ហាងលក់ទំនិញជាច្រើន ជាពិសេសក្នុងប្រទេសអភិវឌ្ឍន៍ដូចជាសហរដ្ឋអាមេរិកបានដួលរលំម្តងមួយៗព្រោះពួកគេមិនបានសម្របខ្លួនទៅនឹងស្ថានការដែលកំពុងតែផ្លាស់ប្តូរ និងបន្តអនុវត្តគំរូអាជីវកម្មដែលមិនទាន់សម័យកាល ។ តាំងពីដំបូងលោក លោកមហាសេដ្ឋី ជេហ្វ បេសូស (Jeff Bezos)…
ហាងលក់ទំនិញជាច្រើន ជាពិសេសក្នុងប្រទេសអភិវឌ្ឍន៍ដូចជាសហរដ្ឋអាមេរិកបានដួលរលំម្តងមួយៗព្រោះពួកគេមិនបានសម្របខ្លួនទៅនឹងស្ថានការដែលកំពុងតែផ្លាស់ប្តូរ និងបន្តអនុវត្តគំរូអាជីវកម្មដែលមិនទាន់សម័យកាល ។
តាំងពីដំបូងលោក លោកមហាសេដ្ឋី ជេហ្វ បេសូស (Jeff Bezos) ដែលជាស្ថាបនិកក្រុមហ៊ុន Amazon បានប្តេជ្ញាថានឹងមិនប្រព្រឹត្តខុសដូចក្រុមហ៊ុនទាំងនោះឡើយ ដូច្នេះលោកបានប្រកាន់ខ្ជាប់នូវទស្សនៈមួយដែលជំរុញឲ្យ Amazon បន្តធ្វើពិសោធន៍គំនិតថ្មីៗទោះជាមានការបរាជ័យខ្លះក៏ដោយ។ លោកហៅទស្សនៈនេះថា «ថ្ងៃទី ១» ។
ជាទូទៅ នៅដំណាក់កាលដំបូង ស្ថាប័ននីមួយៗតែងតែអាចដំណើរការទៅមុខបានលឿន និងរឹងមាំ ប៉ុន្តែបន្ទាប់ពីអាជីវកម្មកាន់តែធំទៅៗ ភាពស្មុគស្មាញក៏កើនឡើង ហើយការសម្រេចចិត្តនីមួយៗកាន់តែយឺតជាងមុនផងដែរ ។ ជាលទ្ធផល វាកាត់បន្ថយប្រសិទ្ធិភាពក្និងក្រុមហ៊ុន និងភាពរឹងមាំរបស់ក្រុមហ៊ុនផងដែរ ។
សម្រាប់លោក បេសូស លោកតែងតែព្យាយាមចៀសវាងស្ថានការនេះសម្រាប់ Amazon ហើយលោកក៏ទទួលស្គាល់ដែរថា វាមិនងាយស្រួលដូចការនិយាយឡើយ ហើយលោកបានបកស្រាយថា លោកត្រូវតែរៀនជាស្ថាប័នដើម្បីការពារខ្លួនមិនឲ្យធ្លាក់ក្នុងស្ថានការខាងលើ ។លោកបានបកស្រាយថា «រាល់ថ្ងៃជាថ្ងៃថ្មី ពិភពលោកតែងតែផ្លាស់ប្តូរជារៀងរាល់ថ្ងៃ ហើយពួកយើងត្រូវតែរកមើលការផ្លាស់ប្តូរ បង្កើតការផ្លាស់ប្តូរ និងសម្របខ្លួនទៅនឹងការផ្លាស់ប្តូរ ។ វាជាមេរៀនមួយសម្រាប់អ្នកគ្រប់គ្រង និងអ្នកដឹកនាំទាំងអស់ ។ វាជាអត្ថន័យនៅក្រោយទស្សនៈ ថ្ងៃទី ១ ជារៀងរហូត» ។
ចុះថ្ងៃទីពីរវិញខុសគ្នាពីថ្ងៃទីមួយយ៉ាងដូចម្តេច?
សម្រាប់មហាសេដ្ឋីខាងលើ ថ្ងៃទីពីរជាថ្ងៃដែលជាប់គាំងទៅមុខមិនរួច បន្ទាប់ពីនោះ គឺជាថ្ងៃដែលរាល់សកម្មភាពលែងមានន័យទៀត ។ បន្ទាប់ពីនោះហើយវាជាថ្ងៃនៃការអន់ថយដ៏ធ្ងន់ធ្ងរ ហើយជាថ្ងៃទីបញ្ចប់នៃអាជីវកម្មផងដែរ ។
ដោយហេតុដូច្នេះទើបលោកបេសូសតែងតែជ្រើសរើសថ្ងៃទីមួយជានិច្ច ។ ក្នុងនាមជាមនុស្សដែលតែងតែមានចិត្តចង់ឈ្នះតាំងពីនៅវ័យក្មេង ថ្ងៃទីពីរមិនដែលជាជម្រើសលោកឡើយ ៕
ចែករំលែកព័តមាននេះ