រាជធានីភ្នំពេញ ៖ បុរសជាអ្នកបើកបររ៉ឺម៉កកង់បីម្នាក់ទំនងជាលង់ស្នេហ៍នារីជាភេទទីបីរូបស្រស់ម្នាក់ដែលហៅឱ្យដឹក មិនត្រឹមតែមិនបានលុយនោះទេ បែរជាអោយលុយនាងខ្ចីចំនួន៥៥ដុល្លារលោះទូរស័ព្ទសិន ដើម្បីយកទូរស័ព្ទនោះទៅបញ្ចាំនៅកន្លែងផ្សេងជាបន្តទៀតក្រែងបានលុយច្រើនជាងនេះ តែទីបំផុតនាងមិនព្រមបញ្ចាំយកលុយមកសងវិញទេ ចេះតែពន្យារពេល ទើបកើតទំនាស់បែកផ្សែង ។
ហេតុការណ៍ខាងលើនេះបង្កអោយមានការភ្ញាក់ផ្អើលកាលពីវេលាម៉ោងប្រមាណ៩និង៣០នាទីព្រឹកថ្ងៃទី២០ ខែមីនា ឆ្នាំ២០២០ នៅផ្សារធំទួលសង្កែហៅផ្សារសាំហាន់ ស្ថិតក្នុងភូមិបាក់ទូក សង្កាត់ទួលសង្កែ១ ខណ្ឌឬស្សីកែវ ។
បុរសដែលជាអ្នករត់រ៉ឺម៉កម៉ូតូកង់បីម្នាក់ខាងលើនេះពុំត្រូវបានស្គាល់ឈ្មោះឡើយ ចំណែកនារីជាភេទទីបីម្នាក់ខាងលើក៏ពុំបានប្រាប់អោយស្គាល់ឈ្មោះដែរ តែមានគេអះអាងថា បុរសកែភេទជាស្រី ។
តាមប្រភពព័ត៌មានបានអោយដឹងថា នៅវេលាម៉ោងប្រមាណ៦និង៣០នាទីថ្ងៃទី២០ខែ មីនា នារីជាភេទទី៣រូបស្រស់ម្នាក់ខាងលើនោះបានហៅម៉ូតូកង់បីជិះពីចំណុចផ្សារវត្តទួលសង្កែ ក្នុងគោលបំណងទៅវត្តទួលអស់លោក ស្ថិតក្នុងសង្កាត់គីឡូម៉ែត្រលេខ៦ ដើម្បីលោះទូរស័ព្ទ ។ ខណៈនោះទំនងជាអ្នករត់រ៉ឺម៉កម៉ូតូកង់បីលង់ស្នេហ៍នាង ក៏បានអោយប្រាក់ខ្ចីចំនួន៥៥ដុល្លារ ដើម្បីអោយនាងលោះទូរស័ព្ទមួយគ្រឿង បន្ទាប់ពីនាងប្រាប់ថា ខ្ចីលុយសិន ចាំយកទូរស័ព្ទទៅបញ្ចាំកន្លែងផ្សេងក្រែងបានលើសនេះសល់លុយខ្លះ ។
តាមប្រភពព័ត៌មានបានអោយដឹងបន្តថា បន្ទាប់ពីលោះបានទូរស័ព្ទហើយ នាងក៏អោយឌុបមកផ្សារធំទួលសង្កែហៅផ្សារសាំហាន់ យកទូរស័ព្ទទៅបញ្ចាំ ដោយទារម្ចាស់កុងស៊ីចំនួន៧០ដុល្លារ ដើម្បីយកសងអ្នករត់រ៉ឺម៉កម៉ូតូកង់៣ និងសល់លុយខ្លះ។
តាមព័ត៌មានអោយដឹងបន្តទៀតថា នៅព្រឹកនោះ នាងយកទូរស័ព្ទទៅបញ្ចាំពីកន្លែងមួយទៅកន្លែងមួយ តែគេអោយតែ៥០ដុល្លារ ហើយនាងមិនព្រមបញ្ចាំទេ ព្រោះអត់មានលុយសល់ហើយចេះតែពន្យារពេលរហូត។ ដោយសារតែនាងមិនព្រមបញ្ចាំទូរស័ព្ទបែបនេះ ក៏កើតមានទំនាស់គ្នាបែកផ្សែងជាមួយអ្នករត់រ៉ឺម៉កម៉ូតូកង់បី ហើយអ្នករត់រ៉ឺម៉កម៉ូតូកង់បីក៏បានហៅប្រពន្ធមកជួយនិយាយ និងឈ្លោះគ្នាបន្តទៀត កាន់តែបង្កឱ្យមានការភ្ញាក់ផ្អើលឡើង ។
នៅព្រឹកនោះដែរ ប្រជាការពារក៏បានហៅអ្នកទាំង២ទៅសម្របសម្រួលគ្នាទៅទីស្នាក់ការប្រជាការពារ ក៏មិនត្រូវរ៉ូវគ្នា ព្រោះនាងអត់អោយលុយ ខណៈនោះក្រុមអ្នកសារព័ត៌មានម្នាក់ក៏បានទៅយកព័ត៌មានក៏ត្រូវនាងខ្ចីលុយអោយអ្នករត់រ៉ឺម៉កម៉ូតូកង់បីសិន ។ បន្ទាប់ពីក្រុមអ្នកយកព័ត៌មានឡាយផ្ទាល់ ក៏មានសប្បុរសជនម្នាក់បានចេញលុយចំនួន៥៥ដុល្លារ សងអ្នករត់រ៉ឺម៉កម៉ូតូកង់បីវិញ ហើយពួកគេទាំងសងខាងក៏បានបញ្ចប់រឿងទៅបាត់អស់ ៕ (កែសម្រួលដោយ ៖ ធីតា)
ចែករំលែកព័តមាននេះ