រាជធានីភ្នំពេញ ៖ លោកជំទាវ ឱ វណ្ណឌីន រដ្ឋលេខាធិការនិងជាអ្នកនាំពាក្យក្រសួងសុខាភិបាលកម្ពុជាបានថ្លែងឲ្យដឹងកាលពីរាត្រីថ្ងៃទី ២៦ ខែមីនានេះថា បន្ទាប់ពីរកឃើញករណីវិជ្ជមានជនជាតិឥណ្ឌូនេស៊ីពីរនាក់ដែលបានធ្វើដំណើរពីប្រទេសថៃនិងត្រូវបានរកឃើញថាវីជ្ជមានកូវីដ ១៩…
រាជធានីភ្នំពេញ ៖ លោកជំទាវ ឱ វណ្ណឌីន រដ្ឋលេខាធិការនិងជាអ្នកនាំពាក្យក្រសួងសុខាភិបាលកម្ពុជាបានថ្លែងឲ្យដឹងកាលពីរាត្រីថ្ងៃទី ២៦ ខែមីនានេះថា បន្ទាប់ពីរកឃើញករណីវិជ្ជមានជនជាតិឥណ្ឌូនេស៊ីពីរនាក់ដែលបានធ្វើដំណើរពីប្រទេសថៃនិងត្រូវបានរកឃើញថាវីជ្ជមានកូវីដ ១៩ នៅខេត្តសៀមរាបនោះ អាជ្ញាធរបានស្រាវជ្រាវ និងរកឃើញអ្នកពាក់ព័ន្ធតែម្នាក់គត់ គឺអ្នកបើកតាក់ស៊ីពីប៉ោយប៉ែត មកកាន់ខេត្តសៀមរាប ។
ថ្លែងប្រាប់អ្នកសារព័ត៌មានតាមតេឡេក្រាម លោកជំទាវ ឱ វណ្ណឌី បានបញ្ជាក់ថា ទាក់ទងមនុស្សដែលប្រាស្រ័យទាក់ទងជនជាតិឥណ្ឌូនេស៊ី មានផ្ទុកកូវីដ ១៩ នោះគឺមិនមានច្រើនទេ នោះគឺមានតែអ្នកបើកតាក់ស៊ី ដែលបច្ចុប្បន្នអ្នកបើកបរតាក់ស៊ី យើងរកឃើញហើយ ហើយក៏ធ្វើតេស្តរួចហើយ កំពុងរង់ចាំលទ្ធផល ។
លោកជំទាវអ្នកនាំពាក្យក្រសួងសុខភិបាលក៏បានរៀបរាប់ពីដំណើររឿងនៃករណីជនជាតិឥណ្ឌូនេស៊ី ថា គាត់ទាំងពីរមើលនៅពេទ្យមួយនៅក្រុងបាងកកប្រទេសថៃ ដល់ពិនិត្យនិងធ្វើតេស្តនៅទីនោះទៅ ឃើញថាវិជ្ជមានកូវីដ ១៩ ។
លោកជំទាវ ឱ វណ្ណឌីន បានបន្តទៀតថា «ប៉ុន្តែដូចយើងដឹងហើយ ថៃ មិនមើលទទេរទេ គាត់ charge (គិត) លុយ ខ្ញុំមិនដឹងថា charge លុយប៉ុន្មានទេ តែយើងដឹងហើយប្រកាសរបស់ថៃ ទាល់តែមាន Health Insurance រហូតដល់ ១០ម៉ឺនដុល្លារឯណោះ បានឲ្យចូលស្រុកថៃ។ អញ្ចឹងដោយសារតែឥណ្ឌូនេស៊ី អត់មានលុយ អញ្ចឹងគាត់ក៏ធ្វើដំណើរ ដោយសារលឺថាស្រុកខ្មែរយើងហ្នឹង មើល (ព្យាបាល) មិនយកលុយកាក់អីនោះ អញ្ចឹងគាត់ក៏ធ្វើដំណើរមកស្រុកយើង ។ ហើយពេលដែលគាត់មកហ្នឹង គឺគាត់អត់មានជារោគសញ្ញាអីទេ អត់មានអាការៈអីឡើងកំដៅអីទេ គឺអត់មាន ឬក៏គាត់លេបថ្នាំក៏ខ្ញុំមិនដឹងដែរ។ អញ្ចឹងគាត់ដើរមក ក្រុមគ្រូពេទ្យស្កេនអីធម្មតា អញ្ចឹងវាអត់មានកំដៅអីទេ » ។
ហើយគាត់ជួលឡានតាក់ស៊ីមួយជិះ ដាច់តែឯងមក តាមច្រកប៉ោយប៉ែត ពេលមកដល់សៀមរាបគាត់ក៏ទៅមន្ទីរពេទ្យខេត្តសៀមរាបយើង អញ្ចឹងពេទ្យយើងសួរនាំទៅក៏ធ្វើតេស្ត ព្រោះពេលនោះគាត់ប្រាប់ ថាពេលនៅថៃ គេធ្វើតេស្តទៅគាត់វិជ្ជមាន តែដើម្បីបញ្ជាក់ឲ្យច្បាស់លាស់ ពេទ្យខ្មែរក៏ធ្វើតេស្តពួកគាត់ ដល់ពេលធ្វើទៅ ក៏ឃើញលទ្ធផលវិជ្ជមានទាំងពីរនាក់ ដូច្នេះក៏ឲ្យគាត់ទាំងពីរនៅសម្រាកព្យាបាលនៅមន្ទីរពេទ្យខេត្តសៀមរាបតែម្តងទៅ ៕ (កែសម្រួលដោយ ៖ ធីតា)
ចែករំលែកព័តមាននេះ