ខេត្តបាត់ដំបង ៖ បុរសម្នាក់ត្រូវសមត្ថកិច្ចស្រាវជ្រាវរហូតឃាត់ខ្លួនបាន កាលពីព្រឹកថ្ងៃទី២៥ ឧសភា ក្រោយពីសង្ស័យថា ជននេះបានលួចត្រាក់ទ័រគេមួយគ្រឿង យកទៅលាក់ទុកនៅផ្ទះរបស់ខ្លួន ដែលស្ថិតនៅភូមិសាលាបាឡាត់ សង្កាត់អូរម៉ាល់ ក្រុងបាត់ដំបង។
អធិការក្រុងបាត់ដំបង លោក ឆាង វណ្ណឆៃ បានឲ្យដឹងថា ជនសង្ស័យឈ្មោះ និល នី អាយុ៣៩ឆ្នាំ រស់នៅភូមិ សង្កាត់ខាងលើ ។ ជននេះ ត្រូវបានតំណាងក្រុមហ៊ុន«ហ្វូកាដាម៉ាស៊ីននើរី» គឺលោកអេង គន្ធា អាយុ៤០ឆ្នាំ ប្ដឹងចោទប្រកាន់ថា បានចូលលួចត្រាក់ទ័ររបស់ក្រុមហ៊ុនអស់មួយគ្រឿង ដែលទុកនៅក្នុងឃ្លាំងដែលមានទីតាំងនៅភូមិសាលាបាឡាត់ សង្កាត់អូរម៉ាល់ ក្រុងបាត់ដំបង កាលពីថ្ងៃទី២៣ ឧសភា។
ត្រាក់ទ័រនោះ ម៉ាកKUBUTA ពណ៌ទឹកក្រូច ស៊េរីឆ្នាំ២០១៥ ។ លោកអធិការ បានបញ្ជាក់ថា ក្រោយពីទទូលបណ្ដឹងតំណាងក្រុមហ៊ុន ខាងលើទើបមន្ត្រីជំនាញ ធ្វើការស្រាវជ្រាវរហូតឈានដល់ការឃាត់ខ្លួនបានជនសង្ស័យ ហើយដកហូតបានទាំងត្រាក់ទ័រ ដែលជននេះបានលួចយកទៅគ្របទុកនៅក្នុងផ្ទះរបស់ខ្លួន។
នៅចំពោះមុខសមត្ថកិច្ច ជនសង្ស័យឈ្មោះ និល នី បានសារភាពថា ខ្លួនបានចូលទៅលួចបើកត្រាក់ទ័រនោះចេញពីក្នុងឃ្លាំងរបស់ក្រុមហ៊ុន នៅវេលាម៉ោង១២ថ្ងៃត្រង់ ថ្ងៃទី២៣ ឧសភា ខណៈមិនឃើញមានអ្នកយាមឃ្លាំង។ ជននេះបានបញ្ជាក់ថា ក្រោយពីខ្លួនបើកចេញពីឃ្លាំង ខ្លួនបានបើកយកទៅក្របទុកនៅផ្ទះរហូត លុះនៅព្រឹកថ្ងៃទី២៥ ឧសភា ក៏ត្រូវសមត្ថកិច្ចចុះទៅដល់ឃាត់ខ្លួន និង ដកហូតត្រាក់ទ័រនោះវិញតែម្ដង។
ពាក់ព័ន្ធនឹងអំពើចោរកម្មនេះ បើតាមលោកឆាង វណ្ណឆៃ អធិការក្រុងបាត់ដំបង បានប្រាប់ថា នៅពេលជនដៃដល់ចូលទៅលួចត្រាក់ទ័រ គឺចន្លោះពេលអ្នកយាមរវល់ចេញទៅក្រោយហូបបាយ ។ ប៉ុន្តែយ៉ាងណាពេលនេះ មន្ត្រីជំនាញកំពុងសួរនាំជនសង្ស័យ ដើម្បីកសាងសំណុំរឿងបញ្ជូនទៅតុលាការហើយ៕
ចែករំលែកព័តមាននេះ