ខេត្តព្រះសីហនុ ៖ បន្ទាប់ពីយកជនសង្ស័យម្នាក់ ទៅធ្វើត្រាប់នៅកន្លែងកើតហេតុរួចរាល់នោះ កម្លាំងសមត្ថកិច្ចបាននាំខ្លួនទៅឃុំ ដើម្បីកសាងសំណុំរឿងតាមនិតិវិធី ។ យោងតាមការឆ្លើយសារភាពក្នុងពេលធ្វើត្រាប់ជនសង្ស័យរៀបរាប់ថា៖ ខ្លួនពិតជាធ្វើសកម្មភាពវាយសម្លាប់ប្លន់យកម៉ូតូរបស់ជនរងគ្រោះពិតប្រាកដមែន ដោយទូរស័ព្ទហៅជនរងគ្រោះ…
ខេត្តព្រះសីហនុ ៖ បន្ទាប់ពីយកជនសង្ស័យម្នាក់ ទៅធ្វើត្រាប់នៅកន្លែងកើតហេតុរួចរាល់នោះ កម្លាំងសមត្ថកិច្ចបាននាំខ្លួនទៅឃុំ ដើម្បីកសាងសំណុំរឿងតាមនិតិវិធី ។
យោងតាមការឆ្លើយសារភាពក្នុងពេលធ្វើត្រាប់ជនសង្ស័យរៀបរាប់ថា៖ ខ្លួនពិតជាធ្វើសកម្មភាពវាយសម្លាប់ប្លន់យកម៉ូតូរបស់ជនរងគ្រោះពិតប្រាកដមែន ដោយទូរស័ព្ទហៅជនរងគ្រោះ ឱ្យមកជក់ថ្នាំ
ញៀនជាមួយ ។ ពេលជក់រួច បំរុងត្រឡប់ទៅផ្ទះវិញ ខ្លួនបានយកដុំថ្មវាយទៅលើជនរងគ្រោះចំនួន៣ដុំ
ថ្ម បណ្តាលឱ្យជនរងគ្រោះដួលទៅថ្ម ហើយខ្លួនក៏ជិះម៉ូតូជនរងគ្រោះសំដៅទៅក្រុងព្រះសីហនុ ដើម្បីលក់ប៉ុន្តែគ្មានអ្នកហ៊ានទិញ ព្រោះគ្មានប័ណ្ណសំគាល់(កាតគ្រី) ទើបជិះម៉ូតូត្រឡប់មកផ្ទះវិញ ។
តាមការធ្វើត្រាប់សារភាពទៀតថា ខ្លួនបានស្គាល់មិត្តភក្តិ ដែលជាជនរងគ្រោះនេះប្រមាណជិត១ឆ្នាំមកហើយ ហើយមុនពេលកើតហេតុ ខ្លួនបានជិះម៉ូតូជាមួយជនរងគ្រោះ មកចំណុចទីតាំង ដើម្បីជក់គ្រឿងញៀននៅម៉ោងប្រមាណជា១០យប់ថ្ងៃទី២៧ មេសា នេះ ស្របពេលជាមួយគ្នានោះ ខ្លួនបានយកដុំថ្មវាយទៅលើជនរងគ្រោះចំនួនបីដុំថ្ម បណ្ដាលឲ្យស្លាប់នៅនឹងកន្លែងតែម្ដង ។
ក្រោយពីសម្លាប់ជនរងគ្រោះរួច ស្អែកឡើងខ្លួនបានជិះម៉ូតូរបស់ជនរងគ្រោះរកកន្លែងលក់ តែពុំមានអ្នកទិញព្រោះពុំមានកាតគ្រី ក្រោយមកខ្លួនក៏យកម៉ូតូយកទៅទុកក្នុងផ្ទះរបស់ខ្លួនវិញ រហូតដល់ថ្ងៃទី៣០ មេសា នេះ ក៏ត្រូវបានសមត្ថកិច្ចទៅឃាត់ខ្លួនដល់ផ្ទះតែម្ដង ។ សកម្មភាពប្លន់ម៉ូតូនេះ ត្រូវបានជនសង្ស័យបញ្ជាក់ថា យកម៉ូតូទៅលក់ដើម្បីយកលុយទៅឱ្យម្ដាយបង់អង្គការ។
សូមរំលឹកថា ជនសង្ស័យជាប់ពាក់ព័ន្ធបទល្មើសមនុស្សឃាតខាងលើ ឈ្មោះ ចាន់ លីឈាង ភេទប្រុស អាយុ១៩ឆ្នាំ មានទីលំនៅភូមិវាលធំ ឃុំវាលរេញ ស្រុកព្រៃនប់ ខេត្តព្រះសីហនុ ។ ហើយត្រូវបានសមត្ថកិច្ចអធិការដ្ឋាននគរបាលស្រុកព្រៃនប់ធ្វើការឃាត់ខ្លួនបាន កាលពីព្រឹកថ្ងៃទី៣០ មេសា បន្ទាប់ពីធ្វើសកម្មភាពបានចំនួនពីរថ្ងៃទៅលើមិត្តរបស់ខ្លួនម្នាក់ ឈ្មោះថាត ភារៈ ភេទប្រុស អាយុ១៩ឆ្នាំ មានទីលំនៅដូចគ្នា ដើម្បីប្លន់យកម៉ូតូ ។
តាមរបាយការណ៍របស់សមត្ថកិច្ចស្រុកព្រៃនប់ថា កាលពីថ្ងៃទី២៩ មេសា នៅវេលាម៉ោង១៣និង០០នាទី ស្ថិតនៅព្រៃជើងភ្នំថ្មដា ភូមិសំរុងក្រោម ឃុំសំរុង ស្រុកព្រៃនប់ ខេត្តព្រះសីហនុ មានករណីប្រទះឃើញសាកសព ។ ក្រោយពីទទួលព័ត៌មាន កំលាំងអធិការដ្ឋាននគរបាលស្រុកព្រៃនប់ សហការជាមួយកំលាំងជំនាញនៃស្នងការដ្ឋាន ន ប ខេត្តព្រះសីហនុ អាវុធស្រុក ប៉ុស្តិ៍ នគរបាល ពាក់ព័ន្ធ បានចុះទៅ ពិនិត្យ សាកសពនិងកន្លែងកើតហេតុឃើញថា ស្ថានភាពសពដេកផ្ងាស្នាមរបួសក្បាលផ្នែកខាងក្រោយ និងផ្នែកខាងមុខ ស្លៀកខោពណ៌ស អត់មានពាក់អាវទេ ។
តាមការបំភ្លឺម្តាយសពឈ្មោះ ចាន់ ដា អាយុ៤៣ឆ្នាំ ជាកម្មកររោងចក្រ មានទីលំនៅភូមិត្រពាំងមូល ឃុំជើងគោ ស្រុកព្រៃនប់ ខេត្តព្រះសីហនុបានឲ្យដឹងថា កូនគាត់ឈ្មោះ ផាត ភារះ ភេទប្រុស អាយុ១៩ឆ្នាំ នៅវេលាម៉ោង២១ថ្ងៃទី២៧ មេសា បានសុំគាត់ចេញពីផ្ទះជិះម៉ូតូម៉ាកហុងឌ្រីម ផលិតឆ្នាំ២០១៩ ពាក់ស្លាកលេខព្រះសីហនុ 1H 9772 ពណ៌ខ្មៅ ទៅទិសខាងត្បូងមួយភ្លែត មុនពេលសុំគាត់ចាកចេញពីផ្ទះនោះ គឺមានគេតេទូរស័ព្ទហៅកូនគាត់ កូនរបស់គាត់ប្រើទូរស័ព្ទលេខ 070 702 815 ។
តាមការសន្និដ្ឋានជំហានដំបូងករណីខាងលើ គឺជាករណី(ប្លន់សម្លាប់) ។ ហើយសាកសពខាងលើកម្លាំងជំនាញបន្ទាប់ពីធ្វើកោសល្យវិច្ច័យរួចបានប្រគល់ទៅក្រុមគ្រួសារយកទៅធ្វើបុណ្យតាមប្រពៃណី ។ករណី នេះ កម្លាំស្រុកព្រៃនប់ បានធ្វើការស្រាវជ្រាវយ៉ាងយកចិត្តទុកដាក់ រហូតមកថ្ងៃទី៣០ មេសា វេលាម៉ោង ១៤ និង១៥នាទី ទើបយើងកំណត់មុខសញ្ញាបានឈានទៅដល់ការឃាត់ខ្លួនជនសង្ស័យឈ្មោះ ចាន់ លីឈាង ភេទប្រុស អាយុ១៨ឆ្នាំ ជាកម្មករជ្រៀកឈើ មានទីលំនៅភូមិជើងគោ ឃុំជើងគោ ស្រុកព្រៃនប់ ខេត្ត ព្រះសីហនុ និងដកហូតម៉ូតូ០១គ្រឿងម៉ាក ហុងដាឌ្រីម សេរី០១៩ ពណ៍ខ្មៅ ពាក់ផ្លាកលេខ ព្រះសី
ហនុ ១H .៩៩៧២ គឺជារបស់ជនរងគ្រោះ ។
ចែករំលែកព័តមាននេះ