ម្ចាស់អាជីវកម្មជាអ្នកដឹកនាំក្នុងអាជីវកម្មរបស់ខ្លួន ហើយអ្នកមានតួនាទីក្នុងការវិភាគមើលផលប៉ះពាល់ដែលបញ្ហាមួយៗដូចជាកូវីដ ១៩ ជាដើមដែលមានលើអាចីវកម្មរបស់អ្នក និងរកវិធីដើម្បីទប់ទល់នឹងផលប៉ះពាល់ទាំងនោះ ។ យោងទៅតាមអតីតប្រធានាធិបតីសហរដ្ឋអាមេរិកគឺលោក បារ៉ាក់ អូបាម៉ា (Barack…
ម្ចាស់អាជីវកម្មជាអ្នកដឹកនាំក្នុងអាជីវកម្មរបស់ខ្លួន ហើយអ្នកមានតួនាទីក្នុងការវិភាគមើលផលប៉ះពាល់ដែលបញ្ហាមួយៗដូចជាកូវីដ ១៩ ជាដើមដែលមានលើអាចីវកម្មរបស់អ្នក និងរកវិធីដើម្បីទប់ទល់នឹងផលប៉ះពាល់ទាំងនោះ ។
យោងទៅតាមអតីតប្រធានាធិបតីសហរដ្ឋអាមេរិកគឺលោក បារ៉ាក់ អូបាម៉ា (Barack Obama) បានឲ្យដឹងថា ក្នុងកំឡុងពេលមានវិបត្តិធ្ងន់ធ្ងរ ចំណុចមួយដែលម្ចាស់អាជីវកម្មមិនអាចចោលបាន គឺការប្រាប់ការពិត ។
កាលពីថ្ងៃព្រហស្បត្តិ៍កន្លងមកនេះ លោក អូបាម៉ា បាននិយាយក្នុងកម្មវិធីអនឡាញមួយថា «និយាយការពិត ។ និយាយឲ្យបានច្បាស់ ។ និយាយដោយមានមេត្តាធម៌ ។ និយាយដោយគិតពីមនុស្សដែលកំពុងជួបបញ្ហា ។ កំហុសឆ្គងធំបំផុតដែលពួកយើងប្រព្រឹត្តក្នុងស្ថានការបែបនេះគឺការទទួលព័ត៌មានបានមិនត្រឹមត្រូវ ជាពិសេសពេលដែលពួកយើងតម្រូវឲ្យមនុស្សធ្វើការលះបង់ និងចេញសកម្មភាពដែលខុសពីធម្មជាតិរបស់ពួកគេ» ។
ទោះជាប្រសាសន៍របស់លោកប្រៀបបានជាការឆ្លើយតប ឬរិះគន់ទៅកាន់សកម្មភាពរបស់លោកប្រធានាធិបតី ដូណាល់ ត្រាំ (Donald Trump) ក្នុងការទប់ទល់នឹងកូវីដ ១៩ ក្នុងសហរដ្ឋអាមេរិកពិតមែនក្តី វានៅតែជាមេរៀនសំខាន់មួយដែលម្ចាស់អាជីវកម្មគួរតែរៀនសូត្រតាម ។
សម្រាប់ម្ចាស់អាជីវកម្មដែលមិនចង់ធ្វើការសម្រេចចិត្តលំបាកៗ ឬទាមទារខ្លាំងពេកពីបុគ្គលិករបស់ខ្លួនក្នុងកំឡុងពេកប្រទេសកំពុងជួបនូវវិបត្តិនេះ អ្នកត្រូវដឹងថា ការឆ្លើយតបដែលល្អជាងគេសម្រាប់មនុស្សទាំងអស់គ្នា គឺមិនមែនការកុហកពួកគេ ឬការជចៀសវាងនិយាយការពិតឡើយ ។ ការប្រាប់ការពិតដល់បុគ្គលិក និងមិត្តរួមការងាររបស់អ្នកតាមត្រង់ប្រៀបបានជាការគោរពដែលអ្នកអាចផ្តល់ដល់ពួកគេដែរ ។
ទោះជាសុទិដ្ឋិនិយមអាចផ្តល់ជាកម្លាំងចិត្តដល់មនុស្សជុំវិញខ្លួនពិតមែនក្តី អ្នកអាចនឹងទទួលបានជំនឿទុកចិត្តពីអ្នកដតៃច្រើនជាងប្រសិនបើអ្នកនិយាយតាមត្រង់ ។ ដូច្នេះសម្រាប់ម្ចាស់អាជីវកម្មដែលជួបប្រទះនូវបញ្ហាប្រាក់ចំណូល អ្នកគួរតែនិយាយពីបញ្ហាទាំងនេះប្រាប់ដល់បុគ្គលិករបស់អ្នក ។ ប្រសិនបើអ្នកត្រូវការជំនួយ ឬការយល់ដឹងពីបុគ្គលិកក្នុងករណីមានការបើកប្រាក់បៀវត្សន៍យឺតយ៉ាវ អ្នកគួរតែបកស្រាយពីស្ថានការអ្នកឲ្យបានច្បាស់លាស់ ។
ដូចគ្នានេះដែរ ប្រសិនបើអ្នកគិតថាអ្នកប្រហែលជាត្រូវកាត់បន្ថយចំនួនបុគ្គលិកដើម្បីទប់ទល់នឹងការខាតបង់ក្នុងអាជីវកម្ម អ្នកគួរតែប្រាប់បុគ្គលិកឲ្យត្រៀមខ្លួនទុកជាមុនដើម្បីឲ្យពួកគេមានពេលវេលារៀបចំខ្លួនក្នុងការរកការងារថ្មីជាដើម ៕
ចែករំលែកព័តមាននេះ