សហរដ្ឋអាមេរិក-ចិន ៖ សហរដ្ឋអាមេរិកបានធ្វើការសន្និដ្ឋានជាផ្លូវការនាថៃ្ងទី ២៧ ឧសភាថា ហុងកុងលែងមានស្វ័យភាពដូចការសន្យារបស់ចិនទៀតហើយ ដែលនោះជាការបើកផ្លូវទៅរកលទ្ធភាពនៃការសងសឹកខាងពាណិជ្ជកម្ម ក្នុងការតបតដំបូងគួរឲ្យភ្ញាក់ផ្អើល ចំពោះច្បាប់សន្តិសុខដ៏ចម្រូងចម្រាស់ដែលចិនចង់បាន ។ ការសន្និដ្ឋានបែបនេះមានន័យថាជាការដកលក្ខន្តិកៈហុងកុងជាទីតាំងហិរញ្ញវត្ថុអន្តរជាតិ ។
ជាសញ្ញានៃការតានតឹងថ្មីក្នុងដែនដីអតីតអាណានិគមអង់គ្លេសនោះ ប៉ូលិសបានដាក់ពង្រាយកម្លាំងដ៏ច្រើននៅជុំវិញសភាហុងកុង ហើយចាប់ខ្លួនមនុស្សច្រើនរយនាក់ ដើម្បីបំបាក់ស្មារតីពួកសកម្មជនស្និទ្ធប្រជាធិបតេយ្យ មិនឲ្យធ្វើបាតុកម្មប្រឆាំងការពិនិត្យគម្រោងច្បាប់មួយទៀត ដែលដាក់ទោសព្រហ្មទណ្ឌចំពោះការមិនគោរពទង់ជាតិចិននៅហុងកុង ។
គម្រោងច្បាប់ស្ដីពីសន្តិសុខជាតិនៅហុងកុង សំដៅជាផ្លូវការរារាំងភេរវកម្ម ការបំបែកខ្លួននិយម ការធ្វើវិទ្ធង្សនានិងការជ្រៀតជ្រែករបស់បរទេសដោយចំហនៅហុងកុង ។
ចិនអះអាងថាគម្រោងច្បាប់នោះសម្រាប់អនុវត្តនៅហុងកុង គឺដើម្បីការពារសន្តិសុខជាតិ ដែលនោះជាវិធានការចាំបាច់សម្រាប់បំពេញកន្លែងច្រឡោះប្រហោងនៅហុងកុង ខាងផ្នែកថែរក្សាសន្តិសុខជាតិ ចាប់តាំងពីការប្រគល់ដែនដីនោះមកឲ្យចិនវិញ ។ ទន្ទឹមនឹងនេះចិនថានោះជាវិធានការដ៏សំខាន់ពីគិតពីការថែរក្សា និងកែលម្អប្រព័ន្ធស្ថាប័នរបស់ប្រទេសមួយមានប្រព័ន្ធ២ ។
ចិនបន្តថាជិត២៣ឆ្នាំហើយក្រោយការវិលត្រឡប់របស់ហុងកុងមកក្នុងមាតុភូមិវិញ ច្បាប់ទាក់ទិននឹងមាត្រាទី២៣របស់រដ្ឋធម្មនុញ្ញ នៅមិនទាន់ពេញលេញ ដែលបណ្ដាលឲ្យហុងកុងក្លាយជា
ចំណុចខ្សោយមួយនៃសន្តិសុខជាតិ និងជាការងាយស្រួលសម្រាប់កងកម្លាំងបរទេសដែល
ប្រទូស្តរ៉ាយបង្កភាពចលាចលប៉ះពាល់ដល់របៀបរៀបរយសាធារណៈ ហើយបំផ្លាញបណ្ដាផលប្រយោជន៍សង្គម និងសេដ្ឋកិច្ច ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ