅមិនអាចទប់អំពើហិង្សានិងការបះបោរបំផ្លិចបំផ្លាញ ។ចេញពីក្រុងមីននីប៉ូលីស ដែលនៅទីនោះមានការដុតបំផ្លាញនិងការប្លន់យកឥវ៉ាន់តាមហាង
នានាចាប់តាំងពីថ្ងៃទី២៩ ឧសភាមក ការបះបោរបានរាលដាលដល់មាត់ទ្វារសេតវិមាន ។
កាលពីយប់ថ្ងៃទី៣១ ឧសភា ពួកបាតុករបាននាំគ្នាដុតព្រះវិហារសាំងចនដែលហៅផងដែរថា ព្រះវិហារ
ប្រធានាធិបតីស្ថិតនៅក្បែរនិវេសនដ្ឋានផ្លូវការរបស់ប្រមុខរដ្ឋ ។ ពួកអ្ុកពន្លត់ភ្លើងអាចគ្រប់គ្រងបានដោយពន្លត់ភ្លើងឆេះព្រះវិហារនោះ ។ អគារដែលមានទីស្នាក់ការរបស់សហជីព AFL-CIOក៏រងការដុតដែរ ។
ពីយប់ថ្ងៃទី២៩ ឧសភា មកបណ្ដាភ្នាក់ងារសម្ងាត់ការពារប្រធានាធិបតីរងការវាយប្រហារគួរឲ្យភ្ញាក់ផ្អើលដោយសារពួកបាតុករដែលប្រមូលផ្ដុំគ្នានៅទីលាន LAFAYETTE ទល់មុខសេតវិមាន ។ ជាការប្រុងប្រយ័ត្នលោកដូណាល់ត្រាំ និងគ្រួសារ ត្រូវបាននាំទៅកាន់ជម្រកក្រោមដីនៃសេតវិមាន ។ ក្នុងការប៉ះទង្គិចគ្នានៅមាត់ទ្វារសេតវិមាន ប៉ូលិសបានបាញ់ឧស្ម័នបង្ហូរទឹកភ្លែក បញ្ចេញផ្សែងហុយដាសជុំវិញសេតវិមាន ។
ចែករំលែកព័តមាននេះ