ទីបំផុត ភិក្ខុឡុង ចន្ថា មិនបានលាចាកសិក្ខាបទតាមកិច្ចសន្យានោះទេ និងបានគេចខ្លួនបាត់ស្រមោល រហូតមកដល់ពេលនេះក៏មិនទាន់មានប្រភពណាមួយអះអាងច្បាស់លាស់ពីការស្នាក់នៅរបស់ព្រះអង្គនោះឡើយ ។
តាមអ្នកឆ្លើយឆ្លងព័ត៌មានបានឱ្យដឹងថា នៅក្នុងទឹកដីខេត្តតាកែវមិនមានលេចឮពីវត្តមានរបស់ព្រះអង្គឡុង ចន្ថាទេ គឺស្ងាត់ឱ្យឈឹងតែម្តងដោយមានមតិខ្លះធ្វើការសន្និដ្ឋានថា លោកឡុង ចន្ថា ប្រហែលជាគេចខ្លួនទៅក្រៅប្រទេសបាត់ហើយ ។
ប្រភពនៅលើបណ្តាញសង្គមបានបញ្ចេញទស្សនៈបែបផ្លែផ្កាទៅឱ្យស្ថាប័នព្រះសង្ឃជាសំណួរថា ហេតុអ្វីបានជាស្ថាប័នមួយនេះចាត់ការត្រឹមតែភិក្ខុសង្ឃមួយអង្គដែលប្រព្រឹត្តខុសធម៌វិន័យមិនបានជោគជ័យ ? ដែលជាហេតុធ្វើឱ្យប៉ះពាល់ដល់កិត្តិនាមព្រះសង្ឃទូទៅយ៉ាងធ្ងន់ធ្ងរដូចទាញព្រះពុទ្ធសាសនាមិនឱ្យរុងរឿង ។
មានការកត់សម្គាល់ថា កាលពីថ្ងៃទី១៨ ឧសភាកន្លងមកនេះសម្តេចព្រះសង្ឃនាយក នន្ទ ង៉ែត បានប្រគេនមកព្រះមេគណទាំង២៥ រាជធានី-ខេត្ត តាមរយៈលិខិតមួយច្បាប់ថា «សូមព្រះមេគណទូទាំងប្រទេសកុំផ្តល់អាវាសដល់បុគ្គលរូបនេះឱ្យស្នាក់បន្តក្នុងសាសនានេះតទៅទៀត ។ ផ្ទុយទៅវិញ បើឃើញបុគ្គលរូបនេះក្នុងដែនសមត្ថកិច្ចរបស់ខ្លួន ត្រូវសហការជាមួយអាជ្ញាធរមានសមត្ថកិច្ចពាក់ព័ន្ធចាត់វិធានការឱ្យលាចាកសិក្ខាបទតាមកិច្ចសន្យារបស់ខ្លួនដែលបានធ្វើជាមួយសាលាគណខេត្តតាកែវជាកំហិត» ។
សូមបញ្ជាក់ថា ព្រះតេជគុណ ឡុង ចន្ថា ដែលគង់នៅវត្តមួយក្នុងខេត្តតាកែវ ធ្លាប់បានសន្យានៅចំពោះព្រះភក្ត្រមន្ត្រីសង្ឃក្នុងខេត្តតាកែវ ថានឹងលាចាកសិក្ខាបទនៅថ្ងៃទី១៤ ខែឧសភា កន្លងទៅនេះ បន្ទាប់ពីបែកធ្លាយសារសំឡេងឆ្លើយឆ្លងជាមួយនារីភេទក្នុងទំនាក់ទំនងស្នេហា ។
ប៉ុន្តែដល់ថ្ងៃកំណត់ថ្ងៃទី១៤ ខែឧសភា ដែលជាថ្ងៃសន្យានោះ ភិក្ខុឡុង ចន្ថា បែរជាបង្ហោះសារថា ព្រះអង្គមិនទាន់អស់និស្ស័យជាមួយព្រះពុទ្ធសាសនា ហើយក៏មិនបានលាចាកសិក្ខាបទនោះដែរ ។ មិនត្រឹមតែមិនបានលាចាកសិក្ខាបទនោះទេ ព្រះអង្គក៏បាននិមន្តចេញពីវត្ត ហើយគេចព្រះកាយបាត់ស្រមោលមកដល់បច្ចុប្បន្ន ៕ សាន សារិន
ចែករំលែកព័តមាននេះ