រាជធានីភ្នំពេញ ៖ ដោយសារប្រាក់បៀវត្សរបស់ប្រជាពលរដ្ឋកម្ពុជាមួយចំនួនធំ ដូចជាកម្មករ និយោជិត តាមបណ្ដារោងចក្រក្នុងវិស័យកាត់ដេរមួយចំនួនបានឡើងដល់កម្រិតជាប់ពន្ធដែលត្រូវបង់ពន្ធជូនរដ្ឋ ទើបក្នុងឆ្នាំ២០១៤នេះ អគ្គនាយកដ្ឋានពន្ធដារនៃក្រសួងសេដ្ឋកិច្ច ប្រមូលពន្ធលើប្រាក់បៀវត្សបានជាង ១០០លានដុល្លារអាមេរិក ក្នុងរយៈពេល៨ ខែដើមឆ្នាំនេះ ។
រាជធានីភ្នំពេញ ៖ ដោយសារប្រាក់បៀវត្សរបស់ប្រជាពលរដ្ឋកម្ពុជាមួយចំនួនធំ ដូចជាកម្មករ និយោជិត តាមបណ្ដារោងចក្រក្នុងវិស័យកាត់ដេរមួយចំនួនបានឡើងដល់កម្រិតជាប់ពន្ធដែលត្រូវបង់ពន្ធជូនរដ្ឋ ទើបក្នុងឆ្នាំ២០១៤នេះ អគ្គនាយកដ្ឋានពន្ធដារនៃក្រសួងសេដ្ឋកិច្ច ប្រមូលពន្ធលើប្រាក់បៀវត្សបានជាង ១០០លានដុល្លារអាមេរិក ក្នុងរយៈពេល៨ ខែដើមឆ្នាំនេះ ។
លោក គង់ វិបុល ប្រតិភូរាជរដ្ឋាភិបាល ទទួលបន្ទុកជាអគ្គនាយកដ្ឋានពន្ធដារ បានមានប្រសាសន៍ថា ឆ្នាំនេះចំណូលពន្ធលើប្រាក់បៀវត្សបានកើនឡើងប្រមាណជា៤០ភាគរយ គិតត្រឹមដំណាច់ខែសីហា ឆ្នាំ២០១៤ ។ ក្នុងរយៈពេល៨ខែដើមឆ្នាំនេះ អគ្គនាយកដ្ឋានពន្ធដារ ប្រមូលបានជាង១០០លានដុល្លារអាមេរិក ច្រើនជាង ឆ្នាំ២០១៣ ពេញមួយឆ្នាំ ដែលរកចំនូលបានតែជាង៧៥លានដុល្លារអាមេរិកប៉ុណ្ណោះ ។ ក្នុងរយៈពេល៣ទៅ៤ខែខាងមុនទៀត ឬដល់ដំណាច់ឆ្នាំ២០១៤ អគ្គនាយកដ្ឋានពន្ធដារសង្ឃឹមថា ចំណូលពន្ធដែលបានពីការបង់ពន្ធលើប្រាក់បៀវត្សរបស់ប្រជាពលរដ្ឋកម្ពុជា នឹងឡើងដល់១១០លានដុល្លារអាមេរិក ។
លោកបន្តថា នេះដោយសារតែកំណើនសេដ្ឋកិច្ចនៃប្រទេសយើងបានកើនឡើងជាលំដាប់ ស្របពេលដែលប្រាក់បៀវត្សរបស់ប្រជាពលរដ្ឋកើនឡើងជាមួយគ្នានេះដែរ ជាពិសេសដោយសារការយល់ដឹងពីសំណាក់ប្រជាពលរដ្ឋដែលជាប់ពន្ធ និងមានកាតព្វកិច្ចបង់ពន្ធជូនរដ្ឋបានបំពេញកាតព្វកិច្ចច្រើនឡើងៗ ។ យើងដឹងថា ប្រជាពលរដ្ឋពិតជាមានការរារែកក្នុងការបង់ពន្ធជូនរដ្ឋ តែនេះជាកាតព្វកិច្ច ដែលប្រជាពលរដ្ឋម្នាក់ៗ ត្រូវធ្វើ ។ យើងនឹងពន្យល់ពួកគាត់ ពីប្រាក់ចំណូលដែលបានពីការបង់ពន្ធរបស់ពួកគាត់មកកាន់អគ្គនាយកដ្ឋានពន្ធដារ ថាតើយើងយកប្រាក់ចំណូលនេះទៅធ្វើអ្វីខ្លះ ។
លោកក៏បានបញ្ជាក់ដែរ ក្នុងករណីមានបុគ្គលិក កម្មករ និយោជិតបានបង់ពន្ធជូនរួចហើយ តែខាងថៅកែ ឬម្ចាស់រោងចក្រ ក្រុមហ៊ុនមិនបានយកមកបង់ជូនរដ្ឋទេនោះ ខាងអគ្គនាយកដ្ឋាននឹងត្រូវចាត់វិធានការតាមផ្លូវច្បាប់ ដោយត្រូវបង្កើនប្រាក់ពន្ធនោះទៅលើម្ចាស់រោងចក្រ ឬម្ចាស់ក្រុមហ៊ុន ។ តែរហូតមកដល់ពេលនេះ នៅមិនទាន់មានករណីនេះកើនឡើងទេ ដោយគ្រប់ស្ថាប័នសុទ្ធតែបានបំពេញកាតព្វកិច្ចត្រឹមត្រូវចំពោះបុគ្គលិករបស់ខ្លួនដែលត្រូវជាប់ពន្ធ និងមានកាតព្វកិច្ចបង់ពន្ធជូន ។
គួរបញ្ជាក់ថា នៅក្នុងឆមាសទី១ ឆ្នាំ ២០១៤នេះ អគ្គនាយកដ្ឋានពន្ធដារ នៃក្រសួងសេដ្ឋកិច្ចប្រមូលពន្ធបានជាង៥៣២លានដុល្លារអាមេរិក ដែលមានកើនឡើងប្រមាណ១៣ភាគរយ ធៀបនឹងរយៈពេលដូចគ្នាកាលពីឆ្នាំ២០១៣ ហើយប្រាក់ពន្ធទាំងនោះបានមកពីពន្ធលើប្រាក់បៀវត្ស ពន្ធលើអាករបន្ថែម ពន្ធដែលបានមកពីទំនិញ និងសេវាកម្មផ្សេងៗ ពន្ធបានមកពីយានយន្ត និងអចលនទ្រព្យជាដើម ៕
ចែករំលែកព័តមាននេះ