ខេត្តសៀមរាប ៖ នៅរសៀលថ្ងៃទី៨ ខែ ឧសភា ឆ្នាំ ២០២០ ក្រុមការងារជួសជុលប្រាសាទកណ្តាលស្រះស្រង់ បានប្រទះឃើញចម្លាក់អណ្តើកចំនួន១បន្ថែមទៀត ដែលមានទំហំតូចជាងមុនបន្តិច…
ខេត្តសៀមរាប ៖ នៅរសៀលថ្ងៃទី៨ ខែ ឧសភា ឆ្នាំ ២០២០ ក្រុមការងារជួសជុលប្រាសាទកណ្តាលស្រះស្រង់ បានប្រទះឃើញចម្លាក់អណ្តើកចំនួន១បន្ថែមទៀត ដែលមានទំហំតូចជាងមុនបន្តិច រួមនឹងត្រីសូល៍ចំនួន២ ដែល១មានរូបពេញលេញ និងមួយទៀតមានត្រឹមមួយបំណែក។
បើតាមការបញ្ជាក់ពីក្រុមការងារបុរាណវិទូ កំពុងកំណាយស្រាវជ្រាវនៃអាជ្ញាធរជាតិអប្សរាប្រាប់ថា នៅជិតក្បាលចម្លាក់អណ្តើក ដែលក្រុមការងារយើងបានប្រទះឃើញនោះ មានគ្រាប់ខ្វាត ពណ៌ស (គ្រីស្តាល់?) បង្កប់ក្នុងដីផងដែរ។
សូមបញ្ជាក់ថា គ្រាប់ខ្វាតពណ៌ស (គ្រីស្តាល់?) នេះ ត្រូវបានមជ្ឍដ្ឋានមួយចំនួនយល់ច្រឡំថា ជាគ្រាប់ពេជ្រ ឬជារបស់មានតម្លៃផ្សេង ប៉ុន្តែគ្រាប់ខ្វាតពណ៌ស (គ្រីស្តាល់?) នេះ គឺត្រូវបានរកឃើញភាគច្រើននៅក្នុងរណ្តៅកំណាយស្រាវជ្រាវនៃការដ្ឋានជួសជុលនានា។
សូមរំលឹកថា កាលពីថ្ងៃទី៦ ខែឧសភា ឆ្នាំ២០២០ គេបានប្រទះឃើញចម្លាក់អណ្តើកចំនួន១ និងថ្ងៃទី៤ ខែឧសភា ឆ្នាំ២០២០ ក៏បានប្រទះឃើញវត្ថុបុរាណចំនួន៣ប្រភេទ គឺចម្លាក់នាគ ខ្វាតពណ៌ ស (គ្រីស្តាល់?) និងត្រីសូល៍។ ក្នុងនោះដែរ ក្រុមការងារក៏បានរកឃើញរចនាសម្ព័ន្ធសំណង់ឈើនៅលើខឿនប្រាសាទផងដែរ៕ (កែសម្រួលដោយ ៖ បុប្ផា)
ចែករំលែកព័តមាននេះ