ខេត្តកំពង់ឆ្នាំង ៖ បុរសម្នាក់ជាអតីតអ្នកចិញ្ចឹមមាន់នៅក្រុមហ៊ុនមួយបានសម្រេចចិត្តលាឈប់ពីការងារ ហើយបានមកបើកកសិដ្ឋានចិញ្ចឹមមាន់យកពងដោយខ្លួនឯង រហូតទទួលបានជោគជ័យ ដោយសារតែគាត់មានជំនាញស្រាប់ គួបផ្សំនឹងមានការណែនាំបណ្តុះបណ្តាលបន្ថែមពីមន្ត្រីពេទ្យសត្វបន្ថែមផង ។ ទោះបីជាយ៉ាងនេះក្តី ម្ចាស់កសិដ្ឋានរូបនោះនៅមិនហ៊ានអះអាងថាជាជោគជ័យនោះឡើយ…
ខេត្តកំពង់ឆ្នាំង ៖ បុរសម្នាក់ជាអតីតអ្នកចិញ្ចឹមមាន់នៅក្រុមហ៊ុនមួយបានសម្រេចចិត្តលាឈប់ពីការងារ ហើយបានមកបើកកសិដ្ឋានចិញ្ចឹមមាន់យកពងដោយខ្លួនឯង រហូតទទួលបានជោគជ័យ ដោយសារតែគាត់មានជំនាញស្រាប់ គួបផ្សំនឹងមានការណែនាំបណ្តុះបណ្តាលបន្ថែមពីមន្ត្រីពេទ្យសត្វបន្ថែមផង ។ ទោះបីជាយ៉ាងនេះក្តី ម្ចាស់កសិដ្ឋានរូបនោះនៅមិនហ៊ានអះអាងថាជាជោគជ័យនោះឡើយ ព្រោះការចិញ្ចឹមមាន់ដូចគាត់នៅមានហានិភ័យខ្ពស់។
លោក សី មករា អាយុ៣៧ឆ្នាំ ជាម្ចាស់កសិដ្ឋានចិញ្ចឹមមាន់យកពង មានទីលំនៅភូមិចិន ឃុំស្វាយជ្រុំ ស្រុករលាប្អៀរ បានឱ្យដឹងថា គាត់បានចាប់ផ្តើមចិញ្ចឹមមាន់យកពងនេះអស់រយៈពេលជាង២ឆ្នាំហើយ គឺក្នុងអំឡុងឆ្នាំ២០១៧ ដោយកាលណោះមានមេមាន់ត្រឹម២ពាន់ក្បាលប៉ុណ្ណោះ ។ បច្ចុប្បន្នគាត់បានពង្រីកការចិញ្ចឹមមេមាន់រហូតដល់ទៅ៧ពាន់ក្បាល ដែលអាចទទួលបានពងមាន់ក្នុងមួយថ្ងៃចំនួន៧ពាន់គ្រាប់ ។
ម្ចាស់កសិដ្ឋានខាងលើបានបន្តថា បច្ចុប្បន្នដោយសារតែមេមាន់មួយចំនួនចាប់ផ្តើមជម្រុះស្លាប ផ្អាកពង ទើបក្នុងមួយថ្ងៃគាត់ទទួលបានពងត្រឹមជាង៥ពាន់គ្រាប់ ។ ចំណែកតម្លៃទីផ្សារបោះដុំវិញ ក្នុង១គ្រាប់ គាត់លក់បានពី៣៣០រៀលទៅ៣៥០រៀល។
ម្ចាស់កសិដ្ឋានខាងលើបានបញ្ជាក់ថា ចំពោះមុខរបររបស់គាត់បានរីកចំរើនបែបនេះ មានកត្តា២យ៉ាង ទី១-គាត់ធ្លាប់ធ្វើការនោះឱ្យក្រុមហ៊ុនមួយ លុះពេលគាត់ឈប់ពីក្រុមហ៊ុននោះ ក៏បានយកចំណេះដឹងដែលបានចេះខ្លះ មកបើកកសិដ្ឋានចិញ្ជឹមមាន់ដោយខ្លួនឯង និងទី២-គឺបានទទួលការណែនាំ និងបណ្តុះបណ្តាលបន្ថែមពីមន្ត្រីជំនាញពេទ្យសត្វផងនោះ ទើបធ្វើឱ្យមុខរបររបស់គាត់មានការរីកចំរើនបែបនេះ ។ ជាចុងក្រោយគាត់សំណូមពរដល់មន្ត្រីជំនាញទប់ស្កាត់ការនាំចូលពងមាន់ ពងទាពីក្រៅប្រទេស ដើម្បីឱ្យតម្លៃទីផ្សារក្នុងស្រុកមានតម្លៃថេរដូចសព្វថ្ងៃដែលអាចទទួលយកបាន។
ជាមួយគ្នានេះ លោក ហ៊ុន លី អនុប្រធានការិយាល័យ ផលិតកម្ម និងបសុព្យាបាល នៃមន្ទីរកសិកម្ម រុក្ខាប្រម៉ាញ់និងនេសាទខេត្តកំពង់ឆ្នាំង បានបញ្ជាក់ថា ដោយបានការណែនាំពីមន្ទីរកសិកម្ម ក៏ដូចជាប្រធានការិយាល័យ បច្ចុប្បន្នមន្ត្រីជំនាញពេទ្យសត្វតែងចុះជាប្រចាំ ដើម្បីជំរុញដល់ប្រជាកសិករឱ្យគាត់ចិញ្ចឹមនិងផលិតឱ្យបានច្រើន និងត្រូវចេះជ្រើសរើសពូជ ចេះឱ្យចំណីសត្វបានត្រឹមត្រូវទៅតាមស្តង់ដា ។
លោកអនុប្រធានការិយាល័យផលិតកម្ម និងបសុព្យាបាលខេត្ត បានបញ្ជាក់បន្តថា សព្វថ្ងៃ ក្រសួងកសិកម្ម រុក្ខាប្រមាញ់និងនេសាទ ក៏ដូចជាអគ្គនាយកដ្ឋាន សុខភាពសត្វ និងចិញ្ចឹមសត្វ បាននិងកំពុងរិតបន្តឹងការនាំចូលសត្វចូលក្នុងប្រទេស ដែលនេះជាផ្នែកមួយដែលធ្វើឱ្យកសិករចិញ្ចឹមសត្វក្នុងស្រុកទទួលបានជោគជ័យផងដែរ។ ក្រៅពីនោះមន្ត្រីជំនាញនៅបានចុះអប់រំដល់កសិករចិញ្ចឹមសត្វត្រូវធ្វើអនាម័យសំអាតទ្រង់រាល់ថ្ងៃ និងការប្រើថ្នាំបាញ់សម្លាប់មេរោគជាប្រចាំ ។ កសិករចិញ្ចឹមសត្វទាំងអស់ មិនថា ចិញ្ចឹមមាន់ ជ្រូក ទា គោ ក្របីនោះទេ នៅពេលមន្ត្រីជំនាញចុះដល់ទីតាំងរបស់ពួកគាត់ម្តងៗ ពួកគាត់សប្បាយចិត្តណាស់ ព្រោះមន្ត្រីជំនាញបានផ្តល់ជាគំនិត ជាបទពិសោធន៍ បច្ចេកទេស ទៅឱ្យពួកគាត់ ហើយពេលពួកគាត់យកទៅអនុវត្តតែងទទួលបានជោគជ័យ។
តាមការបញ្ជាក់ពីលោកអនុប្រធានការិយាល័យផលិតកម្ម និងបសុព្យាបាលខេត្តបានឱ្យដឹងថា ពូជមាន់ដែលម្ចាស់កសិដ្ឋានយកមកចិញ្ចឹមសម្រាប់យកពងខាងលើ គឺបាននាំចូលពីក្រៅប្រទេស ដែលសំបកពងរបស់វាមានសភាពក្រាស់ ងាយដឹកជញ្ជូនជិតឆ្ងាយមិនងាយបែក ៕ (កែសម្រួលដោយ ៖ ធីតា)
ចែករំលែកព័តមាននេះ