ក្នុងកំឡុងពេលដែលសាលារៀនត្រូវបានផ្អាកដំណើរការមួយរយៈដើម្បីទប់ស្កាត់នឹងវីរុសកូវីដ ១៩ នេះ អាណាព្យាបាលក្នុងប្រទេសកម្ពុជាគួរតែព្យាយាមឲ្យអស់ពីសមត្ថភាពក្នុងការជំរុញឲ្យកូនៗសិក្សាដោយខ្លួនឯងនៅផ្ទះ ។ ប៉ុន្តែក្រៅពីមេរៀនចាំបាច់ដែលពួកគេត្រូវរៀនដើម្បីត្រៀមសម្រាប់ការសិក្សាក្នុងថ្នាក់រៀនហើយ ឪពុកម្តាយគួរតែឆ្លៀតឱកាសនេះបង្រៀនដល់ពួកគេពីជំនាញសំខាន់ៗក្នុងជីវិតមួយចំនួនដែលអាចជួយឲ្យពួកគេជោគជ័យក្នុងជីវិតដែរ ។
១. ការចាយលុយ
ឪពុកម្តាយគួរតែជួយបណ្តុះបណ្តាលទម្លាប់ចាយវាយលុយល្អៗឲ្យកូនៗតាំងពីតូច ដើម្បីចៀសវាងទម្លាប់ចាយវាយខ្ជះខ្ជាយនៅថ្ងៃអនាគត ។ វិធីងាយមួយក្នុងការបង្រៀនកូនៗឲ្យយល់ដឹងពីការចាយវាយមានដូចជាការឲ្យថវិកាមួយចំនួនឲ្យកូនៗចាយជារៀងរាល់ថ្ងៃ សប្តាហ៍ ឬខែ ។ បន្ទាប់មកជារៀងរាល់សប្តាហ៍ ឬខែ ឪពុកម្តាយអាចអង្គុយចុះនិងឲ្យកូនៗប្រាប់ពីអ្វីដែលពួកគេបានចាយវាយលើ និងចង្អុលបង្ហាញពីអ្វីដែលល្អនិងអ្វីដែលត្រូវការកែសម្រួល ។
២. បោកសម្លៀកបំពាក់
មានជំនាញក្នុងជីវិតមួយចំនួនដែលក្មេងៗគ្រប់គ្នាត្រូវការដើម្បីធំឡើងក្លាយជាមនុស្សដែលឯករាជ្យ និងចេះមើលថែខ្លួនឯងបាន ហើយក្នុងនោះរួមមានការចម្អិនអាហារ ការសម្អាត និងការចេះទុកដាក់រៀបចំរបស់ប្រើប្រាស់ ។ ឪពុកម្តាយអាចបង្រៀនកូនៗឲ្យធ្វើកិច្ចការក្នុងផ្ទះបានដោយងាយស្រួលដោយបង្កើតវាជាទម្លាប់ មិនមែនម្តងធ្វើម្តងមិនធ្វើទេ ។
៣. ចម្អិនអាហារ
ជំនាញនេះមិនមែនសម្រាប់តែកូនស្រីទេ ជាក់ស្តែងជំនាញក្នុងការចម្អិនអាហារមានសារៈសំខាន់សម្រាប់មនុស្សគ្រប់ភេទដែលចង់រស់នៅជីវិតដែលឯករាជ្យ ។ វាក៏អាចជាសកម្មភាពមួយដែលមនុស្សមួយគ្រួសារចំណាយពេលឲ្យកាន់តែជិតស្និទ្ធនឹងគ្នានផងដែរ ។
៤. រៀបចំពេលវេលា
ជាទូទៅយុវវ័យដែលឈានមុខក្នុងថ្នាក់រៀន និងក្នុងសង្គមជាមនុស្សដែលពូកែចាត់ចែងពេលវេលា ។ ប្រាកដណាស់ ការចាត់ចែងពេលវេលាជាជំនាញដែលកូនៗត្រូវរៀនជាយូរដើម្បីស្ទាត់ជំនាញ ។ ឪពុកម្តាយអាចជួយដល់កូនៗក្នុងផ្នែកនេះបានដោយជួយរៀនចំពេលវេលាប្រចាំថ្ងៃដល់ពួកគេតាំងពីម៉ោងក្រោកពីដំណេកដល់ម៉ោងចូលដំណេកវិញទោះជានៅថ្ងៃឈប់សម្រាកពិតមែនក្តី ៕
ចែករំលែកព័តមាននេះ