ខេត្តកំពង់ឆ្នាំង ៖ ពស់ថ្លាន់មួយក្បាលត្រូវបានប្រជាពលរដ្ឋប្រទះឃើញ កាលពេលរសៀលថ្ងៃទី២៣ ខែឧសភា ឆ្នាំ២០២០ នៅក្នុងព្រៃលិចទឹក ចំណុចក្រោយវត្តយកគន្ធរ ស្ថិតក្នុងភូមិឆ្នុកទ្រូ ឃុំឆ្នុកទ្រូ…
ខេត្តកំពង់ឆ្នាំង ៖ ពស់ថ្លាន់មួយក្បាលត្រូវបានប្រជាពលរដ្ឋប្រទះឃើញ កាលពេលរសៀលថ្ងៃទី២៣ ខែឧសភា ឆ្នាំ២០២០ នៅក្នុងព្រៃលិចទឹក ចំណុចក្រោយវត្តយកគន្ធរ ស្ថិតក្នុងភូមិឆ្នុកទ្រូ ឃុំឆ្នុកទ្រូ ស្រុកបរិបូណ៌ ខណៈដែលពស់ថ្លាន់ដ៏ធំមួយក្បាលនេះ កំពុងសម្ងំក្រាបពងក្រោមដើមឈើរលំ ។
យ៉ាងនេះក្តី នៅរសៀលថ្ងៃទី ២៤ ខែឧសភាម្សិលមិញនេះ លោក សាំង គីមស៊ន មេឃុំ ឆ្នុកទ្រូ រួម និងមន្ត្រីបរិស្ថាន និងអាជ្ញាធរភូមិឃុំផង បានចុះទៅពិនិត្យមើល និងចាត់វិធានការដោយឱ្យមានអ្នកយាមការពារក្រែងមានជនខិលខូចមកលួចចាប់យកទៅ ដើម្បីជាប្រយោជន៍ផ្ទាល់ខ្លួន ។
តាមការបញ្ជាក់ពី លោក សាំង គឹមស៊នមេឃុំឆ្នុកទ្រូ ស្រុកបរិបូណ៌ បានឲ្យដឹងថា ពស់ថ្លាន់ដែលកំពុងតែសម្ងំក្រាបពងនៅក្រោមដើមឈើរលំ នេះមានទម្ងន់ប្រមាណជិត១៥ គីឡូក្រាម និងពងពស់យ៉ាងច្រើន ដែលកំពុងតែត្រូវបានមេពស់ក្រាបពងពីលើ ។
លោកបានបញ្ជាក់ថា ដើម្បីចូលរួមអភិរក្សជាមួយមន្ត្រីបរិស្ថានលោកបានចំណាយថវិកាផ្ទាល់ខ្លួនចំនួន 55 ម៉ឺនរៀល ទៅឲ្យប្រជាពលរដ្ឋម្នាក់ឈ្មោះ អូន ដើម្បីឲ្យនៅដេកយាមការពារក្នងរយៈពេល១ខែ គឺល្មមដែលអាចពងវាញាស់ ហើយមានលទ្ទភាពវារចេញពីកន្លែងកើតហេតុនេះ ។
ដោយឡែក ប្រជាពលរដ្ឋដែលបានទៅប្រទះឃើញ និងបានថតផ្តិតរូបភាពដែរផ្ទាល់បាននិយាយថា ពស់ថ្លាន់នេះមិនតូចធម្មតាទេ គ្រាន់តែក្បាលវាធំប៉ុនកំភួនជើងមនុស្សទៅហើយ អាចមានទម្ងន់ច្រើនជាង 20 គីឡូក្រាមឯណោះ និងមានប្រវែងប្រមាណពី 4 ទៅ 5 ម៉ែត្រទៀតផង ។ ពួកគាត់ក៏សូមអបអរសាទរនូវចំណាត់ការរបស់លោកមេឃុំ ដែលបានចាប់មនុស្សយាមប្រចាំការ ទម្រាំតែពងពស់ញាស់កូននឹងមានលទ្ធភាពលូនចូលទៅក្នុងព្រៃដោយខ្លួនឯង ៕
ចែករំលែកព័តមាននេះ