ថ្មីៗនេះរូបថតមួយសន្លឹកដែលបានបង្ហាញលោកតាជនជាតិអ៊ីតាលីម្នាក់ ដែលមានវ័យចំណាស់ខ្លាំងបានជិះកង់មកមើលបញ្ជីឈ្មោះនៃអ្នកស្លាប់ដោយសារការឆ្លងវីរុសកូវីដ១៩ នៅមុខទីបញ្ចុះសពមួយនៅ Bolgare, Lombardy ក្នុងន័យចង់ស្វែងរកថា តើមិត្តភ័ក្តិ ឬសាច់ញាតិណាខ្លះបានបាត់បង់ជីវិត ព្រោះវ័យក្នុងនោះជំនាន់ដូចគ្នានឹងលោកតាបានឆ្លង និងស្លាប់យ៉ាងច្រើនដោយសារតែវីរុសកូវីដ ១៩ ។
សម្រាប់ជនជាតិអ៊ីតាលីវ័យចំណាស់ ការរស់នៅក្នុងភាពឯកោបានបង្កជាភាពភ័យខ្លាចច្រើនជាងវីរុសកូវីដ ១៩ ទៅទៀត ។ មនុស្សជាង ៧៥០០ នាក់បានស្លាប់នៅអ៊ីតាលី ដោយសារវីរុសកូវីដ ១៩ ដែលជាចំនួនស្លាប់ច្រើនបំផុតលើពិភពលោក ក្នុងនោះអ្នកស្លាប់ភាគច្រើនជាមនុស្សវ័យចំណាស់ គឺមានប្រមាណ ៥៦ ភាគរយនៃអ្នកស្លាប់នៅអ៊ីតាលីមានអាយុលើសពី ៨០ ឆ្នាំ ។ នេះបើយោងតាមវិទ្យាស្ថានជាតិសុខាភិបាលនៃប្រទេសអ៊ីតាលី ដែលត្រូវបានចុះផ្សាយដោយទីភ្នាក់ងារ AFP ។
នាពេលបច្ចប្បន្ននេះ ស្ទើរតែ ២៨ ភាគរយនៃជនជាតិអ៊ីតាលីដែលមានអាយុលើសពី ៦៥ ឆ្នាំឡើងកំពុងរស់នៅម្នាក់ឯងឯកោ ក្នុងនោះមានប្រមាណ ១,៣ លាននាក់ដែលមិនមានលទ្ធភាពប្រើប្រាស់បណ្តាញសង្គម ។ នេះបើយោងតាមវិទ្យាស្ថានស្ថិតិជាតិអ៊ីតាលី។ លោក Fabio Sbattella សាស្ត្រាចារ្យផ្នែកចិត្តសាស្ត្របន្ទាន់នៅឯសាកលវិទ្យាល័យ Cattolica នៃទីក្រុង Milan បានមានប្រសាសន៍ថា“ មនុស្សវ័យចំណាស់ជួបប្រទះនឹងស្ថានភាពលំបាកពិសេស។
លោក Sbattella ដែលផ្តល់ជំនួយដល់ប្រជាជនដែលងាយនឹងទទួលរងគ្រោះដោយរោគសាស្ត្រនៃវីរុសកូវីដ ១៩ បាននិយាយថា «អារម្មណ៍មួយដែលកើតមាននៅក្នុងពេលនេះគឺបានបង្កើតឲ្យមានការភាន់ច្រលំថា នៅពេលជំងឺរាតត្បាត គឺដើម្បីឱ្យសហគមន៍អាចរស់រានជៀសផុតពីការឆ្លងវីរុសនេះ យើងត្រូវនៅម្នាក់ឯង ខណៈការពិតនោះគឺការរស់នៅតែឯងគឺសម្រាប់អ្នកដែលសង្ស័យថាមានផ្ទុកវីរុសនេះ ឬក៏អត់ » ៕
ចែករំលែកព័តមាននេះ