ទីក្រុងបាងកក៖ ស្ថានភាពទឹកជំនន់នៅប្រទេសថៃលើកនេះប្រហែលជាធ្ងន់ធ្ងរខ្លាំងមែនទែនដល់ថ្នាក់នាយករដ្ឋមន្ត្រីចេញបញ្ជាឱ្យមន្ត្រីក្រោមឱវាទប្រញាប់ចេញបេសកកម្មជួយសង្គ្រោះប្រជាជនជាបន្ទាន់។ ភ្លៀងធ្លាក់ខ្លាំងជាច្រើនថ្ងៃជាប់គ្នាបង្កជាគ្រោះទឹកជំនន់លិចលង់ខេត្តយ៉ាងតិច១៦របស់ថៃ និងឆក់យកជីវិតមនុស្ស១២នាក់។ ផ្ទះរបស់អ្នកស្រុកជាង១សែនខ្នងក៏រងការលិចលង់ ឬត្រូវបានបំផ្លិចបំផ្លាញដោយជំនន់ទឹកភ្លៀងលើកនេះផងដែរ។
ក្រសួងមហាផ្ទៃថ្លែងថាទឹកជំនន់កំពុងវាយលុកខ្លាំងនៅបណ្ដាខេត្តភាគខាងត្បូង, ភាគកណ្ដាល និងភាគឦសាន។ ក្នុងនោះ ខេត្តឧត្ដរទិស (Uttaradit) ដែលស្ថិតនៅខ្ពង់រាបខាងជើងកំពុងលិចលង់ខ្លាំងជាងកន្លែងណាៗទាំងអស់។ មនុស្សយ៉ាងតិច៥នាក់ស្លាប់នៅក្នុងខេត្តនេះ។ ទូរទស្សន៍ថៃ ភីប៊ីអែស (PBS) បានដកស្រង់ពាក្យសម្ដីរបស់ប្រជាជននៅតំបន់រងគ្រោះមកផ្សាយថាទឹកជំនន់លើកនេះហក់ឡើងខ្ពស់យ៉ាងឆាប់រហ័ស និងគ្រោះថ្នាក់បំផុត។ ត្រឹមតែមួយប៉ប្រិចភ្នែកអ្នកស្រុកត្រូវតែបង្ខំចិត្តចាកចេញពីក្នុងផ្ទះដើម្បីឡើងទៅសំកុកនៅលើដំបូលផ្ទះ។ ឥឡូវនេះ ពួកគេកំពុងស្នាក់នៅក្នុងវត្តជាបណ្ដោះអាសន្ន។
នាយករដ្ឋមន្ត្រីថៃថ្លែងថាមន្ត្រីរដ្ឋាភិបាលកំពុងដឹកជញ្ជូនជំនួយទៅចែកជូនរងគ្រោះដោយសារទឹកជំនន់។ ពួកគេកំពុងវាយតម្លៃអំពីទំហំនៃការខូចខាតដោយសារគ្រោះទឹកជំនន់លើកនេះ និងត្រៀមខ្លួនដោះស្រាយបញ្ហាប្រឈមដែលនឹងកើតឡើងជាបន្តទៀតព្រោះភ្លៀងធ្លាក់ និងគ្រោះទឹកជំនន់មិនទាន់បញ្ចប់ត្រឹមនេះទេ។ វាគ្រាន់តែជាចំណុចចាប់ផ្ដើមតែប៉ុណ្ណោះ។
នាយករដ្ឋមន្ត្រីថៃទទួលស្គាល់ថាប្រទេសថៃឆ្នាំនេះរងគ្រោះយ៉ាងដំណំព្រោះគ្រោះធម្មជាតិកើតឡើងផ្គួបគ្នា និងផ្ទួនៗគ្នាទាំងភ្លៀងលាយខ្យល់កន្ត្រាក់ ទឹកជំនន់ និងការបាក់ដីនៅតាមបណ្ដាខេត្តជាច្រើនទូទាំងផ្ទៃប្រទេស។ ដូច្នេះទំហំនៃការខូចខាតទ្រព្យសម្បត្តិ និងអាយុជីវិតមិនតិចតួចនោះឡើយ។ នេះបើយោងតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ