ការជ្រើសរើសឱកាសដែលត្រឹមត្រូវសម្រាប់អ្នកជាកត្តាដ៏សំខាន់ក្នុងការនាំយកភាពជោគជ័យក្នុងការរកស៊ី ។ ក្រៅពីមានសមត្ថភាពក្នុងការប្រកបអាជីវកម្មទូទៅហើយ អាជីវករត្រូវតែមានសមត្ថភាពក្នុងការវិភាគឱកាសរកស៊ីផងដែរប្រសិនបើអ្នកចង់រកលុយបានកាន់តែច្រើន និងចៀសវាងការបរាជ័យ ។
ជាក់ស្តែង លើលោកនេះមិនមានរូបមន្តច្បាស់លាស់សម្រាប់ការវិភាគឱកាសរកស៊ីទេ ប៉ុន្តែក្នុងនាមជាអាជីវករ អ្នកត្រូវតែកត់ចំណាំនូវមុខសញ្ញាខាងក្រោមនេះពេលដែលពិចារណាលើឱកាសណាមួយ៖
១. អ្នករកឃើញបញ្ហាដែលមិនទាន់មានដំណោះស្រាយ
គំនិតរកស៊ីល្អៗកើតចេញពីគំនិតចង់ដោះស្រាយបញ្ហាសំខាន់ៗ ។ ឧទាហរណ៍ដូចជាសេវាដឹកជញ្ជូនសម្រាប់អ្នកលក់អនឡាញកើតចេញមកពីបញ្ហាដែលអ្នកលក់អនឡាញមិនមានពេលវេលា ឬធនធានគ្រប់គ្រាន់ក្នុងការដឹកជញ្ជូនទំនិញជូនអតិថិជនដោយផ្ទាល់ជាដើម ។
ប្រសិនបើអ្នករកបានដំណោះស្រាយសម្រាប់បញ្ហាដែលអ្នកពិតជាខ្វល់ខ្វាយពិតប្រាកដនោះ អាជីវកម្មរបស់អ្នកអាចនឹងទទួលបានការស្វាគមន៍ និងអាចចូលរួមដល់ការអភិវឌ្ឍន៍សហគមន៍បានថែមទៀត ។
២. អ្នករកឃើញគំរូអាជីវកម្មក្នុងទីផ្សារដទៃ
អាជីវករត្រូវតែតាមដានគំរូអាជីវកម្ម និងផលិតផលថ្មីៗដែលជោគជ័យក្នុងទីផ្សារដទៃដែលស្រដៀងគ្នានឹងទីផ្សាររបស់អ្នក ប៉ុន្តែនៅមិនទាន់មានវត្តមានក្នុងតំបន់របស់អ្នកនៅឡើយ ។ បន្ទាប់មក អ្នកគួរព្យាយាមរកវិធីយកវាចូលក្នុងទីផ្សារក្នុងតំបន់របស់អ្នក ។
៣. អ្នករកបានអ្វីដែលអតិថិជនកំពុងតែចង់បាន
មិនថាអ្នកកំពុងតែប្រកបអាជីវកម្ម ឬកំពុងធ្វើការពេញម៉ោងទេ បទពិសោធន៍ការងាររបស់អ្នកជាឱកាសល្អដែលជួយឲ្យអ្នកយល់ដឹងបន្ថែមពីអតិថិជន ។ មតិយោបល់របស់អតិថិជន ទម្លាប់នៃការទិញ និងសំណើរផ្សេងៗរបស់អតិថិជនអាចជួយឲ្យអ្នកយល់ដឹងពីតម្រូវការក្នុងទីផ្សារ ។
មានពេលខ្លះ អតិថិជនរបស់អ្នកស្នើសុំអ្វីដែលមិនទាន់មាន ហើយពេលខ្លះទៀតពួកគេអាចចង់បានអ្វីដែលមានស្រាប់ហើយតែល្អជាងមុន ។ ការស្តាប់មតិយោបល់ទាំងនេះនឹងជួយដល់អ្នកក្នុងការសម្រេចចិត្តលើឱកាសរកស៊ីដែលអាចផ្គត់ផ្គង់តាមតម្រូវការអតិថិជន ៕
ចែករំលែកព័តមាននេះ