ប្រមុខរាជរដ្ឋាភិបាលប្រកាសមិនអនុញ្ញាតឱ្យបើកអាជីវកម្មកាស៊ីណូនៅសៀមរាបឡើយ
- ភ្នំពេញ
រាជធានីភ្នំពេញ ៖ ថ្លែងជាសាធារណៈ សម្តេចធិបតី ហ៊ុន ម៉ាណែត នាយរដ្ឋមន្ត្រីកម្ពុជាបានប្រកាសថា រាល់ការស្នើសុំអាជ្ញាបណ្ណពីអ្នកវិនិយោគទាំងជាតិ និងអន្តរជាតិ ដើម្បីបើកកាស៊ីណូនៅខេត្តសៀមរាប គឺមិនអនុញ្ញាតឱ្យជាដាច់ខាត ។
ក្នុងឱកាសអញ្ជើញជាអធិបតីភាពដ៏ខ្ពង់ខ្ពស់ក្នុងពិធីសម្ពោធដាក់ឱ្យប្រើប្រាស់ជាផ្លូវការ«មន្ទីរពេទ្យ ហ្លួង ម៉ែ» សម្ដេចបវរធិបតីមានប្រសាសន៍ថា ខេត្តសៀមរាបជាខេត្តស្ថិតនៅភាគខាងជើងប្រទេសកម្ពុជា ហើយសំបូរទៅដោយសម្បត្តិបេតិកភណ្ឌពិភពលោកនោះ គឺមិនអនុញ្ញាតឱ្យបើកអាជីវកម្មកាស៊ីណូទេ ។
សម្តេចធិបតីនាយករដ្ឋមន្ត្រីបន្តថា ការដែលសម្តេចអះអាងបែបនេះ ដោយសារនៅតែមានក្រុមអ្នកវិនិយោគស្នើសុំអាជ្ញាបណ្ណបើកកាសស៊ីណូនៅសៀមរាបជាបន្តបន្ទាប់ ។
សម្តេចធិបតីបញ្ជាក់ថា «មានអ្នកខ្លះចង់សុំ License (អាជ្ញាបណ្ណ) កាស៊ីណូនៅសៀមរាប ដាច់ខាតតាំងពីសម្តេចតេជោមក រដ្ឋាភិបាលថ្មីដែលខ្ញុំដឹកនាំ ដាច់ខាតមិនឱ្យមានអាជ្ញាបណ្ណកាស៊ីណូណានៅសៀមរាបទេ ។ អត់មានទេ ។ ចឹង កុំមកសុំអាជ្ញាបណ្ណកាស៊ីណូនៅខេត្តសៀមរាប» ។
ទោះបីជាយ៉ាងណា សម្តេចធិបតីនាយករដ្ឋមន្ត្រីបានសង្កត់ធ្ងន់ថា ចំពោះខេត្តសៀមរាបនេះ ក៏មិនហាមឃាត់រាល់ការបើកអាជីវវកម្មផ្សេងៗនោះទេ ។ តួយ៉ាង បើមានការស្នើសុំអាជ្ញាបណ្ណសាងសង់សណ្ឋាគារ សម្រាប់បម្រើភ្ញៀវទេសចរជាតិ-អន្តរជាតិ គឺអនុញ្ញាតឱ្យភ្លាមៗតែម្តង តែចំពោះកាស៊ីណូ គឺមិនអនុញ្ញាតជាដាច់ខាត ព្រោះខេត្តសៀមរាបជាខេត្តបេតិកភណ្ឌរបស់កម្ពុជា ។ ដូច្នេះ ត្រូវថែរក្សាទំនៀមទំលាប់ប្រពៃណីដែលមានតាំងពីបុរាណកាលមក ។
សម្តេចធិបតីនាយករដ្ឋមន្ត្រីបានគូសបញ្ជាក់ថា «រាល់ការស្នើសុំបើកអាជីវកម្មកាស៊ីណូនេះ នៅតែបន្តមានអ្នកមកស្នើសុំរហូតមកដល់សព្វថ្ងៃនេះ ទោះបីជាមានការបដិសេធតាំងពីជំនាន់សម្តេចតេជោ ហ៊ុន សែន ជាអតីតនាយករដ្ឋមន្ត្រី» ។
សម្តេចនាយករដ្ឋមន្ត្រីសង្កត់ធ្ងន់ទៀតថា ល្បែងស៊ីសង់ភ្នាល់ចាក់លុយក្រោមរូបភាពផ្សេង គឺរាជរដ្ឋាភិបាលបានប្រកាសផ្អាកហើយ ៕
ចែករំលែកព័តមាននេះ