ខេត្តព្រៃវែង ៖ បង្កងអូស្ត្រាលីទឹកសាប គឺជាបង្កងមួយប្រភេទ ដែលមានទីផ្សារល្អនាពេល បច្ចុប្បន្ន ហើយប្រជាពលរដ្ឋទូទៅ ក៏និយមចូលចិត្តទទួលទានផងដែរ ព្រោះវាមានសាច់ហាប់ ល្អ និងរស់ជាតិឆ្ងាញ់មិនចាញ់បង្កងទឹកសាបរបស់ខ្មែរយើងឡើយ ។
ម្ចាស់កសិដ្ឋាន បង្កងព្រៃ វែងរុងរឿង លោកពូ យុន សុផល ដែលជាមន្ត្រីរាជការចូលនិវត្តន៍មួយរូបនៅក្រុងព្រៃវែង បាន ចាប់យកអាជីពជាអ្នកចិញ្ចឹមបង្កងអូស្ត្រាលីទឹកសាបនេះ អស់រយៈពេលជិត ២ឆ្នាំមកហើយ ហើយពេលនេះគាត់កំពុងតែកាក់កបខ្លាំង ដោយសារតែបង្កងរបស់គាត់ លក់បានថ្លៃ និង សម្បូរទីផ្សារ ជួយឱ្យជីវភាពគ្រួសារគាត់បានធូរធារច្រើនណាស់ ។
លោកពូ យុន សុផល បានឱដឹងទៀតថា បង្កងអូស្ត្រាលីទឹកសាបនេះ ជាមធ្យមគេអាច លក់បានក្នុងតម្លៃ ១គីឡូក្រាម ចន្លោះពី ៣០ដុល្លារ ទៅ ៤០ដុល្លារ ទៅតាមទំហំរបស់វាតូច ឬ ធំ ប៉ុន្តែសម្រាប់កសិដ្ឋានរបស់លោកពេលនេះ គឺមិនទាន់ចិញ្ចឹមលក់ជាបង្កងសាច់នោះទេ គឺ គាត់ចិញ្ចឹមលក់ជាកូនបង្កង និងបង្កងមេពូជ ដែលកូនបង្កងក្នុង ១ក្បាលលក់បាន ២ពាន់រៀល រីឯបង្កងមេពូជក្នុង ១គូរលក់បានតម្លៃ ១០ដុល្លារ ហើយជាមធ្យមក្នុង ១ខែ គាត់អាចលក់កូន បង្កងបាន ១៥០កូន និងបង្កងមេពូជបាន ១២០ក្បាល ។ ចំណែកឯម៉ូយរបស់គាត់ដែលជាអ្នក ទិញយកទៅចិញ្ចឹមបន្ត ភាគច្រើន គឺមកពីខេត្តផ្សេងដូចជា ៖ ខេត្តរតនគិរី មណ្ឌលគិរី និងខេត្ត ក្រចេះ ជាដើម ។
ម្ចាស់កសិដ្ឋានបង្កងព្រៃវែងរុងរឿង រូបនេះបានឱ្យដឹងទៀតថា សព្វថ្ងៃនេះគាត់មិនទាន់ បានចិញ្ចឹមបង្កងជាលក្ខណៈយកសាច់លក់ផ្គត់ផ្គង់ទីផ្សារនោះទេ ក៏ប៉ុន្តែនៅពេលខាងមុខគាត់ នឹងបង្កើតអាងដើម្បីចិញ្ចឹមបង្កងសាច់សម្រាប់លក់ថែមទៀត គឺលក់ទាំងកូនបង្កង បង្កងមេពូជ និងបង្កងសាច់តែម្តង ។
លោក យុន សុផល បានបញ្ជាក់ផងដែរថា ការចិញ្ចឹមបង្កងអូស្ត្រាលីទឹកសាបនេះ គឺ មានភាពងាយស្រួលមិនពិបាកប៉ុន្មាននោះទេ ហើយសព្វថ្ងៃនេះ គឺសម្បូរទីផ្សារណាស់ ដូច្នេះ គាត់ចង់ឱ្យប្រជាពលរដ្ឋដទៃទៀត អ្នកដែលមានដីទំនេរ សូមងាកមកចាប់យកមុខរបរចិញ្ចឹម បង្កងអូស្ត្រាលីទឹកសាបដូចរូបគាត់ដែរ ព្រោះវាផ្តល់ប្រាក់ចំណូលខ្ពស់ អាចជួយឱ្យជីវភាព យើងបានធូរធារជាងមុន ។
ដោយឡែកលោក អ៊ុក សំណាង ប្រធានមន្ទីរកសិកម្ម រុក្ខាប្រម៉ាញ់ និងនេសាទ ខេត្ត ព្រៃវែងបានឲ្យដឹងថា សព្វថ្ងៃនៅខេត្តព្រៃវែង ពុំសូវមានអ្នកប្រកបរបរចិញ្ចឹមបង្កងអូស្ត្រាលី នេះទេ គឺមានតែគ្រួសារលោក យុន សុផល មួយគត់នៅភូមិ ៤ សង្កាត់កំពង់លាវ ក្រុងព្រៃវែង ដែលចាប់យកមុខរបរនេះ និងបានដំណើរការរយៈពេលជាង ១ឆ្នាំមកហើយ ឃើញថាទីផ្សារ និងការចិញ្ចឹមបង្កងរបស់គ្រួសារនេះចេះតែរលូនទៅមុខ និងរីកចម្រើនល្អណាស់ ។
លោកបានបញ្ជាក់ទៀតថា ក្នុងនាមមន្ទីរជំនាញ បើមានប្រជាពលរដ្ឋណាផ្សេងចាប់ អារម្មណ៍ចង់ចាប់យកមុខរបរចិញ្ចឹមបង្កងនេះ មន្ទីរកសិកម្មខេត្ត និងគាំទ្រ ព្រមទាំងផ្តល់មន្ត្រីជំ នាញ ចុះទៅបង្ហាត់បង្ហាញបច្ចេកទេសពីរបៀបក្នុងការចិញ្ចឹម ដល់កន្លែងតែម្តង ដើម្បីជាការ លើកទឹកចិត្តដល់ពួកគាត់ផង និងជួយឱ្យការងាររបស់ពួកគាត់ ទទួលបានជោគជ័យផងដែរ ៕
ចែករំលែកព័តមាននេះ