ប្រទេសជាច្រើនបានសម្រេចចិត្តរួចហើយប្រកាសដាក់ប្រទេសក្នុងស្ថានភាពអាសន្នដើម្បីទប់ទល់នឹងការរាតត្បាតនៃជំងឺកូវីដ១៩។ កម្ពុជាកំពុងស្ថិតនៅក្នុងដំណាក់កាលនៃការធ្វើច្បាប់ ហើយការសម្រេចចិត្តដាក់ប្រទេសក្នុងស្ថានភាពអាសន្ន ឬក៏អត់នោះ នឹងអាស្រ័យថា តើស្ថានភាពកូវីដ១៩នៅកម្ពុជា នឹងមានការប្រែប្រួលយ៉ាងដូចម្តេចនៅក្នុងរយៈពេលទៅមុខទៀតនេះ។ សម្តេចតេជោ ហ៊ុន សែន…
ប្រទេសជាច្រើនបានសម្រេចចិត្តរួចហើយប្រកាសដាក់ប្រទេសក្នុងស្ថានភាពអាសន្នដើម្បីទប់ទល់នឹងការរាតត្បាតនៃជំងឺកូវីដ១៩។ កម្ពុជាកំពុងស្ថិតនៅក្នុងដំណាក់កាលនៃការធ្វើច្បាប់ ហើយការសម្រេចចិត្តដាក់ប្រទេសក្នុងស្ថានភាពអាសន្ន ឬក៏អត់នោះ នឹងអាស្រ័យថា តើស្ថានភាពកូវីដ១៩នៅកម្ពុជា នឹងមានការប្រែប្រួលយ៉ាងដូចម្តេចនៅក្នុងរយៈពេលទៅមុខទៀតនេះ។
សម្តេចតេជោ ហ៊ុន សែន បានប្រកាសហើយថា ការប្រកាសភាពអាសន្ននឹងត្រូវធ្វើឡើង តែក្នុងស្ថានភាពចាំបាច់បំផុតប៉ុណ្ណោះ ហើយស្ថានភាពបច្ចុប្បន្ន គឺមិនទាន់ដល់ពេលទេ។
នៅមិនឆ្ងាយពីកម្ពុជា គឺប្រទេសថៃបានប្រកាសរួចហើយការដាក់ប្រទេសក្នុងស្ថានភាពអាសន្ន។ ចំណែកលោកត្រាំក៏ប្រកាសដាក់អាមេរិកអោយស្ថិតនៅក្នុងស្ថានភាពអាសន្នផងដែរ កាលពីថ្ងៃទី១៣ ខែមីនា។ ចំណែករដ្ឋ៤៨នៅក្នុងចំណោមរដ្ឋទាំង៥០នៅអាមេរិក បា ប្រកាសភាពអាសន្នផងដែរ ដើម្បីបង្កើនកិច្ចប្រឹងប្រែងទប់ទល់ការរាលដាលមេរោគកូវីដ១៩។
ការដាក់ប្រទេសក្នុងស្ថានភាពអាសន្នជាទូទៅគេកម្រនឹងធ្វើណាស់ ហើយនេះជាលើកទីមួយដែលកម្ពុជាកំពុងពិចារណាការដាក់ប្រទេសក្នុងស្ថានភាពអាសន្ន។
ការដាក់ប្រទេសក្នុងស្ថានភាពអាសន្នមានបំណងបើកអោយរដ្ឋាភិបាលមានអំណាចកាន់តែច្រើនជាងមុននៅក្នុងការសម្រេចចិត្ត ដើម្បីមានវិធានការចាំបាច់ស្តាស្ថានភាពប្រទេសដែលកំពុងមានវិបត្តិ ដោយដាក់ចេញវិធានការ និងគោលនយោបាយដែលមិនធ្លាប់មានពីមុនមក។
ស្ថានភាពមួយចំនួនដែលអាចជំរុញឱ្យរដ្ឋាភិបាលនៃប្រទេសមួយប្រកាសដាក់ប្រទេសក្នុងស្ថានភាពអាសន្ន រួមមាន ការមានសង្គ្រាម ជម្លោះប្រដាប់អាវុធ ភាពវឹកវរសង្គម ការរាតត្បាតជំងឺ ជាដើម។
ឥឡូវពិភពលោកបានប្រកាសអំពីការរាតត្បាតជាសកលនៃមេរោគកូវីដ១៩ ខណៈដែលមេរោគនេះ បានឆ្លងដល់ប្រជាជននៅក្នុងប្រទេស១៩០ទៅហើយក្នុងពិភពលោក។ មនុស្សជាង៨៥ម៉ឺនាក់ នៅក្នុងពិភពលោកបានឆ្លងមេរោគកូវីដ១៩ ហើយវាក៏បានឆក់យកជីវិតមនុស្សជាង៤ម៉ឺននាក់ផងដែរ។
ស្ថានភាពធ្ងន់ធ្ងរជាងគេនៅប្រទេស អាមេរិក អ៊ីតាលី អេស្ប៉ាញ បារាំង និងចិន។ ចំណែកនៅក្នុងតំបន់អាស៊ានវិញ ឥណ្ឌូនេស៊ីមានអ្នកស្លាប់ច្រើនជាងគេដោយមេរោគកូវីដ១៩។
ដូច្នេះ ការប្រកាសភាពអាសន្នរបស់ប្រទេសជាច្រើននៅក្នុងពិភពលោកនៅពេលនេះ គឺដោយសារតែការរាតត្បាតនៃមេរោគកូវីដ១៩ ហើយគោលបំណងនៃការប្រកាសអាសន្ន គឺដើម្បីសុខភាព និងជីវិតមនុស្ស ព្រមទាំងបន្ថយផលប៉ះពាល់ផ្សេងទៀតដែលមេរោគនេះអាចបង្កឡើងទៅលើសេដ្ឋកិច្ច និងសង្គម។
ប្រទេសកម្ពុជាគិតត្រឹមថ្ងៃទី០១ ខែមេសា បានរកឃើញអ្នកឆ្លងមេរោគកូវីដ១៩ ចំនួន១០៩នាក់ ហើយមានអ្នកជាសះស្បើយពីជំងឺនេះចំនួន២៧ និងមិនមាននរណាម្នាក់ស្លាប់ដោយសារមេរោគកូវីដ១៩នេះទេ។
អ្វីដែលជារឿងល្អមួយនោះ គឺនៅថ្ងៃទី០១ ខែមេសា កម្ពុជាមិនបានរកឃើញនរណាម្នាក់ឆ្លងមេរោគកូវីដ ១៩ទេ។ ដូច្នេះបើស្ថានភាពនៃការរាលដាលមេរោគកូវីដ១៩ នឹងមានការថយចុះនោះ ការដាក់ប្រទេសក្នុងស្ថានភាពអាសន្ននឹងមិនត្រូវបានធ្វើឡើងដូចបានពន្យល់ដោយសម្តេចតេជោ ហ៊ុន សែន កាលពីដើមសប្តាហ៍។
ផ្ទុយមកវិញ បើសិនជាការរាលដាលនៃមេរោគកូវីដ១៩ កាន់តែធ្ងន់ធ្ងរទៅនៅក្នុងប្រទេសកម្ពុជានោះ វាប្រហែលជាផ្តល់ភាពចាំបាច់ដល់ព្រះមហាក្សត្រចេញព្រះរាជក្រិត្យមួយប្រកាសភាពអាសន្ន បន្ទាប់ពីកម្ពុជាមានច្បាប់មួយស្តីពីការដាក់ប្រទេសក្នុងស្ថានភាពអាសន្ន។ គណៈរដ្ឋមន្ត្រីត្រូវគេរំពឹងថា នឹងពិភាក្សាទៅលើសេចក្តីព្រាងច្បាប់ដាក់ប្រទេសក្នុងស្ថានភាពអាសន្ននៅថ្ងៃសុក្រខាងមុខនេះ។
ច្បាប់នោះនឹងក្លាយជាមូលដ្ឋានផ្នែកច្បាប់សម្រាប់ការដាក់ប្រទេសស្ថិតនៅក្នុងស្ថានភាពអាសន្ន ដើម្បីទប់ទល់នឹងការរាលដាលនៃមេរោគកូវីដ១៩ និងដើម្បីជួយសុខភាពនិងជីវិតប្រជាជនកម្ពុជា។
ជាទូទៅការដាក់ប្រទេសអោយស្ថិតនៅក្នុងស្ថានភាពអាសន្ននឹងផ្តល់អោយរដ្ឋាភិបាលមានសិទ្ឋិក្នុងការកម្រិត ឬហាមឃាតដល់ការធ្វើដំណើរ ការជួបជុំ ការហាមឃាត់មិនអោយប្រជាជនចេញពីផ្ទះជាដើម។ ប៉ុន្តែទោះបីជាយ៉ាងណាក៏ដោយចុះ វាជាវិធានការចាំបាច់ដើម្បីអោយយុទ្ធនាការប្រឆាំងនឹងជំងឺកូវីដ១៩ កាន់តែមានប្រសិទ្ធភាព និងទទួលជោគជ័យ។
វាក៏មិនមែនជាអ្វីដែលគួរអោយភ្ញាក់ផ្អើលដែរ នៅក្នុងស្ថានភាពពិភពលោកបច្ចុប្បន្ន ពីព្រោះប្រទេសជាច្រើននៅលើពិភពលោក ជាពិសេសអាមេរិកក៏បានប្រកាសភាពអាសន្នដែរ ដើម្បីប្រយុទ្ធនឹងមេរោគកូវីដ១៩។
ខណៈដែលយើងមិនចង់ឃើញការរាលដាលមេរោគកូវីដ១៩ នៅកម្ពុជាកាន់តែធ្ងន់ធ្ងរហើយក៏មិនចង់ឃើញការប្រកាសភាពអាសន្ននៅកម្ពុជាដែរនោះ យើងគ្រាន់តែសង្ឃឹមថា ស្ថានភាពកូវីដ១៩នៅក្នុងប្រទេសនឹងងាកមករកភាពល្អប្រសើរ។
ទន្ទឹមនឹងនោះ យើងម្នាក់ៗត្រូវព្យាយាមធ្វើតាមការណែនាំរបស់រដ្ឋាភិបាល កន្លងមកដូចជា ការលាងដៃអោយបានញឹកញាប់ជាមួយទឹក និងសាប៊ូ ឬក៏អាលកុល ឬក៏ជែលសម្លាប់មេរោគ ពាក់ម៉ាសមុខ មិនធ្វើដំណើរទៅក្រៅ ឬក៏កន្លែងមានមនុស្សច្រើន ហើយក្នុងករណីដែលសង្ស័យថា ខ្លួនអាចឆ្លងកូវីដ១៩ ដោយមានការលេចសញ្ញាក្តៅខ្លួន ក្អក ពិបាកដកដង្ហើម និងប្រវត្តិនៃការធ្វើដំណើរក្រៅប្រទេស ឬនៅជិតអ្នកជំងឺកូវីដ១៩នោះ យើងត្រូវដាក់ខ្លួនឯងដោយឡែករយៈពេល១៤ថ្ងៃ ឬក៏ទាក់ទង១១៥ ដើម្បីរកជំនួយផ្នែកពេទ្យ។
បើសិនជារដ្ឋាភិបាល និងប្រជាជនបានរួមគ្នាដោយជោគជ័យប្រឆាំងនឹងកូវីដ១៩ ពេលនោះច្បាប់នៃការដាក់ប្រទេសនៅក្នុងស្ថានភាពអាសន្ននឹងមិនត្រូវយកមកប្រើឡើយ។
ប៉ុន្តែបើសិនជាស្ថានភាពកូវីដ១៩ កាន់តែអាក្រក់ ការដាក់ប្រទេសក្នុងស្ថានភាពអាសន្នដូចប្រទេសផ្សេងៗ ប្រហែលជារឿងចាំបាច់ត្រូវធ្វើ ហើយប្រជាជនទាំងអស់ត្រូវចូលរួមអនុវត្តន៍ ដើម្បីអោយការប្រយុទ្ធនឹងកូវីដ១៩ អាចទទួលបានជោគជ័យ។
យើងនឹងបន្តតាមដាន និងត្រៀមខ្លួនចូលរួមអនុវត្តទាំងអស់គ្នារាល់វិធានការ និងគោលនយោបាយប្រឆាំងកូវីដ១៩ និងដើម្បីសុខភាព និងជីវិតប្រជាជនទាំង១៦លាននាក់៕ (កែសម្រួលដោយ ៖ បុប្ផា)
ចែករំលែកព័តមាននេះ