រាជធានីភ្នំពេញ ៖ ជាថ្នូរនឹងភាពស្ងប់ស្ងាត់ កីឡាករប្រដាល់ល្បីឈ្មោះ វង្ស ណយ ត្រូវគេឃើញបង្ហាញខ្លួនលើឆាកតន្ត្រីលក់សំបុត្រ ក្នុងនាមជាអ្នកចម្រៀងគួរឲ្យភ្ញាក់ផ្អើល ។ ជំហានថ្មីរបស់លោកមិនមែនក្នុងន័យកម្សាន្តអារម្មណ៍ដូចមុននោះទេ ប៉ុន្តែជាជំហរចង់ក្លាយជាអ្នកចម្រៀងអាជីពតែម្ដង ក្នុងពេលខាងមុខ ។ ក្រោយបង្ហោះបទចម្រៀង «កុំចង់ដឹងកុំសាកចំពោះគ្រឿងញៀន» បង្អួតពីទឹកដមសំឡេងផ្ទាល់ខ្លួនជាសាធារណៈ កីឡាករ វង្ស ណយ បានទទួលការចាប់អារម្មណ៍ភ្លាមៗពីសំណាក់លោក គង់ វិសាល អ្នកគ្រប់គ្រងកម្មវិធី «តន្ត្រីយុវវ័យ» របស់ស្ថានីយទូរទស្សន៍បាយ័ន ឲ្យឡើងច្រៀងរាំលើឆាកទូរទស្សន៍ ។
ការបង្ហាញខ្លួននាពេលនោះ មិនមានមនុស្សច្រើនណាស់ណានោះទេយល់ថា លោកមានបំណងចង់ក្លាយជាតារាសិល្បៈ ដោយអ្នកឃ្លាំមើលយល់ត្រឹមថា លោកចង់ឡើងច្រៀងឲ្យបានប្លែកភ្នែក និងចង់ផ្សព្វផ្សាយពីបទចម្រៀងដែលខ្លួនបាននិពន្ធនោះតែប៉ុណ្ណោះ ។ យ៉ាងណាក៏ដោយ ផ្ទុយពីការគិតទុក លោកបែរជាបានចូលស៊ប់ក្នុងអាជីពសិល្បៈ ទាំងការសម្ដែង និងការច្រៀងរាំ ហើយប្រឡូកកាន់តែជ្រៅនៅលើមាគ៌៌ាថ្មីមួយនេះ។ ជំហររបស់លោកត្រូវគេមើលឃើញកាន់តែច្បាស់ ក្នុងពេលដែលលោកស្រាប់តែបង្ហាញខ្លួនឡើងច្រៀងលើឆាកតន្ត្រីខេត្ត-ក្រុង ដែលបានប្រគំឡើងនៅខេត្តពោធិ៍សាត់ កាលពីថ្ងៃអាទិត្យ ទី១៦ វិច្ឆិកា កន្លងទៅថ្មីៗនេះ ។ នៅក្នុងគណនី Facebook វង្ស ណយ បានបង្ហោះពីសកម្មភាពចេញច្រៀងរបស់ខ្លួន និងបានបញ្ជាក់ថា លោកបានបោះជំហានថ្មីហើយ ក្នុងនាមជាអ្នកចម្រៀងដែលអាចរកលុយពីការលក់សំឡេង ។
កីឡាករ វង្ស ណយ បញ្ជាក់បន្ថែមទៀតថា ការច្រៀងរាំនៅក្នុងយប់នោះ គឺដើម្បីបង្វឹកខ្លួនឯងឲ្យមានអារម្មណ៍នឹងនរពិតប្រាកដ ហើយមិនភ័យនៅពេលឡើងច្រៀង ។
បទចម្រៀង២បទ ដែលលោកជ្រើសយកមកបកស្រាយនៅក្នុងកម្មវិធីប្រគំតន្ត្រីដ៏ធំនាយប់នោះ រួមមានបទ «ស្អប់» របស់លោក ខេមរៈ សិរីមន្ត និងបទ «ព្រមទាំងអាល័យ» ដោយការបង្ហើរសំនៀងរបស់លោក គឺទទួលបាននូវការទះដៃគាំទ្រយ៉ាងកងរំពង ។ ថ្វីដ្បិតតែទឹកដមសំឡេងរបស់លោកនៅមានកម្រិត ប៉ុន្តែសន្ទុះនៃការចាប់អារម្មណ៍ គឺមិនចាញ់តារាចម្រៀងដែលបានបង្ហាញវត្តមាននាយប់នោះដែលត្រូវគេស្គាល់ថា ជាអ្នកចម្រៀងមកពីផលិតកម្មផ្សេង និងជាអ្នកអាជីពក្នុងវិស័យនេះ តាំងពីយូរយារនោះប៉ុន្មានទេ ។ ការបង្ហាញខ្លួនឡើងច្រៀងជាសាធារណៈនៅខេត្តពោធិ៍សាត់នោះ លោកវង្ស ណយ ប្រាប់ថា ដើម្បីស្ទាបស្ទង់ទីផ្សារ ក៏ដូចជាចង់បន្សាំខ្លួនកុំឲ្យភ័យលើឆាកនៅពេលកាន់ក្បាលមេក្រូ ។ ទោះជាការបង្ហាញខ្លួនលើសង្វៀនប្រដាល់ដែលប្រមូលផ្ដុំមនុស្សកុះករក្លាយជារឿងសាមញ្ញរបស់លោកយូរមកហើយ ក៏ការច្រៀងរាំនៅតែថ្មី និងបានធ្វើឲ្យរូបលោកផ្ទាល់ ចេះតែចង់ភ្លេចប៉ារ៉ូលនៅពេលឡើងឆាក ។ លោកថា ការឡើងប៉ុស្តិ៍ទូរទស្សន៍បាយ័ន មិនមានអារម្មណ៍ញ័រដៃញ័រជើងកើតឡើងនោះទេ ដោយសារតែលោក គង់ វិសាល បានតម្រូវឲ្យលោកចាក់ឌីស្ក ហើយលោកគ្រាន់តែធ្វើកាយវិការនៅលើវេទិកា ។
អញ្ចឹងហើយទើបត្រូវបន្តឡើងឆាកខេត្ត-ក្រុងបែបនេះឲ្យបានច្រើន ដើម្បីបំបាត់ភាពភ័យខ្លាច ហើយងាយនឹងទទួលទីផ្សារសម្រាប់ការឡើងច្រៀងលើកក្រោយៗ។ កីឡាកររូបនេះបញ្ជាក់ថា៖ «សម្រាប់ខ្ញុំការឡើងសង្វៀនដូចជាអត់មានអីទេ ប៉ុន្តែបើច្រៀងផ្ទាល់លើឆាកទើបជារឿងពិបាក ដែលខ្ញុំយ៉ាងហោចក៏ត្រូវចំណាយពេលហ្វឹកហាត់ជាមួយការច្រៀងលើឆាកឲ្យបានកាន់តែច្រើនទៀតផងដែរ។» ។ អាជីពសម្ដែង និងចម្រៀងនឹងក្លាយជាមុខរបរថ្មី ដែលលោកប្រកាសឈោងចាប់ឲ្យបានដាច់ខាត បើទោះជាក្នុងពេលដ៏ខ្លី គឺលោកនឹងត្រូវត្រឡប់មកកាន់ការប្រដាល់វិញ ដើម្បីអាចទទួលបានការចាប់អារម្មណ៍ ។ លោកត្រូវគេឃើញបង្ហាញខ្លួនក្នុងឈុតខារ៉ាអូខេ និងការសម្ដែងមួយចំនួននាពេលចុងក្រោយ ។ ជារៀងរាល់ថ្ងៃ លោកហ្វឹកហាត់បទចម្រៀងជាច្រើន ទន្ទឹមនឹងការស្វែងរកការអញ្ជើញឲ្យខ្លួនឡើងច្រៀងតាមឆាកតន្ត្រីខេត្ត-ក្រុង និងប៉ុស្តិ៍ទូរទស្សន៍នាពេលបន្តបន្ទាប់ ។
ប្រភពពីអ្នករៀបចំកម្មវិធីបញ្ជាក់ថា ការផ្ដល់ឱកាសឲ្យ វង្ស ណយ ឡើងច្រៀងគឺដោយសារតែលោកយល់ថា កីឡាកររូបនេះល្បីឈ្មោះ ដែលពិតជាមានមនុស្សភាគច្រើន មានបំណងចង់ស្ដាប់សំឡេង បើលោកឡើងច្រៀង ។ ជាក់ស្ដែងចម្រៀង២បទ ដែល វង្ស ណយ បានបង្ហាញនៅលើវេទិកាតន្ត្រីនោះ ទោះបីមានចំណុចស្ទើរប៉ារ៉ូល និងស្ទើរតុងដោយអន្លើ ក៏ទឹកដមសំឡេងរបស់ វង្ស ណយ មានចំណុចអាចទទួលយកបាន ។ លោកនឹងផ្ដល់ឱកាសឲ្យកីឡាកររូបនេះ បានឡើងបង្ហើរសំឡេងនៅពេលបន្តបន្ទាប់ទៀត ដើម្បីឲ្យលោកឆាប់ក្លាយជាតារាចម្រៀងដែលជាអាជីពថ្មីមួយទៀត ក្នុងពេលដែលលោកក៏មិនទាន់ដាច់អាល័យពីការប្រដាល់ ។ ក្នុងពេលដ៏ខ្លី កីឡាករ វង្ស ណយ បញ្ជាក់ប្រាប់ថា លោកឈោងយកឱកាសឡើងប៉ុស្តិ៍ទូរទស្សន៍កាន់ក្បាលមេក្រូឲ្យបានកាន់តែច្រើន ដើម្បីពង្រីកកេរ្តិ៍ឈ្មោះ ។ លោកសន្យានឹងធ្វើឲ្យជោគជ័យ ទាំងការច្រៀងរាំ ទាំងការប្រដាល់ព្រមគ្នា ក្រោយពេលដែលលោកបន្ទន់ជំហរចូលរេញវិញ ៕
ចែករំលែកព័តមាននេះ