ប្រទេសទុយនីស៊ី ៖ ក្រសួងមហាផ្ទៃប្រទេសទុយនីស៊ី បានដាក់ពង្រាយមនុស្សយន្តដើរតួជាប៉ូលិស ដើម្បីល្បាតតាមដងផ្លូវនៃរដ្ឋធានី និងពង្រឹងការបិទប្រទេស ដែលបានដាក់កាលពីខែមុន នៅពេលដែលប្រទេសនេះប្រយុទ្ធប្រឆាំងនឹងការរីករាលដាលនៃមេរោគឆ្លងកូវីដ១៩។ ប៉ូលីសយន្តនេះ ត្រូវបានគេស្គាល់ថា…
ប្រទេសទុយនីស៊ី ៖ ក្រសួងមហាផ្ទៃប្រទេសទុយនីស៊ី បានដាក់ពង្រាយមនុស្សយន្តដើរតួជាប៉ូលិស ដើម្បីល្បាតតាមដងផ្លូវនៃរដ្ឋធានី និងពង្រឹងការបិទប្រទេស ដែលបានដាក់កាលពីខែមុន នៅពេលដែលប្រទេសនេះប្រយុទ្ធប្រឆាំងនឹងការរីករាលដាលនៃមេរោគឆ្លងកូវីដ១៩។
ប៉ូលីសយន្តនេះ ត្រូវបានគេស្គាល់ថា ឈ្មោះ PGuard ដែលមានបំពាក់ដោយម៉ាស៊ីនថតកាំរស្មីអ៊ីនហ្វ្រារ៉េដ និងកាមេរ៉ាវាស់កម្ដៅ បន្ថែមលើប្រព័ន្ធសំឡេងរោទិ៍ និងពន្លឺ។ នៅក្នុងរូបភាព និងសម្លេង ដែលត្រូវបានបង្ហោះនៅលើគេហទំព័ររបស់ក្រសួងមហាផ្ទៃ កាលពីខែមុន PGuard បានអំពាវនាវដល់អ្នកដែលល្មើសនឹងការបិទប្រទេសថា៖ «តើអ្នកកំពុងធ្វើអ្វី? បង្ហាញអត្តសញ្ញាណប័ណ្ណរបស់អ្នកមកខ្ញុំ អ្នកមិនដឹងថា មានការបិទប្រទេសទេឬ?»។
ប្រទេសទុយនីស៊ី បានស្ថិតនៅក្រោមបម្រាមគោចរនៅពេលយប់ចាប់តាំងពីថ្ងៃទី១៧ ខែមីនាហើយអាជ្ញាធរបានដាក់បទបញ្ជារឹតបន្តឹងតឹងរ៉ឹងចាប់ពីថ្ងៃទី២២ ខែមីនា។ ចាប់តាំងពីថ្ងៃទី២ ខែមីនា មកមនុស្ស១៤នាក់បានបាត់បង់ជីវិតដោយសារកូវីដ១៩ ក្នុងប្រទេសទុយនីស៊ី ដែលមានករណីឆ្លងចំនួន ៤៥៥ករណី។
អ្នកបង្កើតរ៉ូប៊ីនីទុយនីស ឈ្មោះ Anis Sahbani បានប្រាប់ AFP ថា ម៉ាស៊ីននេះ ត្រូវបានផលិតដំបូងក្នុងឆ្នាំ២០១៥ សំខាន់ដើម្បីអនុវត្តល្បាតសន្តិសុខ ហើយវាក៏ដំណើរការដោយស្វ័យភាពតាមរយៈបញ្ញាសិប្បនិម្មិតផងដែរ។
មនុស្សយន្តនេះ ត្រូវបានសាងសង់ដោយក្រុមហ៊ុន Enova Robotics របស់ Sahbani ដែលមានតម្លៃខ្ទង់១០ម៉ឺនដុល្លារអាមេរិក ហើយភាគច្រើនត្រូវបានលក់ទៅក្រៅប្រទេសដល់ក្រុមហ៊ុនសម្រាប់ការប្រើប្រាស់រក្សាសុវត្ថិភាព។ មនុស្សយន្តមួយចំនួនត្រូវបានបរិច្ចាគទៅក្រសួងមហាផ្ទៃ៕ ដកស្រង់ចេញពីវេបសាយ ៖ thestar (ប្រភពវីដេអូ ៖ Ruptly) (កែសម្រួលដោយ ៖ បុប្ផា)
ចែករំលែកព័តមាននេះ