រាជធានីភ្នំពេញ ៖ ដោយយោងទៅលើសេចក្តីជម្រាមជូនដំណឹងរបស់ក្រសួងអប់រំ យុវជន និងកីឡា បានចុះថ្ងៃទី៧ ខែមេសា ឆ្នាំ២០២០ ក្នុងកម្មវត្ថុសំណើរសុំផ្អាកការលេងកីឡា ឬការហាត់ប្រាណគ្រប់ប្រភេទ ដែលមានលក្ខណៈប្រមូលផ្តុំនៅតាមទីតាំងកីឡដ្ឋានសាធារណៈ និងឯកជនជាបណ្តោះអាសន្ន ។
កាលពីថ្ងៃទី៨ ខែមេសា ឆ្នាំ២០២០ នេះ គណៈកម្មការគ្រប់ពហុកីឡដ្ឋានជាតិអូឡាំពិក បានចេញសេចក្តីប្រកាសជូនដំណឹងមួយ បិទនៅមុខច្រកទ្វារចូលស្តាតអូឡាំពិក ដែលបានជូនដំណឹងដល់បងប្អូនប្រជាពលរដ្ឋទាំងអស់ឲ្យបានជ្រាបថា ចាប់ពីថ្ងៃទី១០ ខែមេសា នេះតទៅក្រសួងអប់រំ យុវជន និងកីឡា សូមបិទទីតាំងហាត់ប្រាណ និងលេងកីឡាគ្រប់ប្រភេទ ដែលមានលក្ខណៈប្រមូលផ្តុំគ្នា នៅក្នុងពហុកីឡដ្ឋានជាតិអូឡាំពិកមួយរយៈសិន ដើម្បីចូលរួមប្រយុទ្ធប្រឆាំងនៃការរីករាលដាលជជំងឺកូវីដ១៩ ។ ដូច្នោះសូមបងប្អូនអ្នកហាត់ប្រាណទាំងអស់ជ្រាបជាព័ត៌មាន ។
ប៉ុន្តែយ៉ាងណាក្តី ពហុកីឡដ្ឋានជាតិអូរឡាំពិក បន្ទាប់ពីមានករណីផ្ទុះមេរោគវីរុសកូវីដ១៩ ពាសពេញសកលលោក និងមានការរីករាលដាលដល់ប្រទេសកម្ពុជាយើងខ្លះមកក្តី គេបានសង្កេតឃើញអ្នកហាត់ប្រាណ និងអ្នកទៅលេងកីឡា ហាក់ដូចជាមានការថយចុះច្រើន និងស្ទើរតែគ្មានអ្នកហាត់ប្រាណទៀតផង ។
ការបាត់មុខអ្នកទៅហាត់ប្រាណ និងលេងកីឡាមួយរយៈនេះ បណ្តាលមកពីអ្នកហាត់ប្រាណ និងអ្នកលេងកីឡាទាំងអស់នោះ គេស្តាប់តាមការណែនាំរបស់ក្រសួងសុខាភិបាល ដើម្បីចូលរួមការការពារ និងប្រយុទ្ធប្រឆាំងជំងឺរាតត្បាតកូវីដ១៩ ជាមួយរាជរដ្ឋាភិបាល ។
ម្លោះហើយបានធ្វើឲ្យអ្នកខ្លះសម្រាកហាត់ប្រាណនៅស្តាតអូឡាំពិក និងអ្នកខ្លះហាត់នៅផ្ទះ ជៀសវាងការឆ្លងមេរោគដ៏កាចសាហាវនោះ តែដល់ពេលមានប្រកាសបិទស្តាតទាំងស្រុងមិនឲ្យចូលហាត់ប្រាណ ដូច្នេះ ទំនងអ្នកហាត់ប្រាណទាំងអស់មិនជំទាស់ទៅនឹងបំរាមនោះទេ សង្ឃឹមថា បងប្អូនអាចឈប់សម្រាកបានគ្រប់គ្នា ដើម្បីការពារជីវិត ពីការឆ្លងជំងឺកូវីដ១៩ នោះ ៕ (កែសម្រួលដោយ ៖ បុប្ផា)
ចែករំលែកព័តមាននេះ