ដើម្បីលើកស្ទួយផលិតកម្មដំណាំក្រូចពោធិ៍សាត់ ដែលជាដំណាំមានសក្តានុពលនៅខាងភូមិភាគពាយ័ព្យនៃប្រទេស អ្នកជំនាញកម្ពុជានៅពេលនេះ កំពុងតែធ្វើការស្រាវជ្រាវផលិតពូជដំនាំនេះ ដោយគ្មានជំងឺម្យ៉ាងគឺជំងឺស្លឹកប្រាក់ ដែលជាជំងឺរុក្ខជាតិតែងយាយីដំនាំមួយប្រភេទនេះ ។
បណ្ឌិតសភាវិទ្យាសាស្ត្រកសិកម្មកម្ពុជា បានអះអាងកាលពីថ្ងៃទី ៣០ ខែមិថុនា ឆ្នាំ២០២៦ថា ក្រូចពោធិ៍សាត់ គឺជាផ្លែឈើដ៏មានប្រជាប្រិយភាព និងមានសារៈសំខាន់ផ្នែកសេដ្ឋកិច្ចសម្រាប់កម្ពុជាប៉ុន្តែ បច្ចុប្បន្ន ចម្ការក្រូចពោធិ៍សាត់របស់កសិករជាច្រើនកំពុងរងការរាតត្បាតដោយជំងឺស្លឹកប្រាក់(Huanglongbing: HLB) ដែលបង្កឡើងដោយបាក់តេរី Candidatus Liberibacter asiaticus និងចម្លងដោយសត្វល្អិត Asian Citrus Psyllid (Diaphorina citri)។
ប្រភពដដែលបានអះអាងថា នៅពេលនេះមន្ទីរពិសោធន៍ជាតិកសិកម្ម នៃបណ្ឌិត្យសភាវិទ្យាសាស្ត្រកសិកម្មកម្ពុជា បានចាប់ផ្តើមអនុវត្តការស្រាវជ្រាវផលិតពូជក្រូចពោធិ៍សាត់គ្មានមេរោគ ដោយប្រើប្រាស់បច្ចេកទេសជាលិកាវប្បកម្ម (Tissue Culture) ក្នុងគោលបំណងផលិតកូនក្រូចដែលមានសុខភាពល្អ គ្មានជំងឺ និងមានគុណភាពខ្ពស់សម្រាប់ការដាំដុះ ។
ប្រភពដដែលបានបន្តថា ក្នុងដំណើរការស្រាវជ្រាវនេះ ការជ្រើសរើសជាលិកាពីគ្រាប់ពូជ ត្រូវបានអនុវត្តដោយយកចិត្តទុកដាក់ និងមានការសម្រិតសម្រាំងយ៉ាងម៉ត់ចត់ ព្រោះការបង្កាត់ពូជដោយលំអង (Cross-pollination) អាចបណ្តាលឱ្យមានការប្រែប្រួលលក្ខណៈហ្សែន (Genetic variation) ដែលអាចធ្វើឱ្យបាត់បង់លក្ខណៈពិសេសរបស់ពូជដើម ។
ប្រភពដដែលបានបន្ថែម ប្រសិនបើការស្រាវជ្រាវទទួលបានជោគជ័យ ស្ថាប័ននេះនឹងអាចផលិតកូនក្រូចពោធិ៍សាត់ដែលគ្មានជំងឺរក្សាបាននូវរសជាតិដើម មានគុណភាពល្អ និងផ្តល់ទិន្នផលខ្ពស់ ។
ទន្ទឹមនឹងនេះ ក្រុមអ្នកស្រាវជ្រាវក៏នឹងបន្តអភិវឌ្ឍបច្ចេកទេសដាំដុះ និងការគ្រប់គ្រងជំងឺ ដើម្បីជួយកសិករកាត់បន្ថយការរីករាលដាលនៃជំងឺ HLB និងលើកកម្ពស់ផលិតភាពដំណាំ ហើយក្នុងពេលដ៏ខ្លីខាងមុខ បណ្ឌិត្យសភាវិទ្យាសាស្ត្រកសិកម្មកម្ពុជា ក៏មានផែនការស្រាវជ្រាវ និងបង្កាត់ពូជក្រូចពោធិ៍សាត់ថ្មីដែលមានភាពធន់នឹងជំងឺ HLB តែទោះជាយ៉ាងណា ការស្រាវជ្រាវនេះត្រូវការរយៈពេលវែង ដោយត្រូវធ្វើការដាំសាកល្បង និងតាមដានការលូតលាស់ ភាពបន្សាំ និងសមត្ថភាពធន់នឹងជំងឺរបស់ពូជថ្មី មុននឹងអាចណែនាំឱ្យប្រើប្រាស់ជាផ្លូវការ៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ