ខេត្តកំពង់ស្ពឺ ៖ ស្លាកយីហោផ្ទះលក់បាយមួយកន្លែងឈ្មោះ «ផ្ទះអ្នកផឹក» កំពុងត្រូវបានធ្វើឲ្យមហាជនមានការចាប់អារម្មណ៍ និងសរសើរថា អ្នកលក់បាយ បបរ គុយទាវ លក់ស្រាថ្នាំ…
ខេត្តកំពង់ស្ពឺ ៖ ស្លាកយីហោផ្ទះលក់បាយមួយកន្លែងឈ្មោះ «ផ្ទះអ្នកផឹក» កំពុងត្រូវបានធ្វើឲ្យមហាជនមានការចាប់អារម្មណ៍ និងសរសើរថា អ្នកលក់បាយ បបរ គុយទាវ លក់ស្រាថ្នាំ និងគ្រឿងក្លែមខ្នាតតូចមួយនេះ ចេះរកនឹកឃើញអំពីការរៀបចំពាក្យពេចន៍ និងខ្លឹមសារនៅក្នុងស្លាកយីហោនោះបានល្អ ថ្វីដ្បិតតែមិនល្អណាស់ណា ប៉ុន្តែប្លែកពីគេឯង ។
អ្នកដែលបានឃើញស្លាកយីហោខាងលើនោះមួយចំនួនបានលើកឡើងថា អក្សរ២បន្ទាត់ខាងក្រោមបានបង្កប់នូវអត្ថន័យអប់រំមួយដល់អ្នកផឹកសុីដូចជាពាក្យថា «ផឹកស្រាច្រៀងរាំមួយឆាកជីវិតមានប៉ុន្មានដង»និងពាក្យថា «មុននឹងពិសាស្រា សូមគិតដល់ប្រពន្ធនិងកូនជាមុនសិន»ជាដើម ។ ប៉ុន្តែទន្ទឹមនឹងនេះក៏មានអ្នកមួយចំនួន គ្រាន់តែក្រឡេកឃើញពាក្យខាងលើ ដែលគេដាក់ថា «ផ្ទះអ្នកផឹក»ក៏បានការរិះគន់ថា មិនសមរម្យតែម្ដង ដោយពួកគាត់មិនបានមើលនូវអត្ថន័យអប់រំនៅពីខាងក្រោមឡើយ។
ផ្ទះលក់បាយ យីហោ «ផ្ទះអ្នកផឹក» ខាងលើនោះមានទីតាំងស្ថិតនៅតាមបណ្ដោយផ្លូវលេខ១៤៥ ក្នុងភូមិត្រពាំងជ្រៃ ឃុំព្រៃវិហារ ស្រុកគងពិសី ខេត្តកំពង់ស្ពឺ ។ ចំណែកម្ចាស់ផ្ទះខាងលើឈ្មោះ នាង សែត អាយុ៣០ឆ្នាំ ត្រូវជាប្តី និងប្រពន្ធឈ្មោះ ប៊ុន សុខឡា អាយុ៣៣ឆ្នាំ ពួកគាត់មានមុខរបរលក់បាយ បបរ គុយទាវ ស្រាថ្នាំនិងគ្រឿងក្លែម និងមានកូនម្នាក់នៅក្នុងបន្ទុកគ្រួសារ។
បើសិនលោកអ្នកធ្វើដំណើរតាមផ្លូវលេខ៤១ ចេញពីផ្សារថ្នល់ទទឹងក្នុងស្រុកអង្គស្នួល ខេត្តកណ្ដាល ព្រំប្រទល់ស្រុកសំរោងទង ខេត្តកំពង់ស្ពឺ ទៅដល់ផ្សារស្លាបលែង ហើយបត់ឆ្វេងតាមផ្លូវលេខ១៤៥ ចម្ងាយប្រហែល៦ទៅ៧គីឡូម៉ែត្រ និងបានឃើញផ្ទះលក់បាយដែលមានដាក់ស្លាកយីហោ «ផ្ទះអ្នកផឹក»នោះ ស្ថិតនៅខាងឆ្វេងដៃជាមិនខាន ។
នៅខាងក្រោមស្លាកយីហោដែលមានពាក្យ «ផ្ទះអ្នកផឹក»នោះ ក៏មានសរសេរអក្សរចំនួន៦បន្ទាត់ផ្សេងទៀតដែរ ក្នុងនោះយើងឃើញបន្ទាត់ទី១-បានសរសេរថា មានលក់ស្រាថ្នាំគ្រប់ប្រភេទ, បន្ទាត់ទី២-បានសរសេរថា ពេលព្រឹក-លក់បាយ គុយទាវ និងបបរ, បន្ទាត់ទី៣-សរសេរថា ថ្ងៃត្រង់លក់-បាយសម្លរ,បន្ទាត់ទី៤-សរសេថា ពេលល្ងាចលក់-បាយសម្លរ និងគ្រឿងក្លែម បន្ទាប់មកមានដាក់លេខទូរស័ព្ទ២ខ្សែនៅពីក្រោម, បន្ទាត់ទី៥-សរសេរថា ផឹកស្រាច្រៀងរាំមួយឆាកជីវិតមានប៉ុន្មានដង និងបន្ទាត់ទី៦-បានសរសេរថា មុននិងពិសាស្រា សូមគិតដល់ប្រពន្ធនិងកូនជាមុនសិន។
ប៉ុន្តែប្រសិនបើលោកអ្នកធ្វើដំណើរទៅតាមផ្លូវជាតិលេខ៣វិញ ចេញពីចំណុចរង្វង់មូលថ្នល់បំបែកចោមចៅ ស្ថិតក្នុងសង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ទៅដល់ផ្សារស័ង្កសី ក្នុងខេត្តតាកែវ រួចបត់ស្ដាំដៃចូលទៅតាមផ្លូវលេខ១៤៥ដូចគ្នា មានចម្ងាយប្រហែល៥ទៅ៦គីឡូម៉ែត្រនោះ លោកអ្នកនិងបានទៅដល់មិត្រពាំងជ្រៃ ឃុំព្រៃវិហារ ស្រុកពងពិសី ហើយបានឃើញស្លាកយីហោនេះនៅខាងស្ដាំដៃជាក់ជាមិនខានឡើយ។
លោក នាង សែត ជាម្ចាស់ផ្ទះលក់បាយ យីហោ «ផ្ទះអ្នកផឹក» ខាងលើបានរៀបរាប់ប្រាប់ថា គាត់និងប្រពន្ធបានប្រកបរបរលក់បាយ បបរ គុយទាវ ស្រាថ្នាំ និងគ្រឿងក្លែមខ្នាតតូចមួយនេះរយៈពេល២ឆ្នាំមកហើយ ប៉ុន្តែទើបតែលើកស្លាកយីហោខាងលើនេះបានរយៈពេល៦ខែតែប៉ុណ្ណោះ ហើយឈ្មោះកន្លែងលក់បាយ និងពាក្យពេចន៍ដទៃៗទៀតនៅក្នុងស្លាកនេះ គឺគាត់ជាអ្នករៀបចំធ្វើឡើងដោយគំនិតខ្លួនឯង ហើយគំនិតនេះ បន្ទាប់ពីគាត់មើលឃើញអ្នកភូមិតែងប្រមូលផ្ដុំគ្នាផឹកស្រាថ្នាំ ទើបគាត់មានបំណងធ្វើអ្វីឲ្យប្លែក និងទទួលបានការចាប់អារម្មណ៍ពីអតិថិជនទូទៅផង ហើយក៏ដើម្បីជាការអប់រំដល់បងប្អូនដែលនិយមផឹកស្រាទាំងនោះផងដែរ កុំឲ្យពួកគាត់ផឹករហូតភ្លេចធ្វើការងារផ្ទះ បញ្ចៀសនូវគ្រោះថ្នាក់ផ្សេងៗ ជាពិសេសភ្លេចគិតពីប្រពន្ធកូនដែលនៅចាំឯផ្ទះជាដើម។
បុរសជាម្ចាស់ផ្ទះលក់បាយខាងលើបានបន្តថា ជាងនេះទៀត ថ្វីដ្បិតតែដាក់ឈ្មោះថា«ផ្ទះអ្នកផឹក»ក៏ពិតមែន ប៉ុន្តែការលក់ដូរ រាល់ថ្ងៃសំខាន់បំផុតគឺផ្ដោតទៅលើការលក់បាយ គុយទាវ និងបបរជាធំទៅវិញទេ ហើយក៏មានអ្នកខ្លះពេលដែលបានមើលស្លាកយីហោនោះពីដើមដល់ចប់បានសរសើរថា គាត់ចេះមានគំនិតច្នៃប្រឌិតសរសេរសារអប់រំដល់អ្នកផឹក ប៉ុន្តែទន្ទឹមនឹងនេះក៏មានអ្នកខ្លះទៀតធ្វើការរិះគន់ថាមិនសមរម្យផងដែរ ដោយពួកគាត់ទាំងនោះមិនបានមើលនូវអត្ថន័យអប់រំខាងក្រោមឡើយ គ្រាន់តែឃើញសរសេរថា ផ្ទះអ្នកផឹក ក៏រិះគន់ភ្លាមតែម្ដង។
បុរសជាម្ចាស់ផ្ទះលក់បាយខាងលើបានបញ្ជាក់បន្ថែមថា ចំណែកស្រាថ្នាំដែលគាត់លក់មានច្រើនមុខដូចជាស្រាថ្នាំសសៃខ្ចី ថ្នាំទាស់ ថ្នាំសរសៃ ថ្នាំឈឺឆ្អឹងជាដើមដែលថ្នាំទាំងនោះគឺគាត់ទិញមកពីខេត្តកំពង់ធំ ហើយគាត់បានយកវាត្រាំស្រាទុកក្នុងរយៈពេល២ទៅ៣ខែ ទើបដាក់លក់ ។ មិនតែប៉ុណ្ណោះ គាត់លក់មានកំណត់ ប្រសិនបើអ្នកផឹកទិញយកទៅផឹកនៅផ្ទះ ឬទៅអង្គុយផឹកនៅនឹងផ្ទះរបស់គាត់ គឺ១ក្រុមគ្នា៤ទៅ៥នាក់ គាត់លក់ឲ្យត្រឹមតែ១លីត្រកន្លះប៉ុណ្ណោះ មិនលក់ឲ្យលើសពីនេះទេ ព្រោះខ្លាចផឹកច្រើនស្រវឹងធ្លាក់ភ្នែកជួបបញ្ហាផ្សេងៗ ជាពិសេសគ្រោះថ្នាក់ចរាចរកើតឡើងជាយថាហេតុ។
បុរសជាម្ចាស់ផ្ទះលក់បាយខាងលើបានប្រាប់ឲ្យដឹងបន្តទៀតថា គាត់បានចាប់លក់ពីម៉ោង៥ព្រឹកជួនកាលដល់ម៉ោង១០យប់ទើបបានឈប់សម្រាក ហើយភាគច្រើនអ្នកទិញគឺកុម្ម៉ង់ឲ្យខ្ចប់ ជាពិសេសក្រុមកម្មករនៅការដ្ឋានសំណង់ជិតនោះ ចំណែកការលក់ដូរនេះមិនទៀងទេ ជួនបានតិចនិងជួនក៏បានច្រើន ដោយកាលពីអំឡុងមុនពេលផ្ទុះជម្ងឺកូវីដ១៩ គាត់អាចលក់បានក្នុង១ថ្ងៃ៦០ម៉ឺនរៀល ។ ប៉ុន្តែចាប់តាំងពីជម្ងឺកូវីដ១៩នេះផ្ទុះឡើង គឺក្នុង១ថ្ងៃគាត់លក់បានត្រឹម៣០ម៉ឺនរៀលតែប៉ុណ្ណោះ ព្រោះតែអ្នកភូមិសូវមានលុយ ធ្វើឲ្យស្ងាត់មិនសូវមានអ្នកទិញ និងចូលហូប ទើបចំណូលមានការថយចុះទៅតាមនោះដែរ។ ដោយឡែក ចំពោះស្រាថ្នាំ គឺគាត់បើកលក់ចាប់ពីព្រឹករហូតដល់វេលាម៉ោង៥ទៅ៦ល្ងាចគឺឈប់លក់ហើយ មិនលក់ឲ្យលើសពីនេះឡើយ ។
ជាចុងក្រោយ បុរសជាម្ចាស់ផ្ទះលក់បាយនិងប្រពន្ធបានអំពាវនាសុំឲ្យអតិថិជនទាំងអស់ជួយគាំទ្រដល់ពួកគាត់ជាបន្តទៀតផង៕ (កែសម្រួលដោយ ៖ ធីតា)
ចែករំលែកព័តមាននេះ