រាជធានីភ្នំពេញ ៖ ប្រទេសកម្ពុជាមានមេធាវីរបស់ខ្លួនសរុបចំនួន៨៩៧នាក់ដែលបានចុះបញ្ជីផ្លូវការ និងទទួលស្គាល់ដោយគណៈមេធាវីនៃព្រះរាជាណាចក្រកម្ពុជា ។ ក្នុងនោះមានមេធាវីចំនួន៧២៥នាក់កំពុងតែបំពេញតួនាទីការពារសិទ្ធិជូនជនរងគ្រោះឬជនជាប់ចោទ ប៉ុន្តែមានមេធាវីចំនួន១៧២នាក់សុំមិនប្រកបមុខរបរការពារក្តី ។ នេះបើតាមការលើកឡើងរបស់លោក ប៊ុន ហុន ប្រធានគណៈមេធាវីនៃព្រះរាជាណាចក្រកម្ពុជា ដែលជាប់ឆ្នោតចំនួនពីរអាណត្តិជាប់ៗគ្នាក្នុងការដឹកនាំគណៈមេធាវី កាលពីថ្ងៃទី១៧ វិច្ឆិកា បានថ្លែងប្រាប់កោះសន្តិភាពក្នុងបទសម្ភាសន៍ដាច់ដោយឡែកមួយនៅការិយាល័យគណៈមេធាវីនៃព្រះរាជាណាចក្រកម្ពុជា ។
លោកប្រធានគណៈមេធាវីបញ្ជាក់ថា មានជនខិលខូចមួយចំនួនបានបន្លំខ្លួនធ្វើជាមេធាវីទៅឆបោកប្រាក់ពីជនរងគ្រោះ ដែលពេលនេះគណៈមេធាវីកំពុងតែស៊ើបអង្កេត និងប្តឹងទៅសាលាដំបូងដើម្បីចាត់ការតាមច្បាប់។ ចំពោះមេធាវីបរទេសវិញ មានតែមេធាវីកំពុងបំពេញការងារនៅសាលាក្តីខ្មែរក្រហមទេ ដែលមានការទទួលស្គាល់ដោយគណៈមេធាវីនៃព្រះរាជាណាចក្រកម្ពុជា ។ ក្រៅពីនេះ ជនបរទេសទាំងឡាយដែលមិនមានការទទួលស្គាល់ពីគណៈមេធាវី ជនទាំងនោះមិនមែនជាមេធាវីឡើយ ។ លោកប្រធានអះអាងថា គណៈមេធាវីនៃព្រះរាជាណាចក្រកម្ពុជា មាននាយកដ្ឋានការពារក្តីជូនជនក្រីក្រ ដែលទទួលបានប្រាក់មូលនិធិប្រចាំឆ្នាំពីរាជរដ្ឋាភិបាលកម្ពុជាក្នុងឆ្នាំ២០១៤នេះបានផ្តល់ចំនួន៣០០លានរៀល ប្រហែល៧៥.០០០ដុល្លារអាមេរិក ។ រហូតមកដល់ខែវិច្ឆិកា ឆ្នាំ២០១៤ គណៈមេធាវីបានផ្តល់សេវាកម្មជូន៨០០ករណីមកហើយ ក្នុងនោះមានមេធាវីជួយការពារក្តីដោយស្ម័គ្រចិត្តចំនួន១៥០រូបនៅក្នុងតុលាការទូទាំងប្រទេស ។ បុ៉ន្តែនៅមានបញ្ហាប្រឈមខ្លះក្នុងការរៀបចំឯកទទួលនិងផ្តល់ប្រាក់មូលនិធិទាំងនោះ និងសំណូមពរដល់មន្ត្រីហិរញ្ញវត្ថុជួយសម្រួលក្នុងទទួលប្រាក់នេះផង ។
កាលពីរសៀលថ្ងៃទី១៧ វិច្ឆិកា មានមេធាវីថ្មីចំនួន១៦នាក់ (ស្រី៥នាក់) បានស្បថនៅសាលាឧទ្ធរណ៍នៅចំពោះមុខលោកចៅក្រម ងួន អុីម មុនពេលចូលបំពេញកម្មសិក្សារបស់ពួកគាត់។ ក្រុមមេធាវីនិយាយថា ពាក្យដែលពួកគាត់បានស្បថនោះមានដូចជា ត្រូវគោរពច្បាប់ គោរពវិជ្ជាជីវៈ និងក្រមសីលធម៌ជាដើម ។ មេធាវីដែលអាចស្បថចូលប្រកបមុខរបរជាមេធាវីបាន លុះត្រាមានសញ្ញាបត្របរិញ្ញបត្រច្បាប់ ឬក៏បានបំពេញការងារផ្នែកវិស័យច្បាប់យ៉ាងតិច២ឆ្នាំ បន្ទាប់មកចូលរៀនវគ្គបណ្តុះបណ្តាលពេញមួយឆ្នាំសិន ។ លោក ប៊ុន ហុន លើកឡើងថា មេធាវីបរទេសក្រៅពីមេធាវីនៅសាលាក្តីខ្មែរក្រហម ហើយប្រកាសថា ខ្លួនជាមេធាវីនោះ អ្នកទាំងនោះកំពុងតែធ្វើឱ្យប៉ះពាល់ដល់ច្បាប់កម្ពុជា ធ្វើឱ្យប៉ះពាល់ដល់តម្លៃវិជ្ជាជីវៈមេធាវីកម្ពុជា ។ មេធាវីបរទេសមួយចំនួនធំនៅកម្ពុជាទាំងនោះមិនបានចុះបញ្ជីនៅគណៈមេធាវីនៃព្រះរាជាណាចក្រកម្ពុជាទេ និងមិនទាន់មានការអនុញ្ញាតឱ្យមានការប្រកបវិជ្ជាជីវៈនោះទេ ហើយគណៈមេធាវីបានជំរុញវិស័យឯកជន សាធារណជនទាំងអស់ឱ្យមានការអនុវត្តច្បាប់ទាក់ទងការប្រកបវិជ្ជាជីវៈមេធាវី ។
លោក ប៊ុន ហុន ថ្លែងថា ក្នុងនាមលោកជាប្រធានគណៈមេធាវីនៃព្រះរាជាណាចក្រកម្ពុជាលោកសូមជម្រាបជូនដល់ក្រុមហ៊ុនឯកជននៅកម្ពុជាថា មេធាវីបរទេសដែលប្រកបរបរនៅកម្ពុជាទាំងអស់ លើកលែងតែនៅសាលាក្តីខ្មែរក្រហមសុទ្ធតែខុសច្បាប់ទាំងអស់ ។ មេធាវីដែលចង់ប្រកបរបរជាមេធាវី ត្រូវចុះបញ្ជីនៅគណៈមេធាវីនៃព្រះរាជាណាចក្រកម្ពុជាជាមុនសិន តែបើគាត់មិនចុះបញ្ជីទេ វាធ្វើឱ្យប៉ះពាល់ដល់ការពង្រឹងនីតិរដ្ឋនៅកម្ពុជា ហើយគណៈមេធាវីនឹងធ្វើការជូនដំណឹងអំពីការប្រកបវិជ្ជាជីវៈរបស់ក្រុមមេធាវីនៅពេលឆាប់ៗនេះ ។ លោក ប៊ុន ហុន លើកឡើងថា មេធាវីមិនអាចនិយាយថា ខ្លួនអាចជួយកូនក្តីរបស់ខ្លួនឱ្យឈ្នះក្តីនៅក្នុងតុលាការ ឬក៏និយាយថាខ្លួនអាចធានាកូនក្តីរួចពីការចោទប្រកាន់នោះទេ ព្រោះច្បាប់មិនអនុញ្ញាតឱ្យមេធាវីនិយាយបែបនេះឡើយ ។ បុ៉ន្តែមេធាវីអាចនិយាយក្រោយពីតុលាការសម្រេចរឿងក្តីមួយថា ការសម្រេចនេះមិនអាចទទួលយកបានទេ និងអយុត្តិធម៌សម្រាប់កូនក្តីរបស់ខ្លួន និងមិនអាចយកសម្រេចរបស់តុលាការទាំងមូលមកវិភាគឡើយ ។
លោក ប៊ុន ហុន បញ្ជាក់ថា ចាប់តាំងពីឆ្នាំ១៩៩៥ រហូតមកដល់ពេលនេះ មានសមាជិកគណៈមេធាវីចំនួន៤នាក់ត្រូវបានលុបឈ្មោះចេញពីបញ្ជីគណៈមេធាវីនៃព្រះរាជាណាចក្រកម្ពុជា ក្នុងនោះរួមមានលោក សម រង្ស៊ី ម្នាក់ផងដែរ គាត់ត្រូវបានតុលាការកំពូលចេញសាលក្រមស្ថាពរ ព្រោះក្នុងច្បាប់មេធាវីថា អ្នកដែលជាប់ពាក់ព័ន្ធនឹងរឿងព្រហ្មទណ្ឌមិនអាចជាសមាជិកគណៈមេធាវីបានទេ បុ៉ន្តែបើលោក សម រង្ស៊ី សុំចុះឈ្មោះឡើងវិញ លុះត្រាគាត់ដាក់ពាក្យសាជាថ្មីក្រោយពីមានការបញ្ជាក់សម្បទាជាថ្មី ។ មេធាវី២នាក់ទៀតលុបចេញបន្ទាប់ពាក់ព័ន្ធក្នុងរឿងឆបោកប្រាក់គេប្រមាណ១០ម៉ឺនដុល្លារអាមេរិក និងម្នាក់ទៀតកំពុងស្ថិតនៅក្នុងចំណាត់ការរបស់សាលាឧទ្ធរណ៍ ៕
ចែករំលែកព័តមាននេះ