ខេត្តតាកែវ ៖ ស្ត្រីម្នាក់ត្រូវបាននគរបាលស្រុកគីរីវង់ឃាត់ខ្លួន និងរៀបចំកសាងសំណុំរឿងបញ្ជូនមកការិយាល័យព្រហ្មទណ្ទកំរិតធ្ងន់ខេត្ត ដើម្បីចាត់ការបន្ត ។ បន្ទាប់ពីស្រី្តសង្ស័យនិងប្តីពេលមកលេងផ្ទះបងប្អូន ក៏មានការសុីផឹករួច មានទំនាស់នឹងគ្នាមួយប្រាវ រហូតប្រើហិង្សាដាក់គ្នា ។ ហើយត្រូវប្រពន្ធយកអំបែងកែវចាក់លើប្តី បណ្តាលឱ្យរបួសធ្ងន់ធ្ងររហូតបាត់បង់ជីវិត កើតឡើងកាលពីថ្ងៃទី០១ ឧសភា វេលាម៉ោង០៥និង៣០នាទីល្ងាច ស្ថិតនៅភូមិត្រយឹង ឃុំរាមអណ្តើក ស្រុកគិរីវង់ ខេត្តតាកែវ ។
ស្រី្តសង្ស័យខាងលើនិយាយប្រាប់នគរបាលថា «ខ្លួនគ្មានបំណងចាក់ទៅលើប្តីទេ គឺចាក់ឱ្យរបួសធម្មតាប៉ុណ្ណោះតែបែរជាចំកន្លែងដែលស្លាប់ទៅវិញ ។ ស្តាយណាស់ ហើយពេលនេះប្តីស្លាប់ ខ្លួនក៏ជាប់គុក កូនភ្លោះ២នាក់ដែលមានអាយុជាង២ឆ្នាំនឹងនៅកំព្រាហើយ» ។
សូមបញ្ជាក់ថា ក្នុងពេលប្តីផឹកស្រវឹងស្រា ក៏បានរករឿងស្រី្តសង្ស័យជាប្រពន្ធ គឺផ្តើមចេញពីប្តីប្រចណ្ទប្រពន្ធពេលនោះ បុរសជាប្តីក៏បានវាយតប់ប្រពន្ធ ។ ភ្លាមៗនោះ ស្រី្តជាប្រពន្ធបានរើសអំបែងកែវដែលបែកបានចាក់ត្រូវក្រោមក្លៀក ដោយអចេតនារងរបួសធ្ងន់រួច ក៏ដឹកបញ្ជូនមកសង្គ្រោះនៅមន្ទីពេទ្យបង្អែកស្រុកមិនទាន់ដល់ផងក៏ស្លាប់តែម្តង និងបានដឹកសពត្រឡប់មកផ្ទះវិញ ។
ស្រី្តជាប្រពន្ធនគរបាលស្រុកឃាត់ខ្លួនភ្លាមៗ មានឈ្មោះ អ៊ុង ម៉ៅ អាយុ៥៣ឆ្នាំ មានទីលំនៅភូមិព្រៃរំដែង ឃុំព្រៃរំដែង ស្រុកគិរីវង់ ខេត្តតាកែវ ។ ជនរងគ្រោះជាប្តី ឈ្មោះ កែវ សេង អាយុ៥៥ឆ្នាំ ។ លោកអធិការនគរបាលស្រុកបានបន្តទៀតថា មុនពេលកើតហេតុប្តីនឹងប្រពន្ធ២នាក់នឹងបានមកលេងនៅផ្ទះបងប្អូននៅភូមិឃុំខាងលើ ដោយជួបជុំគ្នាសុីផឹកផងដែរ ។ ពេលសុីផឹកមួយសន្ទុះ ជនរងគ្រោះជាប្តីក៏ស្រវឹងស្រារួចក៏បានរករឿងស្រី្តជាប្រពន្ធគួបផ្សំខឹងប្រពន្ធទៅភ្នំពេញ ។
ដោយមានការប្រតាយប្រតប់គ្នាទៀតផង បើទោះមានបងប្អូនឃាត់ក៏មិនស្តាប់ដែរ ភ្លាមនោះស្រី្តជាប្រពន្ធបានរើសអំបែងកែវ ក៏ចាក់ចំក្រោមក្លៀកខាងស្ តាំបណ្តាលអោយហូឈាមយ៉ាងខ្លាំងរួចបងប្អូន ក៏បានយកឡានដឹកមកសង្គ្រោះនៅមន្ទីពេទ្យបង្អែកស្រុក មិនទាន់ដល់ពេទ្យផងជនរងគ្រោះជាប្តីក៏បានដាច់ខ្យល់តែម្តង ។
លោកវរសេនីឯកសែម សុជាតិ នាយការិយាល័យព្រហ្មទណ្ទកំរិតធ្ងន់ខេត្តបានអោយដឹងថា បើយើងពិនិត្យទៅនេះជារឿងអចេតនាតែប៉ុណ្ណោះ ហើយពេលនេះលោកនឹងអោយជំនាញកសាងសំណុំរឿង ដើម្បីបញ្ជូនទៅកាន់សាលាដំបូងខេត្ត ។
ចែករំលែកព័តមាននេះ