ត្រឹមរយៈពេល៤ខែសោះចាប់បានមិនស្ទើរទៅហើយ

ថ្ងៃទី ០៣ ខែ មិថុនា ឆ្នាំ ២០២០
ម៉ោង ០៩:១៩
Kian Sokheak

រាជធានីភ្នំពេញ ៖ រយៈពេល៤ខែដើមឆ្នាំ២០២០ មន្ត្រីឧទ្យានុរក្សនៃក្រសួងបរិស្ថានបានបង្ក្រាបបទល្មើសធនធានធម្មជាតិបានចំនួន២៣៣៣ ករណីដែលភាគច្រើនពាក់ព័ន្ធនឹងការទន្ទ្រានកាន់កាប់ដីព្រៃដោយខុសច្បាប់ បទល្មើសលួចកាប់ឈើ និងបទល្មើសធនធានធម្មជាតិផ្សេងទៀត ។ នេះ គឺជាការថ្លែងឱ្យដឹងនៅថ្ងៃទី២ ខែមិថុនា ឆ្នាំ២០២០ របស់លោក នេត្រ ភក្ត្រា រដ្ឋលេខាធិការ និងជាមន្ត្រីនាំពាក្យនៃក្រសួងបរិស្ថាន ។ នេះបើយោងតាមផេកក្រសួងបរិស្ថានចេញផ្សាយនាថ្ងៃទី០២ ខែមិថុនា ឆ្នាំ២០២០ ។

លោករដ្ឋលេខាធិការបានថ្លែងថា ក្នុងចំណោមបទល្មើសធនធានធម្មជាតិទាំងនេះ
មាន១៧៩ករណី មានការពាក់ព័ន្ធនឹងមនុស្សជិត ២០០នាក់ ត្រូវចងក្រងសំណុំរឿងបញ្ជូនទៅតុលាការ ដើម្បីជំនុំជម្រះក្តីតាមនីតិវិធី និងបានធ្វើការផាកពិន័យអន្តរកាលបានចំនួន៤០៣ ករណី និងធ្វើការអប់រំ និងធ្វើកិច្ចសន្យាបញ្ឈប់ប្រព្រឹត្តបទល្មើសបានចំនួន ៦១៣ ករណីពាក់ព័ន្ធនឹងមនុស្សចំនួន៦២៤ នាក់ អនុលោមតាមច្បាប់ស្តីពីតំបន់ការពារធម្មជាតិ ។

ក្រសួងបរិស្ថានលោក នេត្រ ភក្ត្រា បានថ្លែងឱ្យដឹងបន្តថា ចាប់ពីខែមករា ដល់ខែមេសាឆ្នាំ២០២០ មន្ត្រីឧទ្យានុរក្សរបស់ក្រសួងបរិស្ថានទាំង១២៦០នាក់ បានចុះបេសកកម្មដើរល្បាតចំនួន៧០៧៨ លើកនៅក្នុងតំបន់ការពារធម្មជាតិ និងរបៀងអភិរក្សជីវៈចម្រុះទាំង ៦០កន្លែងដែលមានផ្ទៃដីសរុបប្រមាណ ៧,២ លានហិកតា ហើយពេលខ្លះមានការចូលរួមដើរល្បាតពីសហគមន៍តំបន់ ការពារធម្មជាតិដែលបានទទួលស្គាល់ដោយក្រសួងបរិស្ថាន និងបង្ក្រាបបទល្មើសធនធានធម្មជាតិបានចំនួន ២ ៣៣៣ ករណី ។

តាមការគូសបញ្ជាក់របស់លោករដ្ឋលេខាធិការ នៅក្នុងការចុះទប់ស្កាត់បទល្មើសធនធានធម្មជាតិ៤ខែនេះ មន្ត្រីឧទ្យានុរក្សរួមនឹងសហគមន៍តំបន់ការពារធម្មជាតិដែលបានរឹបអូសរណាយន្តបានចំនួន៩៧០គ្រឿង រថយន្ត រថយន្តកែច្នៃ ត្រាក់ទ័របានចំនួន៥៣ គ្រឿង រឹប អូសម៉ូតូដែលជាមធ្យោបាយប្រព្រឹត្តបទល្មើសបានចំនួន១២៦គ្រឿង ចាប់ឃាត់គោយន្តចំនួន ២០៣ គ្រឿង និងដោះអន្ទាក់ដែលជាឃាតកលាក់មុខសម្លាប់សត្វព្រៃបានចំនួន ៨៩៥០ អន្ទាក់ ព្រមទាំងបានដកហូតកាំភ្លើង កាំភ្លើងកែច្នៃ ស្នាតេះដែលប្រើប្រាស់សម្រាប់បរបាញ់សត្វបានចំនួន ២៣៩ ដើម ៕