រាជធានីភ្នំពេញ៖ បន្ទាប់ពីវិស័យសំណង់និងអចលនទ្រព្យនៅកម្ពុជាមានការរីកចម្រើនទៅមុខគេសង្កេតឃើញមានការធ្វើអាជីវកម្មពុះដីឡូត៍លក់មានសកម្មភាពផុសផុលសឹងនៅតំបន់ ។ ហើយនៅក្នុងការរីកចម្រើនេះក៏មានប្រជាពលរដ្ឋមិនតិចដែរបានចាញ់បោក ឬទិញដីខ្យល់ ប៉ុន្តែគ្រាខាងមុខនេះសម្រាប់អ្នកដែលទិញដីឡូត៍អាចនឹងមិនមានហានិភ័យដូចពេលមុននោះឡើយ ព្រោះអាជ្ញាធរបានតម្រូវឱ្យម្ចាស់អាជីវកម្មដីឡូត៍ទាំងអស់ត្រូវមកដាក់ពាក្យស្នើសុំលិខិតអនុញ្ញាតអាជីវកម្មអភិវឌ្ឍដីឡូត៍នៅតាមមន្ទីរ ឬក្រសួងសេដ្ឋកិច្ចនិងហិរញ្ញវត្ថុឱ្យបានមុនថ្ងៃទី៣០ ខែមេសា ឆ្នាំ២០២០។
ពាក់ព័ន្ធនិងការទិញនិងលក់ដីឡូត៍នៅពេលកន្លងមកបើតាមអ្នកជំនាញនៅក្នុងវិស័យសំណង់និងអចលនទ្រព្យមើលឃើញថាអ្នកដែលទិញដីឡូត៍ជួបបញ្ហាច្រើនដោយអ្នកខ្លះទិញដីមិនដឹងថាដីពិតនៅកន្លែងណាហើយអ្នកផ្សេងទៀតទិញប៉ះគម្រោងខ្យល់ ហើយពួកកាត់ទាំងនេះភាគច្រើនមិនមានប្រាក់ច្រើននោះទេ។
នាយកក្រុមហ៊ុនCentury 21 Fortuna Investment លោក វ៉ា វីរៈ មានប្រសាសន៍ថា«កន្លងមកយើងឃើញមានបញ្ហាច្រើនទាក់ទងនិងអ្នកទិញដីឡូត៍ ហើយអ្នកខ្លះដាក់លុយទៅហើយមិនដឹងដីរបស់ខ្លួននៅឯណា និងអ្នកខ្លះទៀតទិញប៉ះចាំដីខ្យល់។អីចឹងក្រសួងធ្វើនេះដើម្បីការពារហានិភ័យទៅដល់អតិថជិនឬអ្នកទិញដីឡូត៍ ដូចយើងដឹងហើយអ្នកទិញដីឡូត៍ភាគច្រើនពួកគាត់មិនសូវមានថវិកាច្រើននោះទេ អីចឹងការណ៍នេះជួយការពារហានិភ័យរបស់ពួកគាត់»។ លោកបានបន្តថា« បើសិនក្រសួងអនុវត្តការជូនដំណឹងនេះឱ្យបានតឹងរឹង ព្រោះយើងបានដឹងស្រាប់ហើយថាការទិញដីឡូត៍ត្រូវការកាត់ឈ្មោះ ផ្ទេរកម្មសិទ្ធទៅឱ្យបុគ្គលផ្សេង។អីចឹងបើក្រសួងសហការជាមួយក្រសួងរៀបចំដែនដីនគរូបនីយកម្មនិងសំណង់ ខ្ញុំគិតថានឹងមានការកាត់បន្ថយបានហានិភ័យច្រើន»។
តាមមន្ត្រីក្រសួងសេដ្ឋកិច្ចនិងហិរញ្ញវត្ថុ នៅពេលក្រសួងតម្រូវឱ្យម្ចាស់អាជីវកម្មដីឡូត៍មកដាក់ពាក្យស្នើសុំអាជ្ញាបណ្ណអាជីវកម្មដីឡូត៍នៅក្រសួង គោលដៅចម្បងនៃការដាក់ចេញនៅច្បាប់ផ្សេងៗគឺដើម្បីការពារហានិភ័យឬផលប្រយោជន៍ដល់អ្នកទិញ ព្រោះកន្លងមកមានការឆបោកមានច្រើន។
យោងតាមលិខិតជូនដំណឹងស្តីពី «ការគ្រប់គ្រងអាជីវកម្មអភិវឌ្ឍដីឡូត៍»របស់ក្រសួងសេដ្ឋកិច្ចនិងហិរញ្ញវត្ថុកាលពីថ្ងៃទី៨ ខែមេសា បានឱ្យដឹងថា យោងតាមប្រកាសលេខ០៩៨ ចុះថ្ងៃទី២០ ខែមករា២០២០ ស្តីពីការគ្រប់គ្រងអាជីវកម្មអភិវឌ្ឍអចលនវត្ថុ តម្រូវឱ្យម្ចាស់អាជីវកម្មដីឡូត៍(ពោះដីឡូត៍) ទាំងអស់ត្រូវដាក់ពាក្យស្នើសុំលិខិតអនុញ្ញាតអាជីវកម្មអភិវឌ្ឍដីឡូត៍ពីមន្ទីរសេដ្ឋកិច្ចនិងហិរញ្ញវត្ថុរាជធានី ខេត្ត សម្រាប់អាជីវកម្មអភិវឌ្ឍដីឡូត៍ដែលមានទំហំក្រោម១ម៉ឺនម៉ែត្រការ៉េ ឬស្មើ១ហិកតានិងដាក់ពាក្យស្នើសុំអាជ្ញាបណ្ណអភិវឌ្ឍដីឡូត៍ពីក្រសួងសេដ្ឋកិច្ចនិងហិរញ្ញវត្ថុសម្រាប់អាជីវកម្មអភិវឌ្ឍដីឡូត៍ដែលមានទំហំចាប់ពី១ម៉ឺនម៉ែត្រការ៉េឬស្មើ១ហិកតាឡើង។
លិខិតជូនដំណឹងគូសបញ្ជាក់ថា«ដូច្នេះក្រសួងសេដ្ឋកិច្ចនិងហិរញ្ញវត្ថុសូមអញ្ញើញម្ចាស់អាជីវកម្មអភិវឌ្ឍដីឡូត៍ទាំងអស់ត្រូវរួសរាន់មកដាក់ពាក្យស្នើសុំលិខិតអនុញ្ញាតនិងអាជ្ញា បណ្ណអាជីវកម្មដីឡូត៍ឱ្យបានមុនថ្ងៃទី៣០ ខែមេសា ឆ្នាំ២០២០ជាកំហិត។
ក្នុងករណីមិនអនុវត្តតាមការណែនាំខាងលើ ក្រសួង ឬមន្ទីរសេដ្ឋកិច្ចនិងហិរញ្ញវត្ថុនឹងចាត់វិធានការរដ្ឋបាលនិងធ្វើការផាកពិន័យស្របតាមប្រកាសលេខ០៩៨ ចុះថ្ងៃទី២០ខែមករាឆ្នាំ២០២០ស្តីពីការគ្រប់គ្រងអាជីវកម្មអភិវឌ្ឍអចលនវត្ថុ»៕
ចែករំលែកព័តមាននេះ