សម្តេចតេជោ ហ៊ុន សែន នៅថ្ងៃទី៧ ខែមេសា បានប្រកាសពីយុទ្ធសាស្ត្រកាន់តែខ្លាំងនិងយូរអង្វែងសម្រាប់ការប្រយុទ្ធប្រឆាំងនឹងកូវីដ១៩ ហើយអំពាវនាវប្រជាជនអោយកាន់តែបង្កើនការប្រុងប្រយ័ត្ន ចំពោះការរាលដាលនៃមេរោគកូវីដ១៩ ដែលធ្វើអោយមនុស្សជាង១លាននាក់ធ្លាក់ខ្លួនឈឺ និងជាង៧ម៉ឺននាក់បានស្លាប់ ក្នុងពិភពលោក។
ក្នុងចំណោមវិធានការជាច្រើន ដើម្បីធ្វើអោយសកម្មភាពប្រយុទ្ធនឹងកូវីដ១៩កាន់តែខ្លាំងក្លា និងមានប្រសិទ្ធភាពទាំងរយៈពេលខ្លី និងវែងនោះ សម្តេចបានប្រកាសផ្អាកបុណ្យចូលឆ្នាំខ្មែរ ហើយតម្រូវអោយទាំងស្ថាប័នរដ្ឋ និងឯកជនទាំងអស់ ត្រូវធ្វើការងារដូចធម្មតា។
ទន្ទឹមពេលជាមួយគ្នានោះ សម្តេចក៏បានអំពាវនាវអោយប្រជាជនកម្ពុជាទាំងអស់ កុំធ្វើដំណើរទៅស្រុកកំណើត ហើយស្ថិតនៅកន្លែងដែលពួកគេរស់នៅបច្ចុប្បន្ន ដើម្បីជាវិធានការមួយទប់ស្កាត់នៃការឆ្លងរាលដាលមេរោគកូវីដ១៩។
សម្តេចតេជោ បានមានប្រសាសន៍ពីយុទ្ធសាស្ត្រនៃការទប់ស្កាត់មេរោគកូវីដ១៩ទាំងការឆ្លងមេរោគកូវីដ១៩ ពីខាងក្រៅ និងការឆ្លងមេរោគកូវីដ១៩នៅខាងក្នុងប្រទេស។
ការទប់ស្កាត់នៃការរាលដាលមេរោគកូវីដ១៩ ពីក្រៅប្រទេសរួមមានការរឹតត្បិតទិដ្ឋាការសម្រាប់ជនបរទេស និងការស្នើសុំអោយប្រជាជនកម្ពុជា ស្ថិតនៅក្រៅប្រទេសកុំទាន់ធ្វើដំណើរចូលប្រទេស។
ការធ្វើដំណើរចុះឡើងច្រើនរបស់មនុស្សត្រូវបានគេចាត់ទុកថា ជាហានិភ័យមួយនៃការឆ្លងមេរោគកូវីដ១៩។ សម្តេចតេជោ ហ៊ុន សែន ក៏បានអំពាវនាវដល់ប្រជាជនកម្ពុជាផ្អាកការធ្វើដំណើរទៅស្រុក ដើម្បីចៀសវាងការឆ្លង និងការចម្លងមេរោគកូវីដ១៩។
ការប្រកាសផ្អាកបុណ្យចូលឆ្នាំខ្មែរ និងការប្រកាសអោយស្ថាប័នរដ្ឋ និងឯកជនធ្វើការជាធម្មតា នឹងកាត់បន្ថយការធ្វើដំណើរក្នុងពេលចូលឆ្នាំ ហើយជាលទ្ធផលនឹងកាត់បន្ថយហានិភ័យនៃការឆ្លង និងការចម្លងមេរោគកូវីដ១៩។
ជារៀងរាល់ឆ្នាំ ប្រជាជនកម្ពុជា ពិសេសកម្មករនានាជាច្រើនលាននាក់បានធ្វើដំណើរ ទៅកាន់ស្រុកកំណើតក្នុងពេលបុណ្យចូលឆ្នាំខ្មែរដែលជាពេលវេលាមានការឈប់សម្រាកច្រើនថ្ងៃ។
ប៉ុន្តែទោះបីជាយ៉ាងណាក៏ដោយចុះ ស្ថានភាពកូវីដ១៩ មិនអនុគ្រោះដល់ការធ្វើដំណើរឡើយ ដោយគេចាត់ទុកថា លំហូរមនុស្សច្រើននឹងបង្កើនហានិភ័យដល់ការឆ្លង និងការចម្លងមេរោគកូវីដ១៩។
បច្ចុប្បន្នកម្ពុជាមានអ្នកឆ្លងមេរោគកូវីដ១៩ ចំនួន១១៥ករណី ហើយមានអ្នកជំងឺចំនួន៥៨នាក់បានជាសះ ស្បើយពីជំងឺនេះ។ ទោះបីជាក្នុងរយៈពេលប៉ុន្មានថ្ងៃចុងក្រោយនេះមិនមាន ឬក៏មានតិចតួចករណីថ្មី នៃជំងឺកូវីដ១៩ក្តី ស្ថានភាពនៃកូវីដ១៩ នៅកម្ពុជា ក៏ដូចជានៅប្រទេសផ្សេងទៀតស្ថិតនៅក្នុងភាពមិនប្រាកដប្រជា និងផុយស្រួយ។
ដូច្នេះហើយបានសម្តេចតេជោ ហ៊ុន សែន នៅតែបន្តអំពាវនាវអោយប្រជាជនបង្កើនការប្រុងប្រយ័ត្ន និងដាក់ចេញជាយុទ្ធសាស្ត្រយូរអង្វែងរសម្រាប់ការប្រយុទ្ធនឹងមេរោគកូវីដ១៩។
សម្តេចបានអង្វរករដល់ប្រជាជនកម្ពុជា កុំធ្វើដំណើរ បើសិនជាមិនមានភាពចាំបាច់។
ការទៅស្រុកកំណើតជារឿងសំខាន់សម្រាប់ប្រជាជនកម្ពុជាជាច្រើនជួបជុំគ្រួសារ និងសប្បាយរីករាយពិធីបុណ្យចូលឆ្នាំជារៀងរាល់ឆ្នាំ។
ប៉ុន្តែក្នុងស្ថានភាពមួយដែលផុយស្រួយ ហើយការឆ្លងមេរោគកូវីដ១៩ អាចកើតមានគ្រប់ពេលនោះ ការសម្រេចចិត្តមិនធ្វើដំណើរទៅស្រុកមានតម្លៃនឹងត្រូវធ្វើ ដើម្បីសុខភាព និងជីវិតខ្លួនឯង សមាជិកគ្រួសារផង និង ប្រទេសជាតិទាំងមូល។
យើងមើលមិនឃើញកូវីដ១៩ ហើយយើងក៏មិនដឹងថា កូវីដ១៩ កំពុងស្ថិតនៅក្នុងខ្លួននរណាម្នាក់។ ប៉ុន្តែវាត្រៀមខ្លួនជានិច្ច និងចម្លងពីមនុស្សម្នាក់ទៅមនុស្សម្នាក់ទៀត។ ដូច្នេះយើងមិនត្រូវផ្តល់ឱកាសណាមួយ ដើម្បីអោយមេរោគកូវីដ១៩នេះ ឆ្លងរាលដាលដល់ខ្លួនយើង សមាជិកគ្រួសាររបស់យើង និងប្រជាជនកម្ពុជាទាំងអស់។
ការមិនធ្វើដំណើរពពាក់ពួន ការមិនទៅស្រុកកំណើត នឹងក្លាយទៅជាការចូលរួមមួយដើម្បីទប់ស្កាត់ការឆ្លងរាដាលមេរោគកូវីដ១៩។
ជំនួសអោយការទៅស្រុកកំណើត ដើម្បីជួបជុំគ្រួសារ យើងអាចបន្តទំនាក់ទំនង និងសួរសុខទុក្ខប្តី ឬប្រពន្ធ ឪពុកម្តាយ បងប្អូនតាមរយៈទូរស័ព្ទ និងបណ្តាញសង្គម។ ការធ្វើដូច្នេះ វានឹងនាំដល់សេចក្តីសុខ ទាំងខ្លួនឯង និងមនុស្សជាទីស្រឡាញ់របស់ខ្លួន។
ដូច្នេះអត់ចូលឆ្នាំ អត់ទៅស្រុកក៏បានដែរ អោយតែយើងអាចទប់ស្កាត់ការឆ្លងរាល ដាលមេរោគកូវីដ១៩ នៅក្នុងប្រទេសកម្ពុជាយើង។
កម្ពុជារួមគ្នាជាធ្លុងតែមាន ដើម្បីសុខភាព និងជីវិតប្រជាជនទាំងអស់៕ (កែសម្រួលដោយ ៖ បុប្ផា)
ចែករំលែកព័តមាននេះ