ខេត្តព្រះសីហនុ ៖ កាលពីវេលាម៉ោង៥និង៤៥នាទីល្ងាចថ្ងៃទី២ ខែមេសា ឆ្នាំ២០២០ នៅចន្លោះគីឡូម៉ែត្រលេខ១៥៧-១៥៨ ស្ថិតក្នុងភូមិអូរតាហយ ឃុំស្ទឹងឆាយ ស្រុកកំពង់សីលា ខេត្តព្រះសីហនុ មានគ្រោះថ្នាក់ចរាចរណ៍មួយកើតឡើងរវាងរថយន្តសណ្តោងកុងតឺន័រមានទិសដៅពីខេត្តព្រះសីហនុ ឆ្ពោះទៅភ្នំពេញ បានបុកជាមួយរថយន្តមួយគ្រឿងទៀតម៉ាកឡិចស៊ីស មានទិសដៅបញ្ច្រាសទិសគ្នា បណ្តាលឱ្យបាត់បង់ជីវិតម្នាក់ របួសធ្ងន់៣នាក់ និងស្រាលម្នាក់ ។
ភាគីខាងរថយន្តសណ្តោងកុងតឺន័រ ពណខៀវលាយត្រួយចេក ពាក់ស្លាកលេខ ភ្នុំពេញ ៣C-០០៥៤ អ្នកបើកបរមិនស្គាល់អត្តសញ្ញាណ ។ ចំណែកភាគីខាងរថយន្តមួយគ្រឿងម៉ាកឡិចសុីស RX300 ពណ៌ស ពាក់ស្លាកលេខ ភ្នំពេញ ២H-៣០៣០ បើកបរដោយឈ្មោះ សូ សុខាល័យ ភេទប្រុស អាយុ៣៣ឆ្នាំ រស់នៅភ្នំពេញ រងរបួសធ្ងន់ រីឯអ្នករួមដំណើរចំនួន៤នាក់ ១-ឈ្មោះ សូនី ភេទស្រី អាយុ ២៨ឆ្នាំ មានទីលំនៅ ខេត្តព្រៃវែង បានបាត់បង់ជីវិត ២-ឈ្មោះ លី គ័ង ភេទប្រុស អាយុ៣៥ឆ្នាំ ជនជាតិចិន មានទីលំនៅភ្នំពេញ រងរបួសធ្ងន់ ៣-ឈ្មោះ បូរ៉ា ភេទប្រុស អាយុ២០ឆ្នាំ មានទីលំនៅខេត្តព្រៃវែង រងរបួសធ្ងន់ និង៤-ឈ្មោះ ហុង សៀវហាក់ អាយុ១១ឆ្នាំ ទីលំនៅភ្នំពេញ រងរបួសស្រាល ។
ក្រោយពេលកើតហេតុ ជនរងគ្រោះដែលបាត់បង់ជីវិតត្រូវបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី រីឯអ្នករងរបួសត្រូវបានកម្លាំងអាវុធហត្ថស្នាក់ការសន្តិសុខ៤០២ សហការជាមួយកម្លាំង អាវុធហត្ថស្នាក់ការសន្តិសុខ៤០១ និងកម្លាំងអធិការដ្ឋាននគរបាលស្រុកកំពង់សីលា ជួយសង្គ្រោះបញ្ជូនទៅមន្ទីរពេទ្យឯរាជធានីភ្នំពេញ ចំណែករថយន្តទាំងពីរស្ទូចយកទៅរក្សាទុកនៅអធិការដ្ឋាននគរបាលស្រុកកំពង់សីលាដើម្បីបន្តតាមនីតិវិធីនៅពេលក្រោយ ៕ (កែសម្រួលដោយ ៖ ធីតា)
ចែករំលែកព័តមាននេះ