អន្តរជាតិ ៖ តម្លៃប្រេងឆៅអន្តរជាតិបានធ្លាក់ចុះបន្តិច នៅថ្ងៃទី១៦ ខែកញ្ញា ឆ្នាំ២០២៦ បន្ទាប់ពីមានការកើនឡើងរយៈពេលពីរថ្ងៃជាប់គ្នា។ ការធ្លាក់ចុះនេះ កើតឡើងក្រោយពេលស្តុកប្រេងឆៅរបស់សហរដ្ឋអាមេរិកបានកើនឡើងលើសពីការរំពឹងទុក ខណៈដែលបញ្ហារអាក់រអួលនៃការផ្គត់ផ្គង់នៅមជ្ឈិមបូព៌ានៅតែបន្តកើតមាន។ នេះបើតាមការចេញផ្សាយពី Reuters ។
តម្លៃប្រេងឆៅប្រភេទ Brent បានធ្លាក់ចុះ ១,២២ ដុល្លារអាមេរិក ឬ ០,៦៧% មកត្រឹម ១០៧,៥៣ ដុល្លារក្នុង១បារ៉ែល គិតត្រឹមម៉ោង ១:៥៥ រសៀល (ម៉ោងនៅកម្ពុជា) ខណៈដែលតម្លៃប្រេងឆៅ WTI របស់សហរដ្ឋអាមេរិកបានធ្លាក់ចុះ ១,៦៤ ដុល្លារ ឬ ១,៥៥% មកត្រឹម ១០៤,១៩ ដុល្លារក្នុង១បារ៉ែល។ តម្លៃប្រេងទាំងពីរបានបិទការជួញដូរកាលពីថ្ងៃទី១៥ ខែកញ្ញា ដោយកើនឡើងជាង ៣ ដុល្លារ និងស្ថិតក្នុងកម្រិតខ្ពស់បំផុតមិនធ្លាប់មាន ចាប់តាំងពីថ្ងៃទី១៩ ខែឧសភា។
ការកើនឡើងនេះ កើតឡើងដោយសារការផ្អាកការផ្ទុកប្រេងនៅកំពង់ផែ Yanbu របស់ប្រទេសអារ៉ាប៊ីសាអូឌីត បានធ្វើឱ្យមានការព្រួយបារម្ភលើការផ្គត់ផ្គង់ គួបផ្សំនឹងការកាត់បន្ថយការដឹកជញ្ជូនប្រេងរបស់អារ៉ាប៊ីសាអូឌីតទៅកាន់តំបន់អឺរ៉ុបផងដែរ។
ទោះយ៉ាងណាក៏ដោយ ការធ្លាក់ចុះបន្តិចនៅថ្ងៃទី១៦ ខែកញ្ញា ជំរុញមួយផ្នែកដោយសារការឡើងស្តុកប្រេងឆៅរបស់សហរដ្ឋអាមេរិក។ ផ្អែកលើទិន្នន័យពីវិទ្យាស្ថានប្រេងរបស់អាមេរិក (API) បានបង្ហាញថា ស្តុកប្រេងឆៅ ប្រេងសាំង និងផលិតផលចម្រាញ់របស់សហរដ្ឋអាមេរិក បានកើនឡើងទាំងអស់ កាលពីសប្តាហ៍មុន ហើយស្តុកប្រេងឆៅបានកើនឡើង ៧,១ លានបារ៉ែលក្នុងសប្តាហ៍ដែលបិទបញ្ចប់ត្រឹមថ្ងៃទី១១ ខែកញ្ញា។ ការកើនឡើងនេះ គឺផ្ទុយស្រឡះពីការរំពឹងទុករបស់បណ្តាអ្នកវិភាគ ដែលគិតថានឹងធ្លាក់ចុះប្រហែល ១,៦ លានបារ៉ែល៕
ចែករំលែកព័តមាននេះ