កាកបាទក្រហម​សាខា​ខេត្ត​ប៉ៃលិន​ប្រគេន​ទេយ្យវត្ថុ​ដល់​វត្ត​អត្តខាត់​៣​កន្លែង


ខេត្ត​ប៉ៃលិន ៖ ដោយ​សង្កេត​ឃើញ​ព្រះសង្ឃ ក៏​ដូច​ជាតា​ជី យាយជី ដែល​គង់ និង​ស្នាក់​នៅ ក្នុង​វត្ត​មួយ​ចំនួន​កំពុង​ទទួល​រង​ការ​ខ្វះខាត​ស្បៀងអាហារ ក៏​ដូច​ជា​ចង្ហាន់ ទើប​ក្រុមការងារ​កាកបាទក្រហមកម្ពុជា​សាខា​ខេត្ត​ប៉ៃលិន ដឹកនាំ​ដោយ​លោក​ជំទាវ បាន ស្រី​មុំ អ្នកតំណាង​រាស្ត្រ​មណ្ឌល​ប៉ៃលិន បាន​ប្រគេន​ទេយ្យវត្ថុ​ដល់​វត្ត​អត្តខាត់​ចំនួន​១​កន្លែង ក្នុង​ក្រុងប៉ៃលិន និង​វត្ត​ចំនួន​៣​កន្លែង​ផ្សេង​ទៀត​នៅ​ស្រុក​សាលា​ក្រៅ ដែល​ការ​ប្រគេន​ទេយ្យទាន​នេះ​បាន​ធ្វើ​ឡើង​កាលពី​ព្រឹក​ថ្ងៃ​ទី​២៦ ខែឧសភា ឆ្នាំ​២០២០ ។

តាម​ប្រភព​ព័ត៌មាន​បានឱ្យ​ដឹង​ថា លោក​ជំទាវ បាន ស្រី​មុំ ប្រធាន​សាខា​កាកបាទក្រហមកម្ពុជា​ខេត្ត​ប៉ៃលិន បាន​ដឹកនាំ​ក្រុមការងារ​ប្រចាំ​ក្រុង ស្រុក ដោយ​ដឹក​ជញ្ជូន​យក​ទេយ្យវត្ថុ​ទៅ​ប្រគេន​ដល់​ព្រះសង្ឃ​ដែល​គង់នៅ​ក្នុង​វត្ត​ទឹកផុស ក្នុងភូមិ​ទឹកផុស សង្កាត់​ប៉ៃលិន ក្រុងប៉ៃលិន វត្ត​កូន​ដំរី​លើ វត្ត​ភ្នំ​បាយសី និង​វត្ត​ស្រែ​អន្ទាក់ ស្ថិត​ក្នុង​ឃុំ​ស្ទឹង​ត្រង់ ស្រុក​សាលា​ក្រៅ ខេត្ត​ប៉ៃលិន ដែល​កំពុង​តែ​ជួប​នូវ​ភាព​អត្តខាត់​(​ខ្វះខាត​ស្បៀងអាហារ​) ដោយសារ​កូ​វី​ដ​១៩ កំពុង​វាយលុក​ទូ​ទាំង​ពិភពលោក ក៏​ដូច​ជា​នៅ​ក្នុង​ប្រទេស​កម្ពុជា ខណ​:​ប្រទេស​មួយ​ចំនួន​កំពុង​ប្រឈម​នឹង​ការ​រី​រាលដាល​នៃ​ការ​ឆ្លង​វីរុស​ដ៏​កាច​សាហាវ​មួយ​នេះ ហើយ​បណ្តាល​ឱ្យ​មនុស្ស​រាប់​ម៉ឺន​នាក់​បាត់បង់​ជីវិត​ផង​ដែរ ដោយឡែក​ប្រទេស​កម្ពុជា​មាន​ករណី​ឆ្លង​ជាង​១០០​នាក់ ហើយ​ក៏​ជា​សះស្បើយ​ឡើង​វិញ ដោយ​គ្មាន​ករណី​បាត់បង់​ជីវិត​នោះ​ទេ ។

ទោះបីជា​យ៉ាងណា ក្រសួងសុខាភិបាល​ក៏​ដូច​ជា​រាជរដ្ឋាភិបាល​បាន​ដាក់​វិធានការ​ឱ្យ​ប្រជាពលរដ្ឋ​ទាំងអស់​មានការ​ប្រុង​ប្រយ័ត្ន​ខ្ពស់ ដោយ​ត្រូវ​លាងដៃ​ជាមួយ​ទឹកសាប៊ូ ឬ​អាល់កុល ហើយ​ត្រូវ​ពាក់​ម៉ាស​ការពារ​ជា​ប្រចាំ​ផង​ដែរ ។

តាម​ប្រភព​ព័ត៌មាន​បាន​បញ្ជាក់​ថា ទេយ្យវត្ថុ​ដែល​ក្រុមការងារ​កាកបាទក្រហមកម្ពុជា​សាខា​ខេត្ត​ប៉ៃលិន បាន​យក​ទៅ​ប្រគេន​ព្រះសង្ឃ​ដែល​គង់នៅ​ក្នុង​មួយ​វត្ត​នីមួយ​ៗ មាន អង្ករ មី ត្រីខកំប៉ុង ទឹកត្រី ទឹក​ស៊ី​អុ​ី​វ ប្រេងឆា ទឹកបរិសុទ្ធ ទឹក​អាល់កុល ម៉ាស់ និង​ថវិកា​មួយ​ចំនួន​ផង​ដែរ ៕ (​កែសម្រួល​ដោយ ៖ ធីតា​)

ព្រឹត្តិការណ៍សង្គម

Sponsored News

ការស្ទង់មតិគេហទំព័រថ្មី




សូម​អរគុណ