ខេត្តប៉ៃលិន ៖ រហូតមកដល់ថ្ងៃទី៣១ ខែកក្កដា ឆ្នាំ២០២៦នេះ គេសង្កេតឃើញប្រជាកសិករមួយគ្រួសារ កំពុងញាប់ដៃញាប់ជើង ដោយជួលកម្មករ និងហៅម៉ាស៊ីនឱ្យមកប្រមូលផលសណ្តែកបាយ នៅក្នុងចំការរបស់ខ្លួន ដើម្បីលក់ឱ្យឈ្មួញ យកថវិកាសម្រាប់ផ្គត់ផ្គង់ជីវភាពប្រចាំថ្ងៃក្នុងក្រុមគ្រួសារ បន្ទាប់ពីបានដាំកាលពីប៉ុន្មានខែកន្លងទៅនេះ ។
ប្រភពព័ត៌មានបានឱ្យដឹងថា ម្ចាស់ចំការសណ្តែកបាយ មានឈ្មោះ អ៊ឹង ថាល់ ភេទប្រុស រស់នៅភូមិសួនអំពៅកើត សង្កាត់ប៉ៃលិន ក្រុងប៉ៃលិន ខេត្តប៉ៃលិន ដោយមានដីចំការផ្ទាល់ខ្លួនចំនួនជាង៥ហិកតា ស្ថិតនៅក្នុងភូមិខាងលើ ។
ប្រភពបន្តទៀតថា ដោយសារតែសង្កេតឃើញប្រជាពលរដ្ឋជាច្រើន គេនាំគ្នាដាំដំណាំដែលដូចៗគ្នា ដោយអ្នកខ្លះដាំពោតក្រហម ខ្លះទៀតដាំដំឡូងមី និងដាំស្វាយកែវរមៀតជាដើម ទើបលោកបែកគំនិតរកនឹកគិតថា តើគួរដាំដំណាំណា ដែលគេមិនសូវដាំច្រើន ដើម្បីងាយស្រួលរកទីផ្សារលក់ដូរឱ្យបានតម្លៃខ្ពស់ល្អប្រសើរ ទើបទិញពូជគ្រាប់សណ្តែកបាយយកមកដាំនៅលើដីរបស់ខ្លួនតែម្តង ។ លោកពិតជាបានសម្តែង នូវការរីករាយយ៉ាងខ្លាំងចំពោះផលដំណាំសណ្តែកបាយរបស់ខ្លួន ដែលនៅឆ្នាំ២០២៦នេះ គឺទទួលបានទិន្នផលខ្ពស់ ខណៈដែលផ្ទៃមេឃបានធ្លាក់ភ្លៀងជារឿយៗ ហើយរហូតមកដល់ពេលនេះ ល្មមដល់លោកត្រូវតែប្រមូលផល ដោយជួលម៉ាស៊ីនច្រូត និងកម្មករមួយចំនួន ដើម្បីប្រញាប់លក់យកថវិកាផ្គត់ជីវភាពប្រចាំថ្ងៃ ។
លោក អ៊ឹង ថាល់ ក៏បានបញ្ជាក់បន្ថែមទៀតថា ដំណាំសណ្តែកបាយរបស់ខ្លួន គឺមិនមានការថយចុះនូវទិន្នផលឡើយ គឺអាចទទួលបានប្រហាក់ប្រហែលនឹងឆ្នាំមុនៗដែរ គឺជិត១តោន ក្នុង១ហិកតា ហើយក៏ថ្លឹងលក់ឱ្យឈ្មួញបានតម្លៃប្រហែល ៣០០០រៀល ក្នុង១គីឡូក្រាម ។ លោកបានបន្ថែមទៀតថា ទាំងទិន្នផល និងតម្លៃទីផ្សារនាឆ្នាំថ្មីនេះ គឺល្អប្រសើរសម្រាប់កសិករទូទាំងខេត្តប៉ៃលិន ។
ម្យ៉ាងវិញទៀត ដំណាំសណ្តែកបាយនេះ ពិតជាផ្តល់ផលប្រយោជន៍ច្រើនទាំងផ្លែ និងដើមផងដែរ ដោយសារក្រោយពីបានផ្តល់ផលផ្លែរួចហើយ គឺដើមរបស់វាពិតជាអាចផ្តល់ជាជីជាតិដល់ដី អាចឱ្យដីធូរល្អ ដែលអាចឱ្យគាត់ដាំដំណាំផ្សេងទៀតទទួលបានទិន្នផលខ្ពស់ ៕
ចែករំលែកព័តមាននេះ