រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ស្រី្ដម្នាក់ជាមេការមើលការខុសត្រូវបន្ទប់ជួលក៏ត្រូវជនសង្ស័យច្របាច់.កផ្តាច់ជីវិតប្លន់យកម៉ូតូ និងលុយ ព្រមទាំងគ្រឿងអលង្ការ រួចគេចខ្លួនបាត់ ក្រោយពេលដែលបងស្រីជនរងគ្រោះត្រឡប់មកពីធ្វើការរោងចក្រវិញឆ្ងល់ក៏ហៅប្អូនជីដូនមួយបំបែកសោបន្ទប់ចូលមើលស្រាប់តែប្រទះឃើញស្រី្ដមេការជាប្អូនស្រីខ្លួនបាត់បង់ជីវិតក្នុងបន្ទប់ជួល បង្កឲ្យមានការភ្ញាក់ផ្អើលកាលពីម៉ោង៦និង៣០នាទីយប់ ថ្ងៃទី២៥ ខែឧសភា ឆ្នាំ២០២០ ស្ថិតនៅភូមិចាក់ជ្រូក សង្កាត់សំរោងក្រោម ខណ្ឌពោធិ៍សែនជ័យ ។
សេចក្តីរាយការណ៍បន្តថា ជនរងគ្រោះខាងលើឈ្មោះ អ៊ុច យ៉េន ភេទស្រី អាយុ៤៧ឆ្នាំ មុខរបរលក់ចាប់ហួយ និងមើលការខុសត្រូវបន្ទប់ជួល ស្នាក់នៅកន្លែងកើតហេតុ មានស្រុកកំណើតនៅភូមិថ្មី ឃុំកំពែង ស្រុកព្រៃកប្បាស ខេត្តតាកែវ ។ ចំណែកសម្ភារៈដែលបាត់បង់រួមមាន ៖ ១-ម៉ូតូ១គ្រឿងម៉ាកហុងដាឌ្រីម សេរីឆ្នាំ២០១៧ ពណ៌ខ្មៅ ពាក់ស្លាកលេខ ភ្នំពេញ 1DC7457, ២-កាតគ្រីម៉ូតូ និងប្រាក់មួយចំនួន, ៣-សៀវភៅដាក់ប្រាក់សន្សំនៅធនាគារ ។ ចំណែកជនសង្ស័យមិនទាន់ស្គាល់អត្តសញ្ញាណនោះទេ។
តាមការបំភ្លឺរកម្មការិនីរោងចក្រម្នាក់ឈ្មោះ អ៊ុច សារ៉ន អាយុ៣៦ឆ្នាំ ត្រូវជាប្អូនបង្កើតរបស់ជនរងគ្រោះ បានឱ្យដឹងថា មុនកើតហេតុ កាលពីម៉ោង១២ថ្ងៃត្រង់ រូបគាត់បានចេញពីបន្ទប់ទៅធ្វើការដូចរាល់ដង ដោយជនរងគ្រោះនៅក្នុងបន្ទប់ជួលតែម្នាក់ឯង លុះដល់ម៉ោង៦ល្ងាច រូបគាត់ក៏ចេញពីធ្វើការនៅរោងចក្រត្រឡប់មកដល់បន្ទប់វិញក៏ឃើញបន្ទប់ចាក់សោពីខាងក្រៅ ។
ប្អូនស្រីជនរងគ្រោះបន្តថា ពេលនោះគាត់ក៏មិនបានចាប់អារម្មណ៍អ្វីដែរ ដោយស្មានថា ជនរងគ្រោះចេញទៅទិញឥវ៉ាន់ តែគាត់មើលឃើញធុងទឹកកកនៅមុខបន្ទប់អត់ចាក់សោនោះទេ គ្រានោះគាត់មានការសង្ស័យក៏ហៅប្អូនជីដូន១ របស់គាត់មកវាយបំបែកសោបន្ទប់ ក៏ស្រាប់តែឃើញជនរងគ្រោះដេកបាត់ជីវិតទៅហើយ ទើបរាយការណ៍ប្រាប់សមត្ថកិច្ចតែម្តង។
ប្រភពដដលបន្តទៀតថា ភ្លាមៗនោះ សមត្ថកិច្ចនគរបាលប៉ុស្តិ៍ សង្កាត់សំរោងក្រោម បានចុះមកដល់ទីតាំងកន្លែងកើតហេតុ បានទាក់ទងទៅផ្នែកជំនាញព្រហ្មទណ្ឌនឹងជំនាញ ពិនិត្យកោសល្យវិច័យ ក្នុងករណីខាងលើភ្លាមៗផងដែរ ។
បើតាមជំនាញពិនិត្យកោសល្យវិច័យសពជនរងគ្រោះខាងលើ ដោយមានស្នាមជាំនៅត្រង់ថ្គាមផ្នែកខាងស្តាំ ទើបមន្ត្រីជំនាញបញ្ជាក់ថា ស្ត្រីរងគ្រោះបានបាត់បង់ជីវិតដោយសារតែការច្របាច់.ក ហើយប្លន់យកទ្រព្យសម្បត្តិ រួចគេចខ្លួនបាត់ ។
ពេលនេះសពស្ត្រីរងគ្រោះត្រូវបានសមត្ថកិច្ចធ្វើលិខិតប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណីនៅស្រុកកំណើត ។ ដោយឡែកជនសង្ស័យត្រូវបានសមត្ថកិច្ចកំពុងស៊ើងអង្កេតរកមុខសញ្ញា ដើម្បីផ្តល់ន្ទាទោសតាមច្បាប់ ៕ (កែសម្រួលដោយ ៖ បុប្ផា)
ចែករំលែកព័តមាននេះ