ខេត្តមណ្ឌលគិរី ៖ បើតាមសេចក្តីរាយការណ៍បានឱ្យដឹងថា ចៅក្រមស៊ើបសួរនៃសាលាដំបូងខេត្តមណ្ឌលគិរី នៅព្រឹកថ្ងៃទី៧ ខែមេសា ឆ្នាំ២០២០ បានសម្រេចឃុំខ្លួនបុរស៣នាក់ដាក់ពន្ធនាគារបណ្ដោះអាសន្ន ពាក់ព័ន្ធករណីកាប់គាស់ និងឈូសឆាយដីព្រៃ ដើម្បីយកដីធ្វើជាកម្មសិទ្ធិ តាមបញ្ញត្តិមាត្រា៦២ និងមាត្រា៥៦ បទល្មើសធនធានធម្មជាតិថ្នាក់ទី៤ នៃច្បាប់ស្ដីពីតំបន់ការពារធម្មជាតិ។
សេចក្តីរាយការណ៍បន្តថា ជនត្រូវចោទខាងលើមាន ១.ឈ្មោះ ទិត សុបឿន ភេទប្រុស អាយុ៤៧ឆ្នាំ មានទីលំនៅបច្ចុប្បន្នភូមិព្រឹត ឃុំក្រែក ស្រុកពញាក្រែក ខេត្តត្បូងឃ្មុំ, ២.ឈ្មោះ រ៉ុង សុខជា ភេទប្រុស អាយុ២២ឆ្នាំ មានទីលំនៅបច្ចុប្បន្នភូមិជីប៉េះ ឃុំមេមត់ ស្រុកមេមត់ ខេត្តត្បូងឃ្មុំ និង៣.ឈ្មោះ យាត ឆៃយ៉ា ភេទប្រុស អាយុ១៩ឆ្នាំ ជនជាតិខ្មែរ មានទីលំនៅបច្ចុប្បន្នភូមិគ ឃុំក្រែក ស្រុកពញាក្រែក ខេត្តត្បូងឃ្មុំ។
ប្រភពដដែលបន្តថា ជនទាំង៣នាក់ខាងលើនេះ ត្រូវបានមន្ត្រីឧទ្យានុរក្ស នៃរបៀងអភិរក្សជីវៈចម្រុះ ចាប់ឃាត់ខ្លួន ខណៈពួកគេកំពុងធ្វើសកម្មភាពបើកត្រាក់ទ័រឈូសឆាយ និងភ្ជួរដី ដោយគ្មានការអនុញ្ញាត ស្ថិតនៅត្រង់ចំណុចត្រពាំងទឹកល្អក់ ក្នុងភូមិរវ៉ាក់ ឃុំរយ៉ ស្រុកកោះញែក ក្នុងតំបន់របៀងអភិរក្សជីវៈចម្រុះប្រព័ន្ធតំបន់ការពារធម្មជាតិ។
ប្រភពដដែលបន្តទៀតថា ក្នុងប្រតិបត្តិការទប់ស្កាត់ និងបង្ក្រាបបទល្មើសធនធានធម្មជាតិនេះ មន្ត្រីឧទ្យានុរក្ស បានត្រួតពិនិត្យកន្លែងកើតហេតុឃើញថា មានការកាប់គាស់ រុករាន និងឈូសឆាយដីព្រៃ ហើយបានវាស់វែងជាក់ស្ដែងលើផ្ទៃដីខាងលើ មានទំហំ ៣៤.៥៣៤ហិកតា រួមជាមួយត្រាក់ទ័រចំនួន២គ្រឿង ត្រូវបាននាំយកទៅរក្សាទុកបណ្ដោះអាសន្ននៅស្នាក់ការរបៀងអភិរក្សជីវៈចម្រុះ ដើម្បីកសាងសំណុំរឿងបទល្មើសធនធានធម្មជាតិបញ្ជូនទៅសាលាដំបូងខេត្តមណ្ឌលគិរី ចាត់ការបន្តតាមនីតិវិធី៕ (កែសម្រួលដោយ ៖ បុប្ផា)
ចែករំលែកព័តមាននេះ