រាជធានីភ្នំពេញ ៖ លោកតាដែលរស់នៅឯកោលើគំនរសំរាមជាង១០ឆ្នាំនោះ ពេលនេះបានទទួលផ្ទះថ្មីមួយខ្នងសង់ខ្ពស់ផុតពីដី ដែលជាអំណោយរបស់លោកកែប ជុតិមា អភិបាលរាជធានីភ្នំពេញ និងលោកជំទាវ ។នៅព្រឹកថ្ងៃទី២៥ មិថុនា ឆ្នាំ២០១០ លោកសន សុផល ប្រធានមន្ទីរសង្គមកិច្ចរាជធានីភ្នំពេញ តំណាងលោកកែប ជុតិមា អមដោយមន្ដ្រីអាជ្ញាធរខណ្ឌឫស្សីកែវបានប្រគល់ផ្ទះមួយខ្នងជូនលោកតាឈឹម ញឹម ព្រមទាំងអំណោយមួយចំនួនទៀតរួមមាន អង្ករ ទឹកត្រី ទឹកស៊ីអ៊ីវ និងថវិកា៥០ម៉ឺនរៀល ជាអំណោយលោកកែប ជុតិមា និងអាជ្ញាធរខណ្ឌឫស្សីកែវ ជូនលោកតាបន្ថែម ២០ម៉ឺនរៀលទៀតផង ។
គួររំលឹកថា លោកតាជីវិតឯកោឈ្មោះ ឈឹម ញឹម រស់នៅលើដីឡូត៍ជាប់ផ្លូវជាតិលេខ៥ ក្នុងភូមិបឹងឈូក សង្កាត់គីឡូម៉ែត្រ លេខ៦ ខណ្ឌឫស្សីកែវ ។ លោកតារស់នៅតែ ម្នាក់ឯងគ្មានប្រពន្ធ និងកូន គឺស្ថិតក្នុងភាព កំលោះរហូតមកដល់ពេលនេះមានអាយុ៧៩ឆ្នាំហើយ ។ អ្វីដែលគួរឱ្យកត់សំគាល់នោះគឺ ដោយសារតែការភ័យខ្លាចគេរំលោភយកដីដែលគាត់រស់នៅតាំងពីឆ្នាំ១៩៧៩មក ក៏បានបង្ខំចិត្ដធ្វើការប្រមូលសំរាមយកទៅគរទុកពេញដីឡូត៍របស់គាត់ និងព័ទ្ធជុំវិញខ្ទមតូច របស់គាត់ធ្វើឱ្យប្រជាពលរដ្ឋដែលរស់នៅក្បែរៗនោះសង្ស័យថា គាត់ជាមនុស្សវិកលចរិត ប៉ុន្ដែតាមពិតគាត់ធ្វើឱ្យគេខ្ពើមកុំឱ្យរំលោភយកដីគាត់ប៉ុណ្ណោះ ។
អ្នកភូមិខាងលើបានឱ្យដឹងថា លោកតា ឈឹម ញឹម រស់នៅលើដីឡូត៍នេះតាំងពីយូរណាស់មកហើយ ហើយគាត់បានព្យាយាមដើររើសសំរាមយកទៅគរទុកពេញដីក៏រាប់ឆ្នាំមកហើយដែរ ហើយអ្នកខ្លះនិយាយថា គំនរសំរាមនេះគាត់គរទុកជាង១០ឆ្នាំហើយ ។ កន្លងមកមានប្រជាពលរដ្ឋរស់នៅជិតខាង បានព្យាយាមប្ដឹងទៅអាជ្ញាធរពីការស្អុយសំរាមដើម្បីឱ្យជួយអន្ដរាគមន៍ ប៉ុន្ដែនៅពេលអាជ្ញាធរចុះទៅសួរនាំក៏មិនបាន ដោយសារ លោកតារូបនេះទាញកាំបិតខ្វែវដេញកាប់ ហើយការព្យាយាមរបស់អាជ្ញាធរខណ្ឌឫស្សីកែវមិនបានសំរេចរាប់ឆ្នាំមកហើយ ។
ប្រជាពលរដ្ឋបាននិយាយទៀតថា ការរស់នៅរបស់លោកតាឈឹម ញឹម ពិតជាគួរឱ្យអាណិតអាសូរណាស់ ព្រោះគាត់មិនមាន មុខរបរអ្វីឡើយ ហើយទីទ័លក្រដើររើស តែសំរាម ប៉ុន្ដែមិនដើររើសអេតចាយ ឬសុំទានគេទេ មិនដឹងជាបានអ្វីហូបឡើយ ។ ការរើសសំរាមនេះគឺសំរាប់យកទៅគរទុកក្នុងដីឡូត៍របស់គាត់ប៉ុណ្ណោះ ដែលគេនាំគ្នាឆ្ងល់ថា ទំនងជាគាត់ហូបកាកសំណល់ពីសំរាមនោះ ហើយមើលទៅ ។ ដោយទទួលបានលិខិតផ្លូវការរបស់លោកកែប ជុតិមា អភិបាលរាជធានីភ្នំពេញ មន្ទីរសង្គមកិច្ច អតីតយុទ្ធជន និងយុវនីតិសម្បទា រាជធានី ដឹកនាំដោយលោកសន សុផល ជាប្រធានមន្ទីរ បានព្យាយាមចូលទៅជួបលោក តាឈឹម ញឹម ដោយប្រើគ្រប់វិធី ។
ទីបំផុតក៏និយាយត្រូវគ្នា ដោយលោកតាអនុញ្ញាតឱ្យ កើបសំរាមចេញ និងសន្យាធ្វើផ្ទះជូនគាត់ក្នុងនាមជួយសង្គ្រោះទុរគតជន កាលពីថ្ងៃទី២៣ ធ្នូ ឆ្នាំ២០០៩ កន្លងមក ។ ក្រោយពីទទួលបានការអនុញ្ញាតភ្លាម ក្រុមការងារមន្ទីរ សង្គមកិច្ចបានឱ្យក្រុមហ៊ុនស៊ីនទ្រីដាក់កម្មករកាយសំរាមចេញភ្លាមៗបានមួយកំណាត់ចាប់ ពីរោងដែលគាត់រស់នៅរហូតដល់ជាប់ផ្លូវជាតិលេខ៥ ។ កាលពីថ្ងៃទី២៨ ធ្នូ ឆ្នាំ២០០៩ លោក សន សុផល ប្រធានមន្ទីរសង្គមកិច្ចរាជធានី និង មន្ដ្រីអមដំណើរ រួមជាមួយតំណាងអាជ្ញាធរខណ្ឌឫស្សីកែវ បាននាំយកអំណោយ ជំហានដំបូងរបស់លោកកែប ជុតិមា ទៅផ្ដល់ជូនដល់ដៃលោកតាឈឹម ញឹម រួចម្ដងមកហើយ។
តាមការពិនិត្យជាក់ស្ដែង លោកតាឈឹម ញឹម មិនមែនជាមនុស្សវិកលចរិតដូចការចោទប្រកាន់នោះទេ ព្រោះគាត់និយាយដឹងខុសត្រូវណាស់ ។ គាត់បានឱ្យដឹងថា ការយកសំរាមធ្វើជាទីជំរកបែបនេះជាង១០ឆ្នាំមក ហើយ គឺដោយសារតែខ្លាចមានគេព្យាយាម រំលោភយកដីឡូត៍របស់គាត់ ដែលជាដីត្រូវ ប៉ាន់មានទំហំ៥ម៉ែត្រគុណនឹង៣០ម៉ែត្រ ហើយជាប់នឹងផ្លូវជាតិលេខ៥ ។ ម្យ៉ាងទៀត គាត់មិនមានសាច់ញាតិណាម្នាក់ឡើយ ពីមុន បានទទួលដំណឹងថា មានក្មួយស្រីម្នាក់នៅ ខេត្ដកំពង់ឆ្នាំងតែមិនដែលបានជួបគ្នា ឬដឹង ដំណឹងថា នៅទីណាឱ្យច្បាស់លាស់នោះទេ ។
លោកសន សុផល បានឱ្យដឹងថា បើតាម ការពិនិត្យជាក់ស្ដែងនិងមានការសង្កេតខ្លះ លោកតាឈឹម ញឹម គឺជាមនុស្សមានស្មារតី ធម្មតា ធ្លាប់បួសតាំងពីអាយុ១៦ឆ្នាំ ជាអតីត សង្ឃនៅវត្ដស្វាយពពែ ។ ឆ្នាំ១៩៧៩ គាត់ជា បុគ្គលិកឃ្លាំងពាណិជ្ជកម្មគីឡូម៉ែត្រលេខ៦ គ្មានប្រពន្ធ មានតែក្មួយស្រីម្នាក់នៅខេត្ដ កំពង់ឆ្នាំង គាត់មានអារម្មណ៍មិនល្អ ព្រោះ ខ្លាចអ្នកជិតខាងយកដីគាត់ ព្រោះគាត់រស់ នៅម្នាក់ឯង គ្មានមុខរបរ គ្មានលុយសង់ផ្ទះ រស់នៅនឹងគេ ។ ដើម្បីការពារដីឡូត៍របស់ គាត់ពេលនោះគាត់បានរកឃើញមធ្យោបាយមួយគឺយកសំរាមមកគរទុក និងរស់នៅលើ ដីឡូត៍គំនរសំរាមនេះអស់រយៈពេលជាយូរណាស់មកហើយ ។
លោកសន សុផល ពេលនោះបានសន្យាថា លោកនឹងនាំយក អំណោយលោកកែប ជុតិមា អភិបាលរាជធានី ជាពិសេសសាងសង់ផ្ទះជូនលោកតា ក្នុងពេលឆាប់ៗនេះ និងសំណូមពរឱ្យលោក តាឈប់ភ័យខ្លាចពីការបាត់បង់ដី និងឈប់ យកសំរាមមកគរដូចនេះទៀត ហើយលោកតាក៏បានថ្លែងអំណរគុណ និងគោរពតាមការណែនាំនេះ ។ ជាក់ស្ដែងពេលនេះ លោកតា បានទទួលផ្ទះថ្មីយ៉ាងពិតប្រាកដ ៕
ចែករំលែកព័តមាននេះ