នៅពេលដែលកម្ពុជារកឃើញករណីថ្មីពីរទៀតនៃកូវីដ១៩ វាគ្មានអ្វីដែលត្រូវសប្បាយទេ ។ ប៉ុន្តែនៅជាង ១៧០គីឡូម៉ែត្រពីភ្នំពេញ គឺនៅខេត្តកែប ប្រជាជនបានប្រមូលផ្តុំគ្នាយ៉ាងច្រើនមុជទឹកសមុទ្រ និងបរិភោគអាហារ សប្បាយ ជួបជុំគ្រួសារ ដើម្បីរំសាយការនឿយហត់មួយសប្តាហ៍ដោយសារការងារ ។
តើភាពផ្ទុយគ្នាពីរនេះនឹងចង្អុលបង្ហាញអ្វីសម្រាប់កម្ពុជា ?
ការរកឃើញអ្នកជំងឺកូវីដ១៩ថ្មីចំនួនពីរនាក់ថ្មីៗនេះ គឺជាសញ្ញាប្រកាសអាសន្នមួយដែលថា ជំងឺកូវីដ១៩ នៅតែអាចបង្កការគំរាមកំហែងគ្រប់ពេលដល់កម្ពុជា ។ បើសិនជាកម្ពុជាភ្លេចខ្លួនមេរោគដ៏សាហាវនេះនឹងបង្ហាញរិទ្ធហើយអុកឡុកកម្ពុជាជាថ្មី បើទោះបីជាកម្ពុជាបានជោគជ័យព្យាបាលអ្នកជំងឺ១២២នាក់ កន្លងមកបានជាសះស្បើយក្តី ។
ប៉ុន្តែក្រឡេកមើលការរស់នៅរបស់ប្រជាជនកម្ពុជាវាហាក់បីដូចជា មានភាពចន្លោះ ប្រហោងដែលងាយនឹងធ្វើអោយមានការឆ្លងរាលដាលនៃមេរោគកូវីដ១៩ ។ ការរក្សាគម្លាតមិនសូវជាអនុវត្តបានត្រឹមត្រូវនៅតាមកន្លែងជាច្រើន ហើយប្រជាជនបាននាំគ្នាចាប់ផ្តើមធ្វើដំណើរច្រើន និងទៅកាន់កន្លែងដែលមានមនុស្សច្រើន ។
រូបភាពមនុស្សប្រមូលផ្តុំនៅសមុទ្រខេត្តកែប វាបង្ហាញថា ប្រជាជនមួយចំនួនមិនខ្លាចកូវីដ១៩ ឡើយហើយពួកគេបានសប្បាយ និងប្រមូលផ្តុំគ្នាគួរអោយខ្លាច ។
នៅចំពោះស្ថានភាពដ៏ផុយស្រួយនៃការវាយលុករលកទីពីររបស់កូវីដ១៩ វាប្រហែលជា តម្រូវអោយប្រជាជនកម្ពុជាមានការប្រុងប្រយ័ត្នជាងនេះ ដើម្បីចៀសវាងការស្តាយក្រោយ ។
ប្រជាជនទាំងអស់គួរតែស្តាប់តាមការណែនាំរបស់ប្រមុខរាជរដ្ឋាភិបាល និងក្រសួងសុខាភិបាលអំពីវិធានការចាំបាច់នានា ដើម្បីកុំអោយឆ្លង និងចម្លងមេរោគកូវីដ១៩នេះ ។ នៅពេលដែលមានការរកឃើញអ្នកជំងឺកូវីដ១៩ ថ្មីចំនួនពីរនាក់ សម្តេចតេជោហ៊ុន សែនបាន អំពាវនាវជាថ្មីថា ប្រជាពលរដ្ឋត្រូវមានការយល់ដឹងខ្ពស់អំពីជំងឺឆ្លងដ៏កាចសាហាវនេះ ។ ត្រូវបង្កើន អនាម័យសុខភាពរស់នៅអោយបានល្អ គឺត្រូវពាក់ម៉ាស ឬក្រម៉ា ហើយត្រូវដុសលាងសម្អាតដៃ អោយបានស្អាតជាប្រចាំជាមួយសាប៊ូ, ទឹកអាល់កុលឬ ចឹលកម្ចាត់មេរោគ និងបាក់តេរីផ្សេងៗ ។ បើមានការសង្ស័យទៅលើអ្នកណាម្នាក់ ឬចំពោះខ្លួនឯងផ្ទាល់ សូមទូរស័ព្វមកលេខ ១១៥ ។
សម្តេចបានមានប្រសាសន៍បន្តថា សូមកុំចម្លងរោគពីយើងទៅគេ ហើយក៏កុំចម្លងរោគ ពីគេមកក្រុមគ្រួសារយើងផងដែរ ។ កន្លែងណាដែលមិនចាំបាច់ទៅ សូមកុំទៅ ជាពិសេសទីកន្លែង ដែលមានក្រុមមនុស្សច្រើន ។ សូមស្តាប់នឹងធ្វើតាមការណែនាំរបស់ក្រសួងសុខាភិបាលអោយបានជាប់ជានិច្ច ៕
ចែករំលែកព័តមាននេះ