ពាក្យថាធម៌មានភ័ព្វដែលគួរប្រែជាច្រើនយ៉ាងណាស់ ប៉ុន្តែក្នុងទីនេះពុំបានវែកញែកចំពោះស័ព្ទថាធម៌នេះឱ្យបានក្បោះក្បាយទេ សូមចងវិគ្គហៈនៃធម៌ត្រឹមតែ៥បែបដូចតទៅៈ ១- សភាវៈគឺសេចក្ដីពិតណា រមែងទ្រទ្រង់នូវសត្វទាំងឡាយមិនឲ្យធ្លាក់ទៅក្នុងអបាយទាំង៤ ឬក្នុងសំសារវដ្ត សភាវៈនោះឈ្មោះថាធម៌ ។ ២-…
ពាក្យថាធម៌មានភ័ព្វដែលគួរប្រែជាច្រើនយ៉ាងណាស់ ប៉ុន្តែក្នុងទីនេះពុំបានវែកញែកចំពោះស័ព្ទថាធម៌នេះឱ្យបានក្បោះក្បាយទេ សូមចងវិគ្គហៈនៃធម៌ត្រឹមតែ៥បែបដូចតទៅៈ
១- សភាវៈគឺសេចក្ដីពិតណា រមែងទ្រទ្រង់នូវសត្វទាំងឡាយមិនឲ្យធ្លាក់ទៅក្នុងអបាយទាំង៤ ឬក្នុងសំសារវដ្ត សភាវៈនោះឈ្មោះថាធម៌ ។
២- សភាវៈណាទ្រទ្រង់ទុកនូវលក្ខណៈរបស់ខ្លួនគឺកុសលទាំង៤មានកាមាវចរកុសលជាដើម សភាវៈនោះឈ្មោះថាធម៌ ។
៣- សភាវៈណាកម្ចាត់នូវអកុសលធម៌ដ៏លាមកចេញចាកខន្ធសន្តាន សភាវៈនោះឈ្មោះថាធម៌ ។
៤- សភាវៈណាដែលព្រះអរិយៈទាំងឡាយមានព្រះសោតាបន្នបុគ្គលជាដើមតែងទ្រទ្រង់ទុក ចាំទុកក្នុងសន្តាន សភាវៈនោះហៅថាធម៌ ។
៥- សភាវៈណា ទ្រទ្រង់នូវពួកសត្វដែលប្រតិបត្តិសមគួរដល់ពាក្យប្រៀនប្រដៅ មិនឲ្យធ្លាក់ទៅក្នុងអបាយទាំង៤សភាវៈនោះឈ្មោះថាធម៌ ។
ពាក្យថាធម៌ដូចវិគ្គហៈដែលចងក្រងមកនេះមានសេចក្ដីជ្រាលជ្រៅដោយពិត ប៉ុន្តែបើតាមទីដៅរបស់ព្រះសម្មាសម្ពុទ្ធ បានដល់សេចក្ដីពិត ដែលសត្វតែងរស់នៅប្រចាំលោក ។
ពាក្យថា ធម៌ ឬ ធម្មៈនេះ បានដល់សច្ចធម៌ គឺសេចក្ដីពិត, សុចរិតធម៌ គឺការប្រព្រឹត្តល្អ, យុត្តិធម៌ គឹការប្រព្រឹត្តត្រូវ ។ មួយទៀត ការប្រតិបត្តិចំពោះច្បាប់ណាមួយដែលប្រាសចាក អគតិធម៌៤យ៉ាង មានឆន្ទាគតិជាដើម លោកហៅថាធម៌ ។
ពាក្យថា ធម៌នេះ បើទុកជាមិនមានគុណស័ព្ទជា កុសល ឬ អកុសលនៅជិតខាង ក៏បណ្ឌិតអាចយល់បានតាមដំណើរសេចក្ដីពិតដែរ ។ សាន សារិន
ចែករំលែកព័តមាននេះ