ខេត្តព្រះសីហនុ ៖ ព្យុះប្រមោយដំរីបានបង្ហាញខ្លួននៅលើផ្ទៃសមុទ្រ ម្តុំពយយាយម៉ៅ ជិតភូមិកោះ តូច សង្កាត់កោះរ៉ុងសន្លឹម ក្រុងកោះរ៉ុងកាលពីរសៀលថ្ងៃ២៥ មេសា កន្លងមកនេះ ។ តាមពលរដ្ឋដែលប្រទះឃើញនិយាយថា ជាសំណាងល្អដែលព្យុះនេះ មិនបានវាយប្រហារប៉ះចំទូកនេសាទ ទូកទេសចរណ៍ ឬភូមិឋានពលរដ្ឋនៅលើកោះទេ ហាក់ដូចមានសំណាងណាស់ ។
យោងតាមប្រភពពីមន្ត្រីជំនាញបានធ្វើការព្រមានថា ក្នុងករណីដែលព្យុះនេះ បង្ហាញខ្លួនលើសមុទ្រ សុំឲ្យពលរដ្ឋនៅលើទូកនេសាទ ឬទូកទេសចរណ៍មើលដំណើរព្យុះ និងព្យាយាមគេចចេញពីគន្លងផ្លូវដែលព្យុះនេះ ធ្វើដំណើរ ដើម្បីរួចផុតពីការវាយប្រហាររបស់ព្យុះនេះ បង្ការកុំឲ្យមានគ្រោះថ្នាក់ ។ ព្យុះប្រមោយដំរីនេះជាព្យុះសាហាវមួយ ដែលអាចវាយប្រហារពន្លិច ឬបំបែកទូក ហើយបើវាកើតមាននៅលើគោកក្បែរឆ្នេរ អាចវាយប្រហារដល់ផ្ទះសម្បែង ឬអាយុជីវិតមនុស្សបានគ្រប់ពេល ។
ព្យុះប្រមោយដំរីធ្លាប់បានបំផ្លាញផ្ទះ២២ខ្នង បុរសម្នាក់ស្លាប់និងបង្កជាទឹករលកកម្ពស់៥ម៉ែត្រកបង្កើតមហន្តរាយធំកាលពី៥ឆ្នាំមុន
គួរកត់សម្គាល់ថា វេលារសៀលថ្ងៃទី២៧ ខែឧសភា ឆ្នាំ២០១០ គឺ៥ឆ្នាំកន្លងទៅនៅចំណុចផែលេខ១៨ ទំនប់រលក ស្ថិតក្នុងក្រុមទី២៤ ភូមិទី៣ សង្កាត់លេខ១ ក្រុងព្រះសីហនុ ខ្យល់ព្យុះប្រមោយដំរីដ៏ខ្លាំងមួយបានបោកបក់យ៉ាងខ្លាំងក្លាបង្កឱ្យខូចខាតដល់លំនៅឋានតូចធំចំនួន២២ខ្នងក្នុងនោះខូចខាតទាំងស្រុក៦ខ្នង ។ តាមប្រជាពលរដ្ឋដែលសុទ្ធសឹង ជាអ្នកនេសាទសមុទ្រនិយាយថា ភ្លៀងបានចាប់ផ្ដើមធ្លាក់ចុះបានបន្ដិច ក៏ស្រាប់តែមានព្យុះបោកបក់យ៉ាងខ្លាំង គឺព្យុះប្រមោយដំរី។ ចំណែកទឹកសមុទ្រមានកំពស់ពី៥ទៅ៧ម៉ែត្រ គួរឱ្យរន្ធត់សម្រាប់់អ្នកនេសាទ ។
ក្នុងហេតុការណ៍កាលណោះបង្កឱ្យបុរសម្នាក់បានស្លាប់ បាត់បង់ជីវិត ពេលបញ្ជូនទៅដល់មន្ទីរពេទ្យ ដោយសារតែសន្លឹកស័ង្កសីបានប៉ើងមកត្រូវ ចំកញ្ចឹងកផ្នែកខាងស្ដាំ ខណៈពេលគាត់បានរត់ឡើងពីទូកសំដៅទៅផ្ទះ ដើម្បីមើលកូន ចៅពេលមានព្យុះកំណាចបោកបក់ ។ បុរសរងគ្រោះត្រូវបាននាំទៅកាន់មន្ទីរពេទ្យចំការចេកភ្លាមៗដែរ តែគ្រូពេទ្យនិយាយថា របួសនោះហួសលទ្ធភាពសង្គ្រោះ ព្រោះបានដាច់សរសៃធំបណ្ដាលឱ្យមានឈាមហូរមិនឈប់ឈរ ។
អាជ្ញាធរមានលោកអភិបាលក្រុង ប៉ូលិស ប៉េអឹម និងមន្ដ្រីការងារជាច្រើននាក់ បានចុះទៅពិនិត្យកន្លែងកើតហេតុ ដើម្បីចាត់វិធានការសង្គ្រោះ ជាពិសេសបានខ្នះខ្នែងផ្ដល់សម្ភារ គ្រឿង ឧបភោគបរិភោគទៅដល់អ្នករងគ្រោះដោយ សារខ្យល់ព្យុះនេះ ៕
ចែករំលែកព័តមាននេះ