សន្លឹកបៀរនយោបាយរបស់លោក សម រង្ស៊ី
- ភ្នំពេញ
ចាប់តាំងពីលោកបានបង្កើតគណបក្សនយោបាយកាលពីឆ្នាំ១៩៩៥ ដែលមានឈ្មោះថា ជាតិខ្មែរ និងក្រោយមកដូរឈ្មោះ ជាគណបក្សសម រង្ស៊ី ជីវិតនយោបាយរបស់លោក សម រង្ស៊ី មានការលិចអណ្តែតជាច្រើនដង…
ចាប់តាំងពីលោកបានបង្កើតគណបក្សនយោបាយកាលពីឆ្នាំ១៩៩៥ ដែលមានឈ្មោះថា ជាតិខ្មែរ និងក្រោយមកដូរឈ្មោះ ជាគណបក្សសម រង្ស៊ី ជីវិតនយោបាយរបស់លោក សម រង្ស៊ី មានការលិចអណ្តែតជាច្រើនដង…
ចាប់តាំងពីលោកបានបង្កើតគណបក្សនយោបាយកាលពីឆ្នាំ១៩៩៥ ដែលមានឈ្មោះថា ជាតិខ្មែរ និងក្រោយមកដូរឈ្មោះ ជាគណបក្សសម រង្ស៊ី ជីវិតនយោបាយរបស់លោក សម រង្ស៊ី មានការលិចអណ្តែតជាច្រើនដង ហើយធ្វើអោយលោកធ្វើនីរទេសទៅក្រៅ ប្រទេសជាញឹកញាប់ផងដែរ ។
ទោះបីជាលោកបានធ្លាប់មានរឿងក្តីជាច្រើនដងយ៉ាងណាក៏ដោយចុះលោក សម រង្ស៊ី ដែល ធ្លាប់ធ្វើជារដ្ឋមន្ត្រីហិរញ្ញវត្ថុផងដែរ នៅចន្លោះឆ្នាំ១៩៩៣ និង ១៩៩៤ នោះអាចទទួលបានការលើកលែងទោសពីព្រះមហារក្សត្រ ហើយវិលត្រឡប់មកធ្វើនយោបាយវិញដោយធ្វើអោយសម្ំឡេងនៃការគាំទ្រចំពោះលោកបានកើនឡើងជាប់រហូត ។
គណបក្សសមរង្ស៊ីដែលបានប្តូរឈ្មោះពីគណបក្សជាតិខ្មែរកាលពីឆ្នាំ
១៩៩៥នោះ បានទទួលអាសនះចំនួន ១៥ នៅក្នុងរដ្ឋសភា នៅក្នុងការបោះឆ្នោតឆ្នាំ១៩៩៨ ហើយ ចំនួនអាសនៈរបស់គណបក្សនេះ បានកើនឡើងរហូតដល់ចំនួន២៤ នៅក្នុងការបោះឆ្នោតឆ្នាំ២០០៣ និង ក្រោយមកទទួលបាន ២៦ អាសនៈនៅឆ្នាំ ២០០៨ ។
ចំណែក ក្នុងការបោះឆ្នោតកាលពីឆ្នាំ ២០១៣ គណបក្សសង្គ្រោះ ជាតិក្រោមការដឹកនាំរបស់លោក សម រង្ស៊ី ដែលកើតចេញពីការច្របាច់បញ្ចូលគ្នានៃគណបក្សសម រង្ស៊ី និងគណបក្សសិទ្ឋមនុស្ស របស់លោក កឹម សុខា នោះបានទទួលអាសនៈចំនួន៥៥ ក្នុងចំណោមអាសនៈ ទាំងអស់ ១២៤នៅក្នុងរដ្ឋសភា ។
វាជានិន្នាការកំណើនប្រកបដោយក្តីសង្ឃឹមមួយសម្រាប់អ្នកនយោបាយ និងអ្នកគាំទ្រខាងគណបក្សប្រឆាំង មុនពេលដែលគណបក្ស សង្គ្រោះជាតិបានត្រូវរំលាយដោយសារតែភាពជំពាក់ជំពិនផ្លូវច្បាប់នៃមេដឹកនាំគណបក្សនេះកាលពីឆ្នាំ២០១៧ ។
សូម្បីតែគណបក្សសង្គ្រោះជាតិបានរំលាយទៅហើយក្តី អ្នកនយោបាយ និងអ្នកគាំទ្រគណបក្សប្រឆាំងមួយនេះនៅតែមិនអស់ចិត្តហើយបន្តដើរតាមបន្ទាត់នយោបាយរបស់លោក សម រង្ស៊ីដោយសង្ឃឹមថា នឹងអាចមានដំណោះស្រាយវិលត្រឡប់ទៅរកភាពល្អប្រសើរវិញ ។
ប៉ុន្តែតើពេលនេះសន្លឹកបៀរបស់លោក សម រង្ស៊ី ដែលត្រូវបានធីបចោលដោយសារតែរឿងក្តីផ្លូវច្បាប់នោះនឹងអាចយកមកលេងឡើងវិញបានឬទេ ? ហើយតើអ្នកដើរតាមលោក សម រង្ស៊ី នឹងមានវាសនានយោបាយបែបណា ?
លទ្ឋភាពដែលជីវិតនយោបាយរបស់លោកអាចមានសំណាងនឹងវិលត្រឡប់មកដូចដើមវិញ គឺសឹងតែមិនមានទាល់តែសោះ ដោយសារតែអ្វីៗនឹងចំណុះទៅលើសម្តេចតេជោហ៊ុន សែន នៅក្នុងការសុំការលើកលែងទោសទៅកាន់ព្រះមហាក្សត្រ ដោយសារតែលោក សម រង្ស៊ីមានជាប់ជំពាក់ច្រើនទៅលើផ្លូវច្បាប់ ។
ក្តីសង្ឃឹមដែលសម្តេចតេជោហ៊ុនសែន នឹងស្នើទៅកាន់ព្រះមហាក្សត្រដើម្បីសុំអោយមានការលើកលែងទោសដល់លោក សម រង្ស៊ី គឺហាក់ដូចជា មិនមានទាល់តែសោះ ដោយពិចារណាទៅលើអ្វីដែលសម្តេចតេជោ ហ៊ុនសែន ធ្លាប់មានប្រសាសន៍ និងការវាយប្រហាររបស់លោកសម រង្ស៊ី មកលើសម្តេចតេជោ និងរដ្ឋាភិបាលមិនមានការដកថយ ។
សម្តេចតេជោហ៊ុនសែនបានធ្លាប់មានប្រសាសន៍ថា សម្តេចនឹងមិនធ្វើការលើកលែងទោសណាមួយដល់លោកសម រង្ស៊ីឡើយ ។
ការទន់ចិត្តរបស់នាយករដ្ឋមន្ត្រីដើម្បីឈានដល់ការលើកលែងទោសពីព្រះមហាក្សត្ររឹតតែលែងមានទៀត បន្ទាប់ពីសហភាព អឺរ៉ុបបាន សម្រេចព្យួរមួយផ្នែកការលើកលែងពន្ឋសម្រាប់ទំនិញកម្ពុជាទៅកាន់ទីផ្សារអឺរ៉ុបដោយធ្វើអោយសេដ្ឋកិច្ចកម្ពុជាកាន់តែរងផលប៉ះពាល់ហើយតម្រូវអោយរដ្ឋាភិបាលចាត់វិធានការជាច្រើនដើម្បីបន្ថយផលប៉ះពាល់នោះ ។
លោក សម រង្ស៊ីត្រូវបានបន្ទោសដោយ គណបក្សកាន់អំណាច និងសម្តេចតេជោហ៊ុនសែនថាបានធ្វើយុទ្ឋនាការដើម្បីឈានដល់ការសម្រេចចិត្តរបស់សហភាពអឺរ៉ុបដែលនាំអោយ ខាតបង់ដល់ ផលប្រយោជន៍សម្រាប់កម្ពុជា ។
ទន្ទឹមពេលជាមួយគ្នានោះ ជំហរនយោបាយប្រឆាំងយ៉ាងស្រួចស្រាវរបស់លោកសម រង្ស៊ីប្រឆាំងនឹងសម្តេចតេជោហ៊ុន សែនបាននៅតែបន្តមានដោយមិនមានការបង្ហាញការថយក្រោយណាមួយឡើយ ។ លោក សម រង្ស៊ីដែលជាអ្នកនយោបាយរិះគន់មិនសំចែមាត់នោះបានវាយប្រហារទៅលើរដ្ឋាភិបាលកម្ពុជា និងសម្តេចតេជោហ៊ុនសែនតាមរយៈហ្វេសប៊ុកផេករបស់លោក និងការផ្តល់សម្ភាសន៍ដល់កាសែត និងវិទ្យុបរទេស។
ដោយពិចារណាទៅលើទិដ្ឋភាពទាំងអស់នេះ គេពិបាកនឹង សម្លឹងឃើញតម្រុយណាមួយដែលថាលោក សម រង្ស៊ីនឹងអាចធ្វើអោយ ជីវិតនយោបាយរបស់លោកបានរស់រវើកឡើងវិញណាស់ ។ លោក សម រង្ស៊ីខ្លួនឯងក៏ហាក់ដូចជា បានរៀបចំយុទ្ឋសាស្ត្រចាកចេញពីឆាកនយោបាយផងដែរនៅពេលដែលលោកបានប្រាប់វិទ្យុបរទេសមួយថា លោកចង់អោយមានការធ្វើច្បាប់មួយដែលថាអ្នកនយោបាយនិងអ្នកដឹកនាំគួរមានក្រោម៧០ឆ្នាំ ខណៈដែលរូបលោកផ្ទាល់មានអាយុ៧១ ឆ្នាំទៅហើយ ។
នៅពេលដែលសន្លឹកបៀរនយោបាយរបស់លោកមិនអាចលើកយកមកលេងឡើងវិញក្នុងល្បែងនយោបាយនោះ វានឹងមានផលប៉ះពាល់ មិនត្រឹមតែជីវិតនយោបាយរបស់លោកផ្ទាល់ឡើយ វាក៏នឹងមានផល ប៉ះពាល់ផងដែរចំពោះជីវិតនយោបាយរបស់អ្នកគាំទ្រលោកយ៉ាងស្មោះស្ម័គ្រនោះ។
ដូច្នេះ អ្នកនយោបាយដែលស្មោះត្រង់នឹង លោកសមរង្ស៊ីមិនងាករេហើយខ្វះភាពបត់បែនអាចនឹងប្រឈមមុខនឹងអនាគតមួយដែលងងឹតជាជាងភ្លឺស្វាង ៕
ចែករំលែកព័តមាននេះ