ខេត្តពោធិ៍សាត់ ៖ បន្ទាប់ពីដឹងថា ដីនៅតំបន់ថ្មដា ស្រុកវាលវែង មួយចំនួនដែលមានពាក្យកាន់កាប់ត្រឹមត្រូវ ត្រូវគេដកហូតប្រគល់ទៅឱ្យក្រុមហ៊ុនឯកជនមួយធ្វើការអភិវឌ្ឍន៍ដើម្បីផលប្រយោជន៍របស់គេភ្លាម ប្រជាពលរដ្ឋដែលសង្ស័យបាត់បង់ដី កំពុងកើតទុក្ខព្រួយឥតល្ហែ ហើយបានត្រៀមខ្លួនប្រឆាំងដាច់ខាតមិនបណ្តោយឱ្យគេយកទទេៗនោះទេ។ ជាក់ស្តែងនៅថ្ងៃទី១៧ តុលា ២០១០ ប្រជាពលរដ្ឋប្រមាណជាង៥០នាក់ បាននាំគ្នាធ្វើបាតុកម្ម ខ្លាចគេឈូសឆាយដីរបស់ខ្លួនដោយឃើញក្រុមហ៊ុនខ្លាំងមួយដឹកគ្រឿងចក្រចូលទៅជា បណ្តើរៗព្រោះពួកគាត់ដឹងឮថា ក្រោយភ្ជុំបិណ្ឌក្រុមហ៊ុននឹងមកឈូសឆាយ។
ប្រជាពលរដ្ឋភូមិសង្គមថ្មី ឃុំថ្មដា បានផ្តល់ព័ត៌មានមកថា ឥឡូវនេះក្រុមហ៊ុនបាននាំគ្រឿងចក្រទៅដល់មួយគ្រឿងហើយ ឯប៉ុន្មានគ្រឿងទៀតជាប់នៅចំណុចភ្នំ៨០ ដោយសារដីបាក់ធ្លាក់ពីលើភ្នំគរលើផ្លូវស្ទះចរាចរណ៍មិនអាចធ្វើដំណើរទៅបាន។ រហូតមកដល់ពេលនេះ ពួកគាត់មានការងឿងឆ្ងល់យ៉ាងខ្លាំងចំពោះអាជ្ញាធរភូមិ-ឃុំ-ស្រុក មន្ត្រីជំនាញក៏ដូចអាជ្ញាធរខេត្តមិនដែលផ្តល់ព័ត៌មានឱ្យប្រជាពលរដ្ឋដឹងរឿងទេ ទំនងជាជ្រកក្រោមស្លាបក្រុមហ៊ុនអស់ហើយ។ លុះស្ងាត់ៗស្រាប់តែឃើញគ្រឿងចក្រចូលមកក៏នាំគ្នាបះបោរតែម្តង។ ក្នុងបដាមានសរសេរអក្សរដាក់ថា «ដីខ្ញុំសិទ្ធិខ្ញុំ ប្រឆាំងដាច់ខាតការឈូសឆាយដីប្រជាពលរដ្ឋស្របច្បាប់ ប្រគល់ទៅឱ្យក្រុមហ៊ុន សុំឱ្យក្រុមហ៊ុនទិញដូរតាមតម្លៃ សុំសម្តេចតេជោហ៊ុន សែន ចាត់តំណាងពិសេសមកពិនិត្យមើលជាក់ស្តែង ជយោគណបក្សប្រជាជនកម្ពុជា»។
ប្រជាពលរដ្ឋឱ្យដឹងទៀតថា កាលធ្វើសមាហរណម្ម អាជ្ញាធរ ភូមិបាលស្រុក និងមន្ត្រីជំនាញបានកំណត់ព្រំដីច្បាស់ណាស់គឺដីនៅខាងកើតស្ទឹងមេទឹក ជាដែនអភិរក្សដែលគ្រប់គ្រងដោយក្រសួងបរិស្ថាន។ ដីខាងលិចស្ទឹងចាប់ពីអូរដើមគ រហូតដល់អូរភ្លុកដំរី ព្រំប្រទល់សៀមជាតំបន់កសិកម្មសំរាប់ចែកឱ្យប្រជាពលរដ្ឋ។ កាលនោះប្រជាពលរដ្ឋម្ចាស់ដីនីមួយៗបានខំកាប់ឆ្ការដើម្បីយកដីដាំដំណាំ និងសង់លំនៅឋាន ខ្លះចំគ្រាប់មីនផ្ទុះស្លាប់ ខ្លះពិការរហូតដល់សព្វថ្ងៃនេះ ជាង១០ឆ្នាំមកហើយ។ ឥឡូវនេះដោយដឹងថា រាជរដ្ឋាភិបាលគ្រោងបើកច្រកអន្តរជាតិអភិវឌ្ឍន៍កសិកម្ម ពិសេសនៅឃុំថ្មដានេះ ស្រាប់តែគេឃុបឃិតគ្នាយកដីតំបន់នេះ ប្រគល់ទៅឱ្យក្រុមហ៊ុនឯកជនមួយដែលអ្នកស្រុកនិយាយថា ជាក្រុមហ៊ុនស៊ីឈើគ្រញូងធ្វើការអភិវឌ្ឍន៍ទៅវិញដោយអះអាងថាដីតំបន់នេះស្ថិតក្នុងដែនការពាររបស់ក្រសួងបរិស្ថាន ហើយរាយការណ៍ទៅថ្នាក់លើដើម្បីឱ្យចេញ ស ជ ណ។
អ្នកស្រុកតំបន់នោះ បានចាត់ទុកថា ការធ្វើបែបនេះគឺជាការប្លន់យកដីពីប្រជាពលរដ្ឋទាំងស្រុង ដែលសុំឱ្យសម្តេចតេជោហ៊ុន សែន អញ្ជើញមកឃើញផ្ទាល់ថា តើដីទាំងនេះស្ថិតក្នុងដែនការពាររបស់ក្រសួងបរិស្ថានឬអត់? បើសម្តេចមកឃើញហើយនៅតែដកហូតទៀត ពួកគាត់រីករាយនឹងប្រគល់ជូនទាំងអស់គ្នានិងឈប់តវ៉ា។ ប៉ុន្តែបើមិនដូច្នេះទេ សូមឱ្យក្រុមហ៊ុនទិញដូរទៅតាមតម្លៃ មិនត្រូវមករឹបអូសយកទទេៗបែបនេះទេ។ មន្ត្រីអាជ្ញាធរឃុំម្នាក់បាននិយាយឱ្យដឹងថា ពិតជាមានការធ្វើបាតុកម្មប្រឆាំងការដឹកគ្រឿងចក្រចូលមែន។ អ្នកតវ៉ាមានជាង៥០នាក់កំពុងប្តូរផ្តាច់ប្រឆាំងដាច់ខាតការរំលោភយកដីពួកគាត់។ កោះសន្តិភាពបានព្យាយាមសុំការបំភ្លឺពីមេការក្រុមហ៊ុនដែលនាំគ្រឿងចក្រចូលដែរ ប៉ុន្តែតាមទូរស័ព្ទ សុទ្ធតែបិទ មិនអាចទាក់ទងបានឡើយ។ គេបានដឹងថា មន្ត្រីជំនាញខ្លះរបស់ខេត្តដែលពាក់ព័ន្ធរឿងវាស់ដីបានត្រូវថ្នាំសណ្តំអស់ហើយ៕
ចែករំលែកព័តមាននេះ