រាជធានីភ្នំពេញ ៖ សេចក្តីព្រាងគោលនយោបាយនេះ មានគោលបំណងបញ្ចប់ការបោសសម្អាតតំបន់ ដែលដឹងថា មានមីន និងគ្រាប់បែកចង្កោម កាត់បន្ថយតំបន់សំណល់ជាតិផ្ទុះពីសង្គ្រាមផ្សេងទៀត និងគាំទ្រកិច្ចសង្គ្រោះជនរងគ្រោះ ប្រកបដោយចីរភាពនិងបរិយាបន្ន…
រាជធានីភ្នំពេញ ៖ សេចក្តីព្រាងគោលនយោបាយនេះ មានគោលបំណងបញ្ចប់ការបោសសម្អាតតំបន់ ដែលដឹងថា មានមីន និងគ្រាប់បែកចង្កោម កាត់បន្ថយតំបន់សំណល់ជាតិផ្ទុះពីសង្គ្រាមផ្សេងទៀត និងគាំទ្រកិច្ចសង្គ្រោះជនរងគ្រោះ ប្រកបដោយចីរភាពនិងបរិយាបន្ន ដើម្បីរួមចំណែកដល់ការអភិវឌ្ឍសេដ្ឋកិច្ច សង្គម និងលើកកម្ពស់កិត្យានុភាពកម្ពុជាលើឆាកអន្តរជាតិ ។
សេចក្តីព្រាងគោលនយោបាយនេះ មានគោលដៅចំនួន ៦ រួមមាន ៖ ១).រំដោះផ្ទៃដីដែលដឹងថាមានមីនទាំងអស់ត្រឹមឆ្នាំ២០៣០ និងផ្ទៃដីដែលដឹងថាមានគ្រាប់បែកចង្កោមទាំងអស់ និងផ្ទៃដីអាទិភាពដែលមានសំណល់ជាតិផ្ទុះពីសង្គ្រាមត្រឹមឆ្នាំ២០៣៥ ២).កសាងសមត្ថភាពនិងបង្កើតក្របខ័ណ្ឌជាតិប្រកបដោយចីរភាព ដើម្បីគ្រប់គ្រងសំណល់យុទ្ធភណ្ឌគ្រឿងផ្ទុះដែលនៅសេសសល់ ៣).ផ្តល់ការអប់រំអំពីគ្រោះថ្នាក់ដោយសារ យុទ្ធភណ្ឌគ្រឿងផ្ទុះប្រកបដោយប្រសិទ្ធភាព ឆ្លើយតបទៅនឹងការផ្លាស់ប្តូរនៃតម្រូវការនិងបរិបទ ៤).ផ្តល់សេវាកម្មនិងជំនួយឱ្យបានទូលំទូលាយប្រកបដោយប្រសិទ្ធភាព ជូនដល់ជនរងគ្រោះដោយសារយុទ្ធភណ្ឌគ្រឿងផ្ទុះ ៥).លើកកម្ពស់កិច្ចសហប្រតិបត្តិការនិងជំនួយអន្តរជាតិក្នុងសកម្មភាពមីនប្រកបដោយប្រសិទ្ធភាព និង ៦).ធានាថា សកម្មភាពមីនឆ្លើយតបបញ្ហាអន្តរវិស័យ និងប្រើប្រាស់កត្តាជំរុញឱ្យប្រសើរឡើង ។
សេចក្តីព្រាងគោលនយោបាយនេះ ត្រូវបានរៀបចំឡើងបន្តពីផែនការយុទ្ធសាស្ត្រជាតិសកម្មភាពមីន ២០១៨-២០២៥ ដែលកម្ពុជាអនុវត្តបានយ៉ាងពេញលេញ និងដោយជោគជ័យ។ សេចក្តីព្រាងនេះ គឺជាផែនទីបង្ហាញផ្លូវសម្រាប់តម្រង់ទិសក្នុងការរៀបចំផែនការសកម្មភាពនិងយុទ្ធសាស្ត្រនានា នៃវិស័យសកម្មភាពមីនឱ្យល្អប្រសើរឡើង និងត្រៀមលក្ខណៈសម្រាប់ដំណាក់កាលគ្រប់គ្រងហានិភ័យដែលនៅសេសសល់នៃសំណល់ជាតិផ្ទុះពីសង្គ្រាម ក្រោយបញ្ចប់ការបោសសម្អាតមីន និងគ្រាប់បែកចង្កោមទូទាំងប្រទេស។ ទន្ទឹមនេះ សេចក្តីព្រាងនេះ បានតម្រង់ចក្ខុវិស័យយ៉ាងមុតស្រួចដោយឈរលើការគិតគូរគ្រប់ជ្រុងជ្រោយដើម្បីឱ្យ «ប្រទេសកម្ពុជារួចផុតពីផលប៉ះពាល់នៃយុទ្ធភណ្ឌគ្រឿងផ្ទុះ ធ្វើឱ្យជីវភាពរស់នៅប្រកបដោយចីរភាព ជំរុញសន្តិភាព ស្ថិរភាព និងការអភិវឌ្ឍ» ៕
ចែករំលែកព័តមាននេះ