ទោះជាក្នុងពេលដែលសេដ្ឋកិច្ចកំពុងតែជួបនូវបញ្ហាព្រោះតែកូវីដ ១៩ អំណាចទឹកលុយនៅតែនៅមានកម្រិតដដែលជាពិសេសក្នុងផ្នែកទំនាក់ទំនងរវាងមនុស្សនិងមនុស្ស ។ យោងទៅតាមការសិក្សាថ្មីមួយរបស់ Havard Business School កាលពីខែមុនបានឲ្យដឹងថា ការផ្តល់តម្លៃខ្លាំងពេកលើទ្រព្យសម្បត្តិជាកត្តានាំយកទុក្ខឲ្យមនុស្ស…
ទោះជាក្នុងពេលដែលសេដ្ឋកិច្ចកំពុងតែជួបនូវបញ្ហាព្រោះតែកូវីដ ១៩ អំណាចទឹកលុយនៅតែនៅមានកម្រិតដដែលជាពិសេសក្នុងផ្នែកទំនាក់ទំនងរវាងមនុស្សនិងមនុស្ស ។ យោងទៅតាមការសិក្សាថ្មីមួយរបស់ Havard Business School កាលពីខែមុនបានឲ្យដឹងថា ការផ្តល់តម្លៃខ្លាំងពេកលើទ្រព្យសម្បត្តិជាកត្តានាំយកទុក្ខឲ្យមនុស្ស ។
យោងទៅតាម ឡូរ៉ា ផាក (Lora Park) ដែលជាអនុសាស្ត្រាចារ្យផ្នែកចិត្តសាស្ត្រនៅ University at Buffalo បានឲ្យដឹងថា «ពេលដែលមនុស្សពឹងផ្អែកតម្លៃខ្លួនលើភាពជោគជ័យផ្នែកហិរញ្ញវត្ថុ ពួកគេជួបនូវសម្ពាធ និងអារម្មណ៍ខ្វះឯករាជ្យភាព» ។
អ្នកស្រាវជ្រាវបានប្រទះឃើញថា សម្រាប់មនុស្សដែលវិនិយោគជីវិតទាំងស្រុងរបស់ពួកគេលើលុយ និងបានបរាជ័យក្នុងការបង្កើតមិត្តភាពជាមួយអ្នកដទៃ ការត្រូវបានបង្ខំឲ្យរក្សាគម្លាតពីមនុស្សដទៃប៉ះពាល់ដល់សុខភាពផ្លូវចិត្តរបស់ពួកគេ ។
អ្នកស្រាវជ្រាវ ដេបូរ៉ា វ៉ាដ (Deborah Ward) បានបកស្រាយថា «ជម្ងឺបាក់ទឹកចិត្ត និងការព្រួយបារម្ភមិនសមហេតុសមផលមានទំនាក់ទំនងជាមួយនឹងការផ្តាច់ខ្លួន ហើយពួកយើងកំពុងតែមើលឃើញវាច្បាស់ណាស់ខណៈដែលពួកយើងកំពុងមានការលំបាកក្នុងការរក្សាទំនាក់ទំនងជាមួយមិត្តភក្តិក្នុងកំឡុងពេលមានការរាតត្បាតនៃកូវីដ១៩ ។
ទំនាក់ទំនងក្នុងសង្គមទាំងនេះមានសារៈសំខាន់ណាស់ ។ មនុស្សត្រូវការវាដើម្បីមានអារម្មណ៍សុវត្ថិភាព មានសុខភាពផ្លូវចិត្តល្អ និងមានសុភមង្គល ។ ប៉ុន្តែភាគច្រើនដើម្បីសម្រេចបានភាពជោគជ័យក្នុងផ្នែកហិរញ្ញវត្ថុ មនុស្សត្រូវបង្ខំចិត្តលះបង់ពេលវេលាសម្រាប់គ្រួសារ និងមិត្តភក្តិ» ។
ដោយសិក្សាលើកំណត់ត្រាប្រចាំថ្ងៃរបស់អ្នកចូលរួមការស្រាវជ្រាវប្រមាណ ២,៥០០នាក់ ការសិក្សាខាងលើបានប្រទះឃើញថា ការចំណាយពេលច្រើន និងផ្តល់តម្លៃច្រើនលើការរកលុយច្រើនជាងសកម្មភាពក្នុងសង្គមមានផលប៉ះពាល់យ៉ាងខ្លាំងលើសុភមង្គលរបស់មនុស្ស ។
អ្នកជំនាញបានប្រាប់មកទៀតថា សូម្បីតែក្នុងពេលមានគ្រោះអាសន្ន ការរក្សាទំនាក់ទំនងជាមួយមនុស្សដទៃ គឺពិតជាសំខាន់ណាស់ក្នុងការរក្សាសុខភាពផ្លូវចិត្តឲ្យបានល្អ ៕
ចែករំលែកព័តមាននេះ