ក្នុងកំឡុងពេលដែលប្រទេសជុំវិញពិភពលោកកំពុងតែទទួលរងគ្រោះពីការរាតត្បាតនៃវីរុសកូវីដ ១៩ មនុស្សជាច្រើនបានព្យាយាមទិញ និងស្តុកទុកអាហារ ព្រមទាំងសម្ភារប្រើប្រាស់ផ្សេងៗព្រោះតែភ័យខ្លាចថាមានការខ្វះខាតនៅថ្ងៃអនាគត ។ ប៉ុន្តែសម្រាប់លោកមហាសេដ្ឋី ប៊ីល ហ្គេតស៍ (Bill…
ក្នុងកំឡុងពេលដែលប្រទេសជុំវិញពិភពលោកកំពុងតែទទួលរងគ្រោះពីការរាតត្បាតនៃវីរុសកូវីដ ១៩ មនុស្សជាច្រើនបានព្យាយាមទិញ និងស្តុកទុកអាហារ ព្រមទាំងសម្ភារប្រើប្រាស់ផ្សេងៗព្រោះតែភ័យខ្លាចថាមានការខ្វះខាតនៅថ្ងៃអនាគត ។
ប៉ុន្តែសម្រាប់លោកមហាសេដ្ឋី ប៊ីល ហ្គេតស៍ (Bill Gates) និងអ្នកស្រី មេលីនដា ហ្គេតស៍ (Melinda Gates) វិញ ពួកគេបានចាប់ផ្តើមទិញស្តុកអាហារក្នុងបន្ទប់ក្រោមដីតាំងពីប៉ុន្មានឆ្នាំមុនមានការផ្ទុះវីរីសនេះឯណោះ ។
អ្នកស្រី មេលីនដា បាននិយាយក្នុងកម្មវិធីវិទ្យុ BBC Radio Live កាលពីថ្ងៃព្រហស្បត្តិ៍ថា «ប៉ុន្មានឆ្នាំមុន ពួកយើងបាននិយាយគ្នាថា តើមានរឿងអ្វីកើតឡើងប្រសិនបើយើងគ្មានទឹកស្អាត? តើមានរឿងអ្វីកើតឡើងប្រសិនបើយើងគ្មានអាហារគ្រប់គ្រាន់? តើយើងនឹងទៅណា? តើគ្រួសារយើងត្រូវធ្វើដូចម្តេច? ដូច្នេះខ្ញុំគិតថាពួកយើងគួរតែត្រៀមខ្លួនយើងដោយខ្លួនឯង» ។
អ្នកស្រីបានបន្តទៀតថា ពួកយើងបានត្រៀមខ្លួន និងមានអាហារស្តុកទុកក្នុងបន្ទប់ក្រោមដីសម្រាប់ពេលចាំបាច់ ហើយក្នុងពេលនេះពួកយើងទាំងអស់គ្នាស្ថិតក្នុងស្ថានការនេះដូចគ្នា ។ យ៉ាងណាក្តី អ្នកស្រីបានបន្ថែមថា ពួកគេមិនអាចត្រៀមខ្លួនក្នុងការផលិតឪសថ ឬវ៉ាក់សាំងសម្រាប់វីរុសនេះទេ ។អ្នកស្រីបានបន្តថា «អ្វីដែលពួកយើងជជែកគ្នាភាគច្រើនក្នុងផ្ទះជារៀងរាល់យប់ គឺពីការដែលពួកយើងពិតជាសំណាងល្អណាស់» ។
កាលពីឆ្នាំ ២០១០ លោក ហ្គេតស៍ ធ្លាប់បានព្រមានក្នុងអត្ថបទមួយដែលលោកបានចែករំលែកបន្ទាប់ពីមានការរីកសាយនៃជម្ងឺ H1N1 ក្នុងឆ្នាំ ២០០៩ ពីវីរុសដែលអាចចម្លងដល់មនុស្សទូទាំងពិភពលោក ។នៅខែមេសាឆ្នាំ ២០១៨ លោក ហ្គេតស៍ បាននិយាយទៀតថា ពិភពលោកមិនទាន់បានត្រៀមខ្លួនរួចទេសម្រាប់ស្ថានការនេះ ហើយពិភពលោកត្រូវតែត្រៀមខ្លួនសម្រាប់វាដូចពេលដែលត្រៀមខ្លួនសម្រាប់សង្គ្រាមដែរ ។
លោក ហ្គេតស៍ បានត្រៀមខ្លួនសម្រាប់សង្គ្រាមតាំងពីលោកនៅវ័យក្មេងដែលធំធាត់ឡើងក្នុងជំនាន់សង្គ្រាមត្រជាក់ ។ ពេលនោះគ្រួសាររបស់លោកមានធុងមួយដែលទុកក្នុងបន្ទប់ក្រោមដីសម្រាប់ស្តុកទុកអាហារ និងទឹកស្អាត ។
លោក ហ្គេតស៍ បាននិយាយលើកម្មវិធី Ted Talk កាលពីឆ្នាំ ២០១៥ ថា ពេលដែលខ្ញុំនៅវ័យក្មេង គ្រោះដែលពួកយើងព្រួយបារម្ភជាងគេ គឺសង្គ្រាមអាវុធនុយក្លេអ៊ែរ ។ ពេលដែលវាកើតមានឡើង ពួកយើងត្រូវរត់ទៅបន្ទប់ក្រោមដី និងទទួលទានអាហារស្តុកទុកក្នុងធុង ។ ថ្ងៃនេះហានិភ័យធំជាងគេមិនមែនសង្គ្រាមអាវុធនុយក្លេអ៊ែរទេ ។ តែវាមានរូបរាងដូចជម្ងឺឆ្លងមួយទៅវិញ ៕
ចែករំលែកព័តមាននេះ