ពេលដែលអ្នកឮពាក្យថា មហាសេដ្ឋី អ្នកប្រហែលជាមានរូបភាពមួយដែលតំណាងមហាសេដ្ឋីក្នុងគំនិតរបស់អ្នក ។ ជាទូទៅ អ្នកប្រហែលជាគិតដល់អាជីវករដែលមានរថយន្តទំនើបៗដោយមានអ្នកបើកបរឲ្យហើយ ខណៈដែលស្លៀកពាក់ស្អាតបាតជាដើម ។
ជាក់ស្តែង មហាសេដ្ឋីបែបនេះគឺពិតជាមានពិតមែនក្នុងសង្គមទូទាំងពិភពលោក ប៉ុន្តែនាយកប្រតិបត្តិ និងស្ថាបនិកក្រុមហ៊ុនថ្មីៗដែលបានក្លាយជាមហាសេដ្ឋីដែរនោះមិនមានរូបរាងដូច្នេះឡើយ ។ បច្ចុប្បន្ននេះមានមហាសេដ្ឋីជាច្រើនដែលមិនសម្របខ្លួនទៅតាមស្តង់ដារដែលសង្គមព្យាយាមដាក់លើពួកគេឡើយ ។
អ្នកប្រហែលជាធ្លាប់ឃើញការស្លៀកពាក់របស់លោកមហាសេដ្ឋី ម៉ាក ហ្សាក់កាបឺក (Mark Zuckerberg) ដែលជានាយកប្រតិបត្តិរបស់ក្រុមហ៊ុន Facebook ហើយ ។ នរណាៗក៏តែងតែឃើញលោកពាក់អាវយឺត និងខោខូវប៊យធម្មតាដែរសូម្បីតែពេលលោកទៅធ្វើការនៅក្រុមហ៊ុន ។
លោក ហ្សាក់កាបឺក ប្រៀបបានជាឧទាហរណ៍ដំបូងដែលបានបង្ហាញនូវភាពខុសគ្នារវាងមហាសេដ្ឋីថ្មីៗ និងមហាសេដ្ឋីចាស់ៗ ដោយមហាសេដ្ឋីជំនាន់ថ្មីមិនទទួលយករូបភាពមហាសេដ្ឋីជំនាន់ចាស់ឡើយ ។
ស្ថាបនិក និងនាយកប្រតិបត្តិរបស់ក្រុមហ៊ុនជោគជ័យថ្មីៗកំពុងតែប្តូរនិយមន័យនាមថាមហាសេដ្ឋីថែមទៀតផង ។ មនុស្សម្នាក់មិនចាំបាច់មានអាកប្បកិរិយាដូចមនុស្សមកពីក្រុមវណ្ណៈខ្ពស់ជាងអ្នកដទៃដើម្បីបង្ហាញថាខ្លួនជាមហាសេដ្ឋីទេ ។
លើសពីនេះទៅទៀត ពួកគេផ្តោតស្មារតីខ្លាំងណាស់លើការងាររបស់ពួកគេ និងមិនចាប់អារម្មណ៍ខ្លាំងលើតំណែង ឬថវិកាដែលមានក្នុងធនាគារទេ ។ ជាលទ្ធផល ពួកគេបានបង្កើតនូវផលិតផល ឬសេវាកម្មដែលបានផ្លាស់ប្តូរផ្នែកណាមួយនៃសេដ្ឋកិច្ច និងការរស់នៅប្រចាំថ្ងៃរបស់មនុស្សផងដែរ ដូចជាក្រុមហ៊ុន Uber ជាដើម ។
និន្នាការនេះនៅតែបន្តកើតមានឡើងជាពិសេសក្នុងចំណោមស្ថាបនិក និងអ្នកដឹកនាំអាជីវកម្មវ័យក្មេងដែលកំពុងកសាងទ្រព្យសម្បត្តិរបស់ខ្លួន ។ មហាសេដ្ឋីជំនាន់ថ្មីទាំងនេះកំពុងតែប្រើប្រាស់ជីវិតរបស់ខ្លួនទៅធ្វើការងារដែលខ្លួនជឿជាក់ ។ ពួកគេរក្សាគោលការណ៍ផ្ទាល់ខ្លួន និងប្រើគំនិតរបស់ពួកគេដើម្បីបញ្ជាក់ពីសមត្ថភាពពិតប្រាកដរបស់ខ្លួន ៕
ចែករំលែកព័តមាននេះ