រាជធានីភ្នំពេញ ៖ សេចក្តីរាយការណ៍បឋមបានឲ្យដឹងថា ព្រះរាជអាជ្ញាអមសាលាដំបូងរាជធានីភ្នំពេញ បាននិងកំពុងបើកការស៊ើបសួរឈ្មួញរកស៊ីទិញ-លក់ដីនៅខេត្តកំពង់ស្ពឺចំនួន៣នាក់ ដែលជាប់ពាក់ព័ន្ធនឹងករណីឆបោកប្រាក់អ្នកដទៃចំនួន១លាន៥សែនដុល្លារអាមេរិក រឿងលក់ដីខ្យល់ជិត២០០ហិកតា នៅភូមិស្ដុកស្លាត ឃុំភ្នំតូច ស្រុកឧដុង្គ…
រាជធានីភ្នំពេញ ៖ សេចក្តីរាយការណ៍បឋមបានឲ្យដឹងថា ព្រះរាជអាជ្ញាអមសាលាដំបូងរាជធានីភ្នំពេញ បាននិងកំពុងបើកការស៊ើបសួរឈ្មួញរកស៊ីទិញ-លក់ដីនៅខេត្តកំពង់ស្ពឺចំនួន៣នាក់ ដែលជាប់ពាក់ព័ន្ធនឹងករណីឆបោកប្រាក់អ្នកដទៃចំនួន១លាន៥សែនដុល្លារអាមេរិក រឿងលក់ដីខ្យល់ជិត២០០ហិកតា នៅភូមិស្ដុកស្លាត ឃុំភ្នំតូច ស្រុកឧដុង្គ ខេត្តកំពង់ស្ពឺ ។
ជនសង្ស័យទាំង៣នាក់នេះ មានទីលំនៅនៅឃុំភ្នំតូច ស្រុកឧដុង្គ ខេត្តកំពង់ស្ពឺ និងត្រូវបាននគរបាលព្រហ្មទណ្ឌក្រសួងមហាផ្ទៃ ចាប់ឃាត់ខ្លួនកាលពីថ្ងៃទី២០ ខែឧសភា ដែលមាន ៖ ១-ឈ្មោះ រស់ សុគន្ធ ភេទប្រុស អាយុ៤០ឆ្នាំ ២-ឈ្មោះ អ៊ុង ប៊ុនថន ភេទប្រុស អាយុ៥៤ឆ្នាំ និង
៣-ឈ្មោះ ផាត់ សុខកាន ភេទស្រី អាយុ៤០ឆ្នាំ ។
ក្រោយពីចាប់ឃាត់ខ្លួន ជនសង្ស័យទាំង៣នាក់ត្រូវបានបញ្ជូនទៅសាលាដំបូងរាជធានីភ្នំពេញ នារសៀលថ្ងៃទី២១ ខែឧសភា ដែលសំណុំរឿងនេះស្ថិតនៅដៃលោកព្រះរាជអាជ្ញាអមសាលាដំបូងខេត្តបើកការស៊ើបសួរ ។
សេចក្តីរាយការណ៍បន្តថា នគរបាលព្រហ្មទណ្ឌទណ្ឌក្រសួងមហាផ្ទៃ បានឃាត់ខ្លួនជនសង្ស័យតាមពាក្យបណ្តឹងរបស់ឈ្មោះ យ៉ន សេងហាង នៅខណ្ឌពោធិ៍សែនជ័យ ។ យោងតាមពាក្យបណ្ដឹងនោះ បានបញ្ជាក់ប្រាប់សមត្ថកិច្ចថា កាលពីថ្ងៃទី៥ ខែកញ្ញា ឆ្នាំ២០១៩ រូបគាត់ (យ៉ន សេងហាង)បានធ្វើកិច្ចសន្យាស្ដីពីការទិញ-លក់ដីជាមួយឈ្មោះ រស់ សុគន្ធ និងឈ្មោះ អ៊ុង
ប៊ុនថន លើផ្ទៃដីទំហំ១៩១ហិកតា ដែលមានទីតាំងនៅភូមិស្ដុកស្លាត ឃុំភ្នំតូច ស្រុកឧដុង្គ ខេត្តកំពង់ស្ពឺ ។
បន្ទាប់ពីបានចុះកិច្ចសន្យាទិញ-លក់ដីរួចហើយ ជនរងគ្រោះបានធ្វើការទូទាត់ប្រាក់ថ្លៃទិញ
ដីឲ្យទៅឈ្មោះ រស់ សុគន្ធ និងឈ្មោះ អ៊ុង ប៊ុនថន ជាបន្ដបន្ទាប់រហូតគ្រប់ចំនួន១,៥លាន
ដុល្លារអាមេរិក ។
យោងតាមកិច្ចសន្យាខាងលើនេះ គាត់មានសិទ្ធិឈូសឆាយដើម្បីអភិវឌ្ឍន៍លើដី និងមានសិទ្ធិអាស្រ័យផល ធ្វើការពុះជាឡូត៍លក់ឬជួលជូនអតិថិជន ។ លុះដល់ពេលត្រូវការឈូសឆាយផ្ទៃដីនោះ រូបគាត់ជាជនរងគ្រោះបានទាក់ទងទៅជនសង្ស័យទាំង៣នាក់ ដើម្បីឲ្យពួកគេស្នើសុំច្បាប់អនុញ្ញាតឈូសឆាយពីរដ្ឋបាលស្រុកឧដុង្គ ស្រាប់តែពួកគេគេចវេះរហូត ។
ដោយមានការសង្ស័យ រូបគាត់បានពឹងពាក់មេធាវីធ្វើពាក្យស្នើសុំអនុញ្ញាតច្បាប់ឈូសឆាយដី ទៅរដ្ឋបាលស្រុកឧដុង្គដោយផ្ទាល់ ។ ពេលនោះខាងរដ្ឋបាលស្រុកឧដុង្គ បានឆ្លើយតបវិញថា ឯកសារពាក្យស្នើសុំកាន់កាប់ប្រើប្រាស់ដីធ្លីរបស់ឈ្មោះ អ៊ុង ប៊ុនថន និងពាក្យស្នើសុំកាន់កាប់ប្រើប្រាស់ដីធ្លីរបស់ឈ្មោះ រស់ សុគន្ធ គឺជាឯកសារក្លែងក្លាយ ដែលជាឯកសារយកមកចុះកិច្ចសន្យាទិញ-លក់ដីដើម្បីឆបោកប្រាក់អ្នកដទៃតែប៉ុណ្ណោះ ។
យោងលើការបញ្ជាក់របស់រដ្ឋបាលស្រុកយ៉ាងដូច្នោះហើយ ទើបរូបគាត់ជាជនរងគ្រោះដឹងប្រាកដថា ជនសង្ស័យទាំង៣នាក់ពិតជាមានគំនិតទុច្ចរិតឆបោកប្រាក់ ទើបគាត់ធ្វើពាក្យបណ្ដឹងដាក់ចូលទៅសមត្ថកិច្ច ដើម្បីឲ្យជួយចាត់ការតាមផ្លូវច្បាប់ ។ ក្រោយពីទទួលបានពាក្យបណ្តឹងនេះ ឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ បានចាត់ឲ្យនគរបាលការិយាល័យព្រហ្មទណ្ទណ្ឌកម្រិតធ្ងន់ ចុះស៊ើបអង្កេត និងស្រាវជ្រាវជាបន្ទាន់ ហើយទីបំ
ផុតក៏ឈានដល់ការឃាត់ខ្លួនជនសង្ស័យទាំង៣នាក់ បញ្ជូនទៅសាលាដំបូងតែម្តង ៕ (កែសម្រួលដោយ ៖ បុប្ផា)
ចែករំលែកព័តមាននេះ