រាជធានីភ្នំពេញ ៖ ទាក់ទិននឹងជំនួបទ្វេភាគីរវាងលោកកឹម សុខា ជាមួយសម្តេចតេជោ ហ៊ុនសែន កាលពេលកន្លងមកនេះមិនអាចឈានដល់ការដោះលែង ឬមួយលុបចោលការអនុវត្តច្បាប់នោះទេ ។ នេះបើតាមអ្នកនាំពាក្យគណបក្សប្រជាជនកម្ពុជា ។
លោកសុខ ឥសាន អ្នកនាំពាក្យគណបក្សប្រជាជនកម្ពុជាបានឲ្យកោះសន្តិភាពដឹងនៅថ្ងៃរសៀល ថ្ងៃទី១១ ខែឧសភា តាមទូរស័ព្ទថា ការជួបគ្នារវាងសម្តេចតេជោ ជាមួយលោក កឹម សុខា គឺមិនមែនជារឿងនយោបាយនោះទេ គឺគ្រាន់តែជាមនោសញ្ចេតនាដែលលោក កឹម សុខា អញ្ជើញទៅគោរពវិញ្ញាណក្ខន្ធឧបាសិកាដែលជាម្តាយក្មេកសម្តេចតេជោ ហ៊ុន សែន ។
លោកបញ្ជាក់ថា ៖«យើងឃើញថា ពិធីបានបញ្ចប់៣ ឬ៤ថ្ងៃហើយ គ្មានប្រែប្រួលនោះទេ តែវាគ្រាន់តែបង្ហាញពីមនោសញ្ចេតនា ក្នុងការរួមចំណែកមរណទុក្ខប៉ុណ្ណោះទេ» ។ យ៉ាងណាក្តីអ្នកនាំពាក្យគណបក្សប្រជាជនកម្ពុជាបានអះអាងការជួបគ្នារវាងសម្តេច និងលោក កឹម សុខា ក៏ជាការល្អ ព្រោះថា សម្តេចតេជោ មិនចាត់ទុកលោកកឹម សុខា ដែលជាមេដឹកនាំបក្សប្រឆាំងជាខ្មាំងសត្រូវនោះទេ ។ ក៏ប៉ុន្តែមិនអាចយកការជួប ដើម្បីដោះលែង ឬមួយលុបចោលការអនុវត្តផ្លូវច្បាប់នោះទេ ។ អ្នកដែលធ្វើខុសច្បាប់ត្រូវទទួលខុសត្រូវចំពោះមុខច្បាប់ដដែលព្រោះថាយើងបានប្រកាសថា ប្រទេសកាន់លទ្ធិប្រជាធិបតេយ្យ និងនីតិរដ្ឋរួចហើយ ។
ក្រោយសំណួររសួរថា តើលោក កឹម សុខា អាចនឹងត្រូវបានលើកលែងទោស ឬទេ នៅពេលសាលាឧទ្ធរណ៍បើកសវនាការនៅពេលខាងមុខនេះ ?
លោកសុខ ឥសានបានបញ្ជាក់ថា ៖«ខ្ញុំយល់ថា លោក កឹម សុខា មិនទាន់ក្លាយជាទណ្ឌិត ឬអ្នកទោសនោះទេ ព្រោះតុលាការមិនវិនិច្ឆ័យ ឬកាត់ក្តីឲ្យជាប់គុកប៉ុន្មានឆ្នាំឯណា ? អីញ្ចឹងគាត់មិនមែនទណ្ឌិតនោះទេ ហើយការលើកលែងទោសត្រូវទូលថ្វាយទៅព្រះមហាក្សត្រ ដើម្បីលើកលែង ឬបន្ធូរបន្ថយមានករណីទណ្ឌិតនោះទេ ។ ដូច្នេះមនុស្សមិនទាន់មានទោសផងយើងលើកលែងទោសយ៉ាងម៉េចកើត?» ។
លោកបន្ថែមថា ករណីលោក កឹម សុខា បានកំពុងស្ថិតក្នុងដៃតុលាការធ្វើតាមនីតិវិធីនៅឡើយ ដូច្នេះយើងមិនអាចសន្និដ្ឋានបានមុននោះទេ ។ យើងរងចាំមើលលទ្ធផលរបស់តុលាការក្នុងការអនុវត្តនីតិវិធីសួរឆ្លើយនោះយើងនឹងដឹងហើយ ។
លោកស្រីម៉េង សុធារីមេធាវីការពាក្តីឲ្យលោក កឹម សុខា បានលោកស្រីក៏បានចូលរួមពិធីបុណ្យសពម្តាយក្មេកសម្តេចតេជោ ហ៊ុន សែន នាជាមួយលោក កឹម សុខាដែរ ។ ពេលនោះលោកស្រីបានអង្គុយឆ្ងាយពីកន្លែងជំនួបរវាងសម្តេច តេជោ និងលោកកឹម សុខា ដោយជាហេតុមិនអាចស្តាប់លឺការជជែកគ្នាពិភាក្សារវាងសម្តេច តេជោ និងលោកកឹម សុខានោះទេ ព្រមទាំងមានសំឡេងមេក្រូទៀតផង ។
យ៉ាងណាក្តីលោកស្រី មេធាវីក៏បញ្ជាក់ថា ៖«ដូចអ្វីដែលខ្ញុំធ្លាប់ប្រាប់ អ្នកសារព័ត៌មានផ្សេងៗអីញ្ចឹងដែរ គឺនៅក្នុងអំឡុងពេលនេះ ដោយសារមានសំឡេងបុណ្យផង ហើយខ្ញុំអង្គុយរាងឆ្ងាយគឺខ្ញុំមិនអាចស្តាយ ឮរវាងការសន្ទនារវាងសម្តេចតេជោ និងលោកកឹម សុខាទេ ប៉ុន្តែអ្វីដែលខ្ញុំដឹងពីគោលបំណងលោក កឹម សុខាទៅ គឺដើម្បីគោរពវិញ្ញាណក្ខន្ធសពឧបាសិកាដែលជាម្តាយក្មេករបស់សម្តេចតេជោ ហើយក៏ដូចជាចូលរួមរំលែកនូវមរណទុក្ខរបស់ក្រុមគ្រួសាររបស់សម្តេចផង និងការសួរសុខទុក្ខផង» ។
ទោះបីជាសួនាំពាក់ព័ន្ធថា លោកទាំងពីរមានជជែកគ្នារឿងបញ្ហានយោបាយឬទេ ? អ្នកស្រី មេធាវីបានអះអាងអ្នកស្រីមិនអាចសន្និដ្ឋានបាននោះទេ ព្រោះអ្នកស្រីស្តាប់មិនឮ ប៉ុន្តែក្នុងនាមជាមេធាវី អ្នកស្រីស្វាគមន៍ចំពោះជំនួបរវាងសម្តេច តេជោ និងលោកកឹម សុខា នាពេលកន្លងមកក៏ដូចជា ពេលអនាគត់ផងដែរ ។
សូមរំលឹកថា នៅល្ងាចថ្ងៃទី០៥ ខែឧសភា ឆ្នាំ២០២០កន្លងទៅថ្មីនេះ លោក កឹម សុខា អតីតប្រធាន អតីតគណបក្សសង្គ្រោះជាតិ បានដឹកនាំសមាជិករបស់លោកមួយចំនួនចូលគោរពវិញ្ញាណក្ខន្ធ អ្នកឧកញ៉ា ព្រឹទ្ធមហាឧ បាសិកា ធម្មញ្ញាណវិវឌ្ឍនា ប៊ុន ស៊ាងលី ដែលត្រូវជាមាតាបង្កើតសម្តេចកិត្តិព្រឹទ្ធបណ្ឌិត និងជាមាតាក្មេកសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅភូមិគ្រឹះសម្តេចតេជោ ។
ក្រោយពីគោរពវិញ្ញណក្ខន្ធរួចហើយ សម្តេច តេជោ និងលោកកឹម សុខាបានជួបសន្ទនាគ្នាអស់រយៈពេលប្រមាណ៥០នាទី ប៉ុន្តែជំនួបនោះត្រូវគេដឹងថាជជែកអំពីអ្វីខ្លះនោះទេ៕
ចែករំលែកព័តមាននេះ